நாட்டின் பல்வேறு துறைகளில் நிலவி வரும் சிக்கல்களுக்கு எந்தச் சரியான தீர்வையும் முன்வைக்கவில்லை என்று காங்கிரஸ் தலைவர் மல்லிகார்ஜூன கார்கே கடுமையாக விமர்சித்துள்ளார்.

இதுகுறித்து அவர் தனது ‘எக்ஸ்’ தளத்தில் வெளியிட்ட பதிவில், மோடி அரசின் பொருளாதாரக் கண்ணோட்டமே திசைதிரிந்துவிட்டதாக சாடியுள்ளார்.“மோடி அரசிடம் புதுமையான யோசனைகள் தீர்ந்து விட்டன. 2026 பட்ஜெட் இந்தியாவின் பொருளாதார, சமூக, அரசியல் சவால்களுக்கு எந்த பதிலும் தரவில்லை.

‘திட்டமிட்ட செயல்பாடு’ என்ற பாதை இப்போது ‘சவாலான தடம்’ ஆக மாறியுள்ளது. ‘சீர்திருத்த வேக ரயில்’ ஓடுகிறது என்று சொன்னாலும், எந்த சீர்திருத்த நிலையிலும் அது நிற்கவில்லை. இறுதியில் கொள்கை தெளிவும் இல்லை, அரசியல் உறுதியும் இல்லை,” என அவர் குறிப்பிட்டுள்ளார்.

மேலும், விவசாயிகள் இன்னும் உறுதியான வருமானப் பாதுகாப்பு திட்டத்திற்காக காத்திருக்கிறார்கள் என்றும், சமூக சமத்துவமின்மை வரலாற்றிலேயே இல்லாத அளவுக்கு அதிகரித்துள்ளது என்றும் கார்கே சுட்டிக்காட்டினார்.

பட்டியல் சாதி, பழங்குடியினர், பிற்படுத்தப்பட்டோர், சிறுபான்மையினர் ஆகியோருக்கான நலத்திட்டங்களில் குறிப்பிடத்தக்க முன்னேற்றமே இல்லை என்றும், மாநிலங்களுக்கு நிவாரணம் வழங்க வேண்டிய நிதி ஆணைய பரிந்துரைகளும் செயல்படுத்தப்படவில்லை என்றும் அவர் கூறினார்.

“கூட்டாட்சித் தத்துவமே பாதிக்கப்பட்டுள்ளது,” என அவர் குற்றம் சாட்டினார்.பட்ஜெட்டில் இடம்பெற வேண்டிய அம்சங்களையும் அவர் பட்டியலிட்டார். உற்பத்தித் துறைக்கு புத்துயிர் அளிக்கும் திட்டங்கள் இல்லை; ‘மேக் இன் இந்தியா’ வெறும் கோஷமாகவே உள்ளது. இளைஞர்களுக்கான வேலைவாய்ப்பு மற்றும் பெண்களின் பணியிட பங்கேற்பை அதிகரிக்கும் உறுதியான முயற்சிகள் எதுவும் தெரியவில்லை.

ஏற்றுமதி சரிவு, வர்த்தக பற்றாக்குறை, ரூபாய் மதிப்பு வீழ்ச்சி போன்ற பொருளாதார சிக்கல்களுக்கு பதில் இல்லை. பணவீக்கத்தால் சிரமப்படும் நடுத்தர மற்றும் ஏழை மக்களுக்கு நிவாரணம் இல்லை; சேமிப்பு குறைந்து கடன் சுமை அதிகரித்துள்ளது. தனியார் முதலீட்டுக்கு நம்பிக்கை தரும் சைகைகள் இல்லை; உள்கட்டமைப்பு வளர்ச்சி வெறும் வாக்குறுதியாகவே உள்ளது.

சமூக பாதுகாப்பு, நலத்திட்டங்கள், ஊரக வேலைவாய்ப்பு திட்டங்களுக்கு கூட புதிய ஒதுக்கீடு அறிவிக்கப்படவில்லை என்றும் அவர் சாடினார்.“இந்த பட்ஜெட் தீர்வுகளை தரவில்லை; முழக்கங்களைக் கூட தராத வெறுமை ஆவணம்,” என்று கார்கே தனது கடும் விமர்சனத்தை பதிவு செய்துள்ளார்.