பிகார் சட்டமன்றத் தேர்தலில் தேசிய ஜனநாயகக் கூட்டணி (NDA) அமோக வெற்றி பெற்றதைத் தொடர்ந்து, அம்மாநில முதலமைச்சர் நிதீஷ் குமார் 10-வது முறையாகப் பதவியேற்கவுள்ள விழாவில் பங்கேற்க அ.தி.மு.க. பொதுச் செயலாளர் எடப்பாடி பழனிசாமிக்கு அழைப்பு விடுக்கப்பட்டுள்ளது.

பா.ஜ.க., ஐக்கிய ஜனதா தளம் (JDU) உள்ளிட்ட கட்சிகள் அடங்கிய தேசிய ஜனநாயகக் கூட்டணி, சமீபத்தில் நடைபெற்ற பிகார் பேரவைத் தேர்தலில் 202 தொகுதிகளில் வெற்றி பெற்று ஆட்சியைத் தக்கவைத்தது.

பதவியேற்பு விழா ஏற்பாடுகள்:

பாட்னாவில் உள்ள காந்தி திடலில் நாளை மறுநாள் நிதீஷ் குமாரின் பதவியேற்பு விழா தடபுடலாக நடைபெற உள்ளது. இதில், பிரதமர் நரேந்திர மோடி, மத்திய உள்துறை அமைச்சர் அமித் ஷா, பா.ஜ.க. தேசியத் தலைவர் ஜெ.பி. நட்டா உட்படப் பல தேசியத் தலைவர்கள் மற்றும் என்.டி.ஏ. கூட்டணி ஆளும் மாநிலங்களின் முதல்வர்களுக்கு அழைப்பு விடுக்கப்பட்டுள்ளது.

அ.தி.மு.க. பொதுச் செயலாளரும், தமிழக முன்னாள் முதல்வருமான எடப்பாடி பழனிசாமிக்கும் இந்த விழாவில் பங்கேற்க அழைப்பு விடுக்கப்பட்டுள்ளது. இந்தப் பதவியேற்பு விழாவில் அவர் பிரதமர் மோடி உள்ளிட்டோரைச் சந்திக்க வாய்ப்புள்ளதாக எதிர்பார்க்கப்படுகிறது.

முக்கிய சந்திப்பு:

இதற்கு ஒரு நாள் முன்னதாக, நாளை (நவ. 19) கோவையில் நடைபெறும் இயற்கை வேளாண்மை மாநாட்டைப் பிரதமர் மோடி தொடங்கி வைக்கிறார். இந்தக் கோவை பயணத்தின்போது, எடப்பாடி பழனிசாமி பிரதமர் மோடியைச் சந்திக்கத் தனியாக நேரம் கேட்டுள்ளதாகவும் தகவல்கள் வெளியாகியுள்ளன. தேசிய அளவிலான தலைவர்களை இந்த இரண்டு நிகழ்வுகளிலும் எடப்பாடி பழனிசாமி சந்திப்பது முக்கியத்துவம் வாய்ந்ததாகக் கருதப்படுகிறது.