தமிழக அரசியலில் புதிய ஆட்சியை அமைத்துள்ள தமிழக வெற்றிக்கழகம் (தவெக), தனது அரசியல் மற்றும் ஊடக செல்வாக்கை மேலும் வலுப்படுத்தும் முயற்சியில் இறங்கியுள்ளது. அதன்படி, தவெக-விற்கென தனி தொலைக்காட்சி சேனல் தொடங்கும் திட்டம் குறித்து முதல்வர் விஜய் தீவிர ஆலோசனையில் ஈடுபட்டுள்ளதாக தகவல்கள் வெளியாகியுள்ளன.

தமிழகத்தில் முக்கிய அரசியல் கட்சிகள் பலவும் தங்களுக்கென ஊடக தளங்களை உருவாக்கி, கட்சியின் கொள்கைகள் மற்றும் அரசியல் நிலைப்பாடுகளை மக்களிடம் கொண்டு சேர்த்து வருகின்றன. அதேபோன்று, தற்போது ஆட்சியில் இருக்கும் தவெகவும் தனது சொந்த ஊடக பலத்தை உருவாக்க விரும்புவதாக அரசியல் வட்டாரங்கள் தெரிவிக்கின்றன.

டி.வி சேனல் தொடங்குவதற்கான சட்ட மற்றும் தொழில்நுட்ப நடைமுறைகள் குறித்து ஆய்வு செய்யும் பொறுப்பு, கட்சியின் தேர்தல் பிரச்சார மேலாண்மை பொதுச்செயலாளரும் அமைச்சருமான ஆதவ் அர்ஜுனாவிடம் ஒப்படைக்கப்பட்டுள்ளதாக கூறப்படுகிறது. மத்திய தகவல் மற்றும் ஒளிபரப்பு அமைச்சக அனுமதி, செயற்கைக்கோள் உரிமம், தொழில்நுட்ப கட்டமைப்பு உள்ளிட்ட அம்சங்கள் குறித்து அவர் ஆலோசித்து வருவதாக தகவல்கள் தெரிவிக்கின்றன.

தற்போது புதிய அரசு தனது முதல் பட்ஜெட் கூட்டத்தொடருக்கான பணிகளில் முழு கவனம் செலுத்தி வருகிறது. இதனால், பட்ஜெட் கூட்டத்தொடர் நிறைவடைந்த பிறகே டி.வி சேனல் அமைப்பதற்கான அதிகாரப்பூர்வ பணிகள் தொடங்கும் என்று தவெக நிர்வாகிகள் கூறுகின்றனர்.

இந்த புதிய சேனல் முழுக்க முழுக்க செய்திச் சேனலாக செயல்படுமா அல்லது பொழுதுபோக்கு நிகழ்ச்சிகளும் இடம்பெறுமா என்பது குறித்து அரசியல் வட்டாரங்களில் பல்வேறு விவாதங்கள் நடைபெற்று வருகின்றன.

கட்சியின் கொள்கைகளை மக்களிடம் நேரடியாக கொண்டு சேர்ப்பது, அரசின் சாதனைகளை விளக்குவது, எதிர்க்கட்சிகளின் விமர்சனங்களுக்கு உடனடி பதில் அளிப்பது போன்ற நோக்கங்களுடன் இந்த சேனல் உருவாக்கப்படலாம் என கூறப்படுகிறது.

சினிமாவில் இருந்து அரசியலுக்கு வந்து குறுகிய காலத்திலேயே ஆட்சியை பிடித்த விஜய், தற்போது ஊடக துறையிலும் தனது ஆதிக்கத்தை விரிவுபடுத்த முயற்சி செய்து வருவதாக அரசியல் விமர்சகர்கள் மதிப்பிடுகின்றனர்.

பட்ஜெட் கூட்டத்தொடர் முடிந்த பின், சேனல் பெயர், லோகோ மற்றும் அதிகாரப்பூர்வ அறிவிப்பு போன்றவை வெளியாகலாம் என்ற எதிர்பார்ப்பும் அரசியல் வட்டாரங்களில் நிலவி வருகிறது.