நடிகர் சத்யராஜின் மகளும் சமூகச் செயல்பாடுகளில் ஈடுபட்டு வருபவருமான திவ்யா சத்யராஜ், சமீபத்திய பேட்டியில் தனது தனிப்பட்ட வாழ்க்கை, காதல் அனுபவம் மற்றும் திருமணம் குறித்த தனது பார்வைகளை வெளிப்படையாக பகிர்ந்துள்ளார். அவரது கருத்துகள் சமூக வலைதளங்களில் பரவலாக விவாதிக்கப்பட்டு வருகின்றன.

அந்தப் பேட்டியில் திருமணம் குறித்து பேசிய திவ்யா, திருமணம் என்பது அனைவருக்கும் கட்டாயமான வாழ்க்கைத் தேர்வு அல்ல என்று கூறினார். பாரம்பரிய திருமணச் சடங்குகளான தாலி கட்டுதல், மோதிரம் மாற்றுதல் போன்றவற்றில் தனக்கு நம்பிக்கை இல்லை என்றும் தெரிவித்தார்.

மேலும், இருவர் ஒருவரை ஒருவர் விரும்பினால் இணைந்து வாழ முடியும்; அதற்காக திருமணம் அவசியமில்லை என்ற கருத்தையும் முன்வைத்தார். ஒரே வீட்டில் வாழ்வதே உறவின் அடையாளம் அல்ல, தனித்தனியாக வாழ்ந்தாலும் உறவை தொடர முடியும் என்றார்.

குழந்தை பெற்றுக்கொள்வது குறித்து பேசிய அவர், திருமணத்திற்குப் பிறகே குழந்தை பெற வேண்டும் என்ற கருத்தை ஏற்க முடியாது என்றும், திருமணமின்றி குழந்தை பெற்றுக்கொள்வதிலும் தவறு இல்லை என்ற தனது நிலைப்பாட்டை வெளிப்படுத்தினார்.

அதேபோல், தனக்கு ஜாதகம் இல்லாதது குறித்து பெருமையாக நினைப்பதாகவும், வாழ்க்கை முடிவுகளை நம்பிக்கைகள் அல்லது சமூக அழுத்தங்களின் அடிப்படையில் எடுக்க விரும்பவில்லை என்றும் கூறினார்.

தனது காதல் வாழ்க்கையைப் பற்றியும் முதல் முறையாக பேசிய திவ்யா, தானும் காதலித்ததாகவும், அந்த உறவு தோல்வியில் முடிந்ததாகவும் தெரிவித்தார். அந்த வேதனையை குடும்பத்தினரிடம் காட்டாமல், தனியாகவே சமாளித்ததாகவும் பகிர்ந்தார்.

தனது வாழ்க்கைத் தேர்வுகளில் தந்தை சத்யராஜ் எப்போதும் தலையிடவில்லை என்றும், தனது மகிழ்ச்சியே அவருக்கு முக்கியம் என்றும் கூறியுள்ளார். திருமணம் செய்தாலும் செய்யாவிட்டாலும் அது தனது சொந்த முடிவு என்பதை குடும்பம் மதிப்பதாக தெரிவித்தார்.

திவ்யா சத்யராஜின் இந்த கருத்துகள் சிலரிடையே பாராட்டுகளைப் பெற்றுள்ளன. அதே நேரத்தில், சமூக மற்றும் கலாச்சார பார்வையில் இது விவாதத்திற்குரிய கருத்துகள் என்றும் சிலர் எதிர்வினை தெரிவித்து வருகின்றனர்.