எதிர்க்கட்சியினரின் கருத்துக்கு கைது பதிலாக இருப்பது ஜனநாயகத்துக்கு நல்ல முன்னுதாரணம் அல்ல; சட்டத்தின் நடுநிலைத்தன்மை குறித்து மக்களிடையே சந்தேகம் எழுகிறது என்று தே.மு.தி.க. பொதுச்செயலாளர் பிரேமலதா விஜயகாந்த் தெரிவித்துள்ளார்.இதுதொடர்பாக அவர் வெளியிட்டுள்ள விரிவான அறிக்கையில் தெரிவித்ததாவது,"சட்டமன்ற எதிர்க்கட்சித் தலைவராக உள்ள உதயநிதி ஸ்டாலின், பொதுக்கூட்டத்தில் தெரிவித்த கருத்துகளைத் தொடர்ந்து கைது செய்யப்பட்டிருப்பது தமிழக அரசியல் சூழலில் புதிய விவாதத்தை ஏற்படுத்தியுள்ளது.

கருத்து வேறுபாடுகளை ஜனநாயக ரீதியாக எதிர்கொள்ள வேண்டிய நிலையில், கைது நடவடிக்கைகள் மூலம் பதிலளிப்பது ஜனநாயகத்தின் அடிப்படை விழுமியங்களுக்கு ஏற்புடையதாக இல்லை.ஒரு ஜனநாயக நாட்டில் ஆளுங்கட்சி, எதிர்க்கட்சி என்ற பாகுபாடின்றி அனைவருக்கும் தங்களது அரசியல் கருத்துகளை வெளிப்படுத்தும் உரிமை உள்ளது.

அந்த உரிமை இந்திய அரசியலமைப்புச் சட்டத்தால் பாதுகாக்கப்படும் அடிப்படை உரிமைகளில் ஒன்றாகும். கருத்துகளுக்கு மாற்றுக் கருத்துகளால் பதிலளிப்பதே ஜனநாயகத்தின் உண்மையான பண்பாகும். கருத்துகளை ஒடுக்குவதற்காக கைது நடவடிக்கைகளை பயன்படுத்துவது ஆரோக்கியமான அரசியல் கலாசாரத்திற்கு உகந்ததல்ல.வரலாற்றைப் பார்க்கும்போது, மக்களின் குரலை அடக்குவதற்காக காலனித்துவ ஆட்சியாளர்கள் பல்வேறு கடுமையான சட்டங்களை பயன்படுத்தினர்.

சுதந்திர இந்தியாவிலும் கருத்துகளை வெளிப்படுத்தியதற்காக கைது நடவடிக்கைகள் மேற்கொள்ளப்படுவது ஜனநாயகத்தின் மீதான மக்களின் நம்பிக்கையை பாதிக்கும் சூழலை உருவாக்கும்.இன்றைய அரசியல் சூழலில் ஆளுங்கட்சியைச் சேர்ந்த தலைவர்கள், அமைச்சர்கள் மற்றும் முதல்-அமைச்சர் உள்ளிட்டோர் பல்வேறு மேடைகளில் தங்களது அரசியல் நிலைப்பாடுகளை எந்தத் தடையும் இன்றி வெளிப்படுத்தி வருகின்றனர்.

அதே உரிமை எதிர்க்கட்சித் தலைவர்களுக்கும் வழங்கப்பட வேண்டும். கருத்து தெரிவித்ததற்காக மட்டும் கைது செய்வது, ஜனநாயக உரிமைகளை சுருக்கும் நடவடிக்கையாகவே பார்க்கப்படுகிறது.அண்மையில் ராணிப்பேட்டையில் செய்தியாளர்கள் மீது த.வெ.க. நிர்வாகிகள் தாக்குதல் நடத்தியதாக வெளியான சம்பவத்தில் இதுவரை உரிய சட்ட நடவடிக்கைகள் எடுக்கப்படவில்லை என்ற குற்றச்சாட்டுகள் தொடர்ந்து முன்வைக்கப்பட்டு வருகின்றன.

அந்த விவகாரத்தில் விரைவான நடவடிக்கை எடுக்கப்படாத நிலையில், எதிர்க்கட்சியினர் கருத்து தெரிவித்த உடனேயே கைது நடவடிக்கைகள் மேற்கொள்ளப்படுவது சட்டம் அனைவருக்கும் சமமாக அமல்படுத்தப்படுகிறதா என்ற நியாயமான கேள்வியை மக்களிடையே எழச் செய்கிறது.

மேலும், நாளை தமிழக சட்டப்பேரவையின் பட்ஜெட் கூட்டத்தொடர் தொடங்கவுள்ள முக்கியமான அரசியல் சூழலில், எதிர்க்கட்சித் தலைவரை கைது செய்திருப்பது தேவையற்ற பதற்றத்தை உருவாக்கும் நடவடிக்கையாகவே பார்க்கப்படுகிறது. கருத்து வேறுபாடுகளை அரசியல் ரீதியாகவும், சட்டரீதியாகவும் எதிர்கொள்வதற்குப் பதிலாக கைது நடவடிக்கைகளை கையாள்வது ஜனநாயக உணர்வுக்கும் அரசியல் நாகரிகத்திற்கும் பொருந்தாது.

எனவே, ஜனநாயக மரபுகள் மற்றும் கருத்துச் சுதந்திரத்தின் மாண்பை மதித்து, அரசியல் கருத்து வேறுபாடுகளை அடக்குமுறை நடவடிக்கைகளால் அல்லாமல், ஜனநாயக வழிமுறைகளின் மூலம் கையாள வேண்டும். சட்டம் ஆளுங்கட்சி, எதிர்க்கட்சி என்ற வேறுபாடின்றி அனைவருக்கும் சமமாக அமல்படுத்தப்பட வேண்டும் என்பதே தமிழக மக்களின் எதிர்பார்ப்பாகும்.

அரசியல் கருத்துகளை வெளிப்படுத்துவது குற்றமாகக் கருதப்படக் கூடாது; ஜனநாயகத்தின் அடிப்படை மதிப்புகளை பாதுகாப்பதே எந்த அரசின் முதன்மை பொறுப்பாக இருக்க வேண்டும் என்று பிரேமலதா விஜயகாந்த் தனது அறிக்கையில் வலியுறுத்தியுள்ளார்.