மதுரை: பிரதமர் நரேந்திர மோடியின் தமிழ்நாடு வருகை ஒருநாள் தாமதமாக மார்ச் 1ஆம் தேதிக்கு மாற்றப்பட்டுள்ளதாக, தமிழக பாஜக மாநிலத் தலைவர் நயினார் நாகேந்திரன் தெரிவித்துள்ளார். இதன்படி, மார்ச் 1ஆம் தேதி மதுரையில் நடைபெற உள்ள தேசிய ஜனநாயகக் கூட்டணியின் (என்.டி.ஏ) மாபெரும் பொதுக்கூட்டத்திற்கு பிரதமர் மோடி தலைமை தாங்க உள்ளார்.

தமிழக சட்டசபைத் தேர்தல் நெருங்கி வரும் சூழலில், அரசியல் கட்சிகள் கூட்டணி அமைப்பதில் தீவிரமாக ஈடுபட்டு வருகின்றன. அதிமுக தலைமையிலான தேசிய ஜனநாயகக் கூட்டணியில், பாஜக, பாமக, அமமுக, தமாகா, ஐஜேகே, தமமுக உள்ளிட்ட கட்சிகள் இடம்பெற்றுள்ளன. இந்த கூட்டணியின் தேர்தல் பரப்புரையை வலுப்படுத்தும் நோக்கில், பிரதமர் மோடியின் தொடர் தமிழ்நாடு வருகைகள் முக்கியத்துவம் பெற்றுள்ளன.

இதற்கு முன்பு, என்.டி.ஏ கூட்டணி சார்பில் கடந்த ஜனவரி 23ஆம் தேதி செங்கல்பட்டு மாவட்டம் மதுராந்தகத்தில் நடைபெற்ற பொதுக்கூட்டத்தில் பிரதமர் மோடி கலந்து கொண்டு, தேர்தல் பிரசாரத்தை தொடங்கி வைத்தார். அந்த நிகழ்ச்சியில், அதிமுக பொதுச்செயலாளரும், தமிழக எதிர்க்கட்சித் தலைவருமான எடப்பாடி பழனிசாமி உள்ளிட்ட கூட்டணிக் கட்சிகளின் தலைவர்கள் கலந்து கொண்டனர்.

அதனைத் தொடர்ந்து, பிரதமர் மோடி பிப்ரவரி 28ஆம் தேதி மீண்டும் தமிழ்நாடு வருவார் என முதலில் அறிவிக்கப்பட்டிருந்தது. மதுரை மண்டேலா நகரில் நடைபெற உள்ள தேசிய ஜனநாயகக் கூட்டணியின் தேர்தல் பிரசார பொதுக்கூட்டத்தில் அவர் பங்கேற்க உள்ளதாகவும், திருப்பரங்குன்றம் கோவிலில் சாமி தரிசனம் செய்ய உள்ளதாகவும் தகவல்கள் வெளியாகியிருந்தன.

இந்நிலையில், பிரதமர் மோடியின் பயணத் திட்டத்தில் மாற்றம் செய்யப்பட்டுள்ளதாக பாஜக தரப்பில் அறிவிக்கப்பட்டுள்ளது. இதன்படி, பிப்ரவரி 28க்கு பதிலாக, மார்ச் 1ஆம் தேதி (ஞாயிற்றுக்கிழமை) பிரதமர் மோடி மதுரை வருகை தர உள்ளார். இந்த மாற்றத்தை தமிழக பாஜக தலைவர் நயினார் நாகேந்திரன் அதிகாரப்பூர்வமாக உறுதிப்படுத்தியுள்ளார்.

நெல்லையில் செய்தியாளர்களை சந்தித்து பேசிய நயினார் நாகேந்திரன், “ஒரு நாள் தாமதமாக மார்ச் 1ஆம் தேதி பிரதமர் மோடி மதுரை வரவுள்ளார். மதுரையில் நடைபெறும் தேசிய ஜனநாயகக் கூட்டணியின் பொதுக்கூட்டத்திற்கு அவர் தலைமை தாங்க இருக்கிறார். இந்த பொதுக்கூட்டத்தை திருவிழா போல நடத்த உள்ளோம். கூட்டணியைச் சேர்ந்த அனைத்து கட்சி தலைவர்களும் இதில் பங்கேற்பார்கள்” என்று தெரிவித்துள்ளார்.

பிரதமர் மோடியின் இந்த மதுரை பொதுக்கூட்டம், என்.டி.ஏ கூட்டணியின் தேர்தல் வியூகங்களில் முக்கியமான திருப்பமாக பார்க்கப்படுகிறது. தென் தமிழகத்தில் அரசியல் சூட்டை மேலும் அதிகரிக்கும் இந்த நிகழ்வை, கூட்டணி கட்சிகள் பெரும் எதிர்பார்ப்புடன் எதிர்நோக்கி வருகின்றன.