மதுரை அரசு சட்டக்கல்லூரி பட்டமளிப்பு விழாவில் மின்துறை அமைச்சர் நிர்மல் குமார் பங்கேற்றபோதே மின்வெட்டு ஏற்பட்ட சம்பவம் பெரும் பரபரப்பை ஏற்படுத்திய நிலையில், இந்த விவகாரத்தில் அரசு மற்றும் மின்வாரியம் அளித்த முரண்பாடான விளக்கங்களைக் கடுமையாக விமர்சித்து முன்னாள் அமைச்சர் செந்தில் பாலாஜி தனது ‘எக்ஸ்’ (X) சமூக வலைத்தளப் பக்கத்தில் காரசாரமான பதிவொன்றை வெளியிட்டுள்ளார்.

முரண்பாடான விளக்கங்கள்:

நிகழ்ச்சியில் மின்சாரம் துண்டிக்கப்பட்டது குறித்துக் கருத்து தெரிவித்த செந்தில் பாலாஜி, விழா அரங்கில் மின்சாரம் போனதை விட, அதற்குப் பிறகு அரசுத் தரப்பில் இருந்து வந்த முரண்பாடான விளக்கங்கள்தான் மின்சாரத் துறையின் மின் இணைப்பையே (பியூஸ்) முற்றிலும் தூக்கிவிட்டதாகக் கிண்டல் செய்துள்ளார். சட்டக்கல்லூரி விழா முற்றிலும் ஜெனரேட்டரில்தான் நடைபெற்றது என்றும், அந்த ஜெனரேட்டரில் ஏற்பட்ட எதிர்பாராத தொழில்நுட்பக் கோளாறே நிகழ்வுத் தடங்கலுக்குக் காரணம் என்றும் மின்துறை அமைச்சர் நிர்மல் குமார் விளக்கமளித்திருந்தார். ஆனால், மற்றொருபுறம் மின்வாரியத்தின் தரப்பில் இருந்து வெளியிடப்பட்ட பதிவில், அது மின்சாரத் தடை (Power Cut) எனக் குறிப்பிடப்பட்டிருந்தது.

செந்தில் பாலாஜியின் கூர்மையான கேள்விகள்:

இந்த இருவேறு முரண்பாடான விளக்கங்களைச் சுட்டிக்காட்டி நையாண்டி செய்துள்ள செந்தில் பாலாஜி, "வராத மின்சாரத்துக்கு விளக்கம் மட்டும் இரண்டு Phase-ல் வருகிறது!" என்று சாடியுள்ளார். மேலும், "விழா ஜெனரேட்டரில்தான் நடைபெற்றது என்றால், அதற்கு மின்வாரியம் ஏன் அவசரமாக விளக்கம் அளிக்க வேண்டும்? ஒருவேளை மின்வாரியம் அளித்த விளக்கம் உண்மை என்றால், அமைச்சர் கூறிய ஜெனரேட்டர் கதை என்ன ஆனது?" என்றும் அடுக்கடுக்கான கேள்விகளை எழுப்பியுள்ளார்.

நீக்கப்பட்ட பதிவு & அரசியல் விமர்சனம்:

இதனிடையே, முரண்பாடு வெளிச்சத்திற்கு வந்ததைத் தொடர்ந்து மின்வாரியத்தின் அதிகாரப்பூர்வ சமூக வலைத்தளப் பதிவு நீக்கப்பட்டதாகக் கூறப்படும் தகவலையும் அவர் சுட்டிக்காட்டியுள்ளார். "நிகழ்ச்சியில் மின்சாரம் போனதற்கான உண்மையான காரணத்தைக் கண்டுபிடிக்க முடியாவிட்டாலும் பரவாயில்லை; ஆனால் மின்வாரியத்தின் அதிகாரப்பூர்வ பதிவு எங்கே, எப்படிப் போனது என்பதையாவது அரசு கண்டுபிடித்து மக்களுக்குச் சொல்ல வேண்டும்" எனச் செந்தில் பாலாஜி கடுமையாக விமர்சித்துள்ளார்.