தமிழக அரசியல் களம் மீண்டும் தேர்தல் காய்ச்சலில் கொதிக்கத் தொடங்கியுள்ளது. விரைவில் நடைபெற உள்ள சட்டமன்றத் தேர்தலை முன்னிட்டு, முக்கிய அரசியல் கட்சிகள் கூட்டணி கணக்குப் போடுதல், தேர்தல் அறிக்கை தயாரித்தல், வேட்பாளர் தேர்வுக்கான விருப்ப மனுக்கள் பெறுதல் என முழு வீச்சில் களமிறங்கி உள்ளன.

ஒவ்வொரு கட்சியும் தங்களின் அடுத்த நகர்வை திட்டமிட்டு, அரசியல் சதுரங்கத்தில் சாமர்த்தியமாக காய்களை நகர்த்திக் கொண்டிருக்கிறது.

இந்த சூழலில், சென்னை மீனம்பாக்கம் விமான நிலையத்தில் மதுரைக்குப் புறப்படத் தயாராக இருந்த முன்னாள் முதலமைச்சர் ஓ.பன்னீர்செல்வம் நிருபர்களை சந்தித்தார்.

தேர்தல் குறித்த கேள்விக்கு பதிலளித்த அவர், “தை மாதம் முடிவடைய இன்னும் ஒன்பது நாட்கள் உள்ளன… தேர்தலுக்கு இன்னும் மூன்று மாத கால அவகாசம் இருக்கிறது,” என சுருக்கமாக தெரிவித்தார்.

அதைத் தொடர்ந்து, “ஓ.பி.எஸ். தனிக்கட்சி தொடங்கப் போகிறாரா? தி.மு.க. அல்லது த.வெ.க.வில் இணைவாரா?” என்ற கேள்விகள் மழையாக விழுந்தன.

அதற்கு சிரித்தபடி, “எந்த ஓ.பி.எஸ்.?” என்று எதிர்கேள்வி எழுப்பி, எந்த விளக்கமும் தராமல் அங்கிருந்து நகர்ந்தார். அவரது இந்த புதிரான பதில், அரசியல் வட்டாரங்களில் புதிய யூகங்களையும் பரபரப்பையும் கிளப்பியுள்ளது.