மதுராந்தகம் மற்றும் தாராபுரம் தொகுதிகளுக்கான இடைத்தேர்தல் பிரசாரம் சூடுபிடித்துள்ள நிலையில், தமிழக வெற்றிக் கழக கூட்டணிக்குள் புதிய சர்ச்சை எழுந்துள்ளதாக தகவல்கள் வெளியாகியுள்ளன. இடைத்தேர்தல் பொதுக்கூட்ட மேடையை முதலமைச்சர் விஜய்யுடன் கூட்டணி கட்சித் தலைவர்களும் பகிர்ந்து கொள்ள வேண்டும் என கோரிக்கை வைக்கப்பட்டதாகவும், அதற்கு தவெக தரப்பில் நேரடியாக விஜய்யுடன் மேடையை பகிர்ந்து கொள்ள வாய்ப்பு இல்லை என பதில் அளிக்கப்பட்டதாகவும் அரசியல் வட்டாரங்களில் கூறப்படுகிறது.

மதுராந்தகம் மற்றும் தாராபுரம் தொகுதிகளுக்கான இடைத்தேர்தல் அக்டோபர் 6-ம் தேதி நடைபெறவுள்ளதாக கூறப்படுகிறது. இந்த தேர்தலில் தவெக சார்பில் மரகதம் குமரவேல் மற்றும் சத்தியபாமா ஆகியோர் வேட்பாளர்களாக களமிறக்கப்பட்டுள்ளனர். அதிமுகவில் இருந்து தவெகவுக்கு வந்தவர்களுக்கு வேட்பாளர் வாய்ப்பு வழங்கப்பட்டிருப்பது தொடர்பாக உள்ளூரில் எதிர்ப்புகள் எழுந்துள்ளதாகவும் கூறப்படுகிறது.

இந்நிலையில், இடைத்தேர்தலை எதிர்கொள்ளும் வகையில் தவெக தலைமையில் “மதச்சார்பற்ற சமூகநீதி வெற்றிக் கூட்டணி” என்ற பெயரில் கூட்டணி அமைக்கப்பட்டுள்ளது. காங்கிரஸ், விசிக, இந்திய யூனியன் முஸ்லிம் லீக் மற்றும் மதிமுக ஆகிய கட்சிகள் இந்த கூட்டணியில் இடம்பெற்றுள்ளதாக தெரிவிக்கப்பட்டுள்ளது. தவெக முதல்முறையாக கூட்டணி அமைத்து தேர்தலை சந்திக்கும் நிலையில், கூட்டணிக்குள் தற்போது எழுந்துள்ளதாக கூறப்படும் இந்த கருத்து வேறுபாடு அரசியல் வட்டாரத்தில் கவனம் பெற்றுள்ளது.

இதற்கிடையே, இடைத்தேர்தல் பிரசாரத்துக்கு முதலமைச்சர் விஜய் கட்டாயம் வர வேண்டும் என வேட்பாளர்கள் தரப்பில் அமைச்சர்கள் மூலம் கோரிக்கை வைக்கப்பட்டதாகவும் கூறப்படுகிறது. இதையடுத்து விஜய் மதுராந்தகம் தொகுதியில் பொதுக்கூட்டம் மற்றும் ரோடு ஷோ என இரண்டு நாட்கள் பிரசாரம் மேற்கொள்ள இருப்பதாக தகவல்கள் வெளியாகியுள்ளன.

இந்த சூழலில்தான் கூட்டணி கட்சிகள் தரப்பில் தவெக தலைமையிடம் ஒரு முக்கிய கோரிக்கை முன்வைக்கப்பட்டதாக கூறப்படுகிறது. இடைத்தேர்தல் பொதுக்கூட்ட மேடையில் விஜய்யுடன் கூட்டணி கட்சித் தலைவர்களும் இணைந்து பங்கேற்க வேண்டும் என்பதே அந்த கோரிக்கை என அரசியல் வட்டாரங்கள் தெரிவிக்கின்றன.

ஆனால், இதற்கு தவெக தலைமை தரப்பில் நேரடியாக விஜய்யுடன் கூட்டணி கட்சித் தலைவர்கள் மேடையை பகிர்ந்து கொள்வதற்கான வாய்ப்பு இல்லை என பதில் அளிக்கப்பட்டதாக கூறப்படுகிறது. இதனால் கூட்டணி கட்சிகளின் தலைவர்கள் மற்றும் நிர்வாகிகள் சிலர் அதிருப்தியில் இருப்பதாக தகவல்கள் வெளியாகியுள்ளன.

குறிப்பாக மதுராந்தகம் தொகுதியில் விசிகவுக்கு கணிசமான வாக்குகள் இருப்பதாக அக்கட்சி தரப்பு கருதும் நிலையில், விசிக தலைவர் திருமாவளவனுடன் விஜய் ஒரே மேடையில் தோன்றுவாரா என்ற கேள்வியும் எழுந்துள்ளது. ஆனால் இதுகுறித்தும் தவெக தரப்பில் தெளிவான தகவல் வெளியாகவில்லை.

மேலும், விஜய்யின் பிரசாரத்தில் கூட்டணி கட்சிகளின் வேட்பாளர்களின் பெயர்களை குறிப்பிட்டு வாக்கு கேட்பதைவிட, தனது கட்சியின் தேர்தல் சின்னமான விசிலுக்கு வாக்கு கேட்பதற்கே முக்கியத்துவம் அளிக்கப்படலாம் என்ற பேச்சும் அரசியல் வட்டாரத்தில் நிலவி வருகிறது. இது உறுதிப்படுத்தப்பட்ட தகவல் அல்ல என்றாலும், கூட்டணி கட்சிகளுக்குள் இதுபோன்ற எதிர்பார்ப்புகள் மற்றும் அதிருப்திகள் இருப்பதாக கூறப்படுகிறது.

இதனால், தவெக தலைமையிலான கூட்டணி உண்மையான தேர்தல் கூட்டணியாக செயல்படுகிறதா அல்லது தொகுதி அளவிலான தேர்தல் ஏற்பாடாக மட்டுமே இருக்கிறதா என்ற விவாதமும் அரசியல் வட்டாரத்தில் எழுந்துள்ளது. இடைத்தேர்தல் பிரசார மேடைகளில் கூட்டணி கட்சித் தலைவர்களுக்கு எந்த அளவுக்கு முக்கியத்துவம் வழங்கப்படுகிறது என்பதும் வரும் நாட்களில் தெரியவரும்.