இயக்குநர் எச். வினோத் இயக்கத்தில், நடிகர் விஜய் மற்றும் நடிகை பூஜா ஹெக்டே நடிப்பில் உருவாகியுள்ள ஜன நாயகன் திரைப்படத்தின் வெளியீட்டு தேதி குறித்த புதிய தகவல் தற்போது சினிமா வட்டாரங்களில் பரபரப்பை ஏற்படுத்தியுள்ளது.

கோலிவுட் திரையுலகின் முன்னணி நட்சத்திரமாக நீண்ட காலமாக ரசிகர்களை கவர்ந்து வந்த விஜய், தற்போது முழுமையாக அரசியல் பாதையில் கவனம் செலுத்தி வருகிறார். இதன் காரணமாக, அவரது நடிப்பில் வெளியாகவுள்ள ‘ஜன நாயகன்’ திரைப்படமே தனது கடைசி படம் என்று அவர் அதிகாரப்பூர்வமாக அறிவித்திருந்தார். இதனால், இந்த படத்திற்கான எதிர்பார்ப்பு ரசிகர்களிடையே பல மடங்கு அதிகரித்துள்ளது.

கே.வி.என். புரொடக்ஷன்ஸ் தயாரிப்பில் உருவாகியுள்ள இந்தப் படத்தில், விஜயுடன் இணைந்து மமிதா பைஜூ, பாபி தியோல், நரேன் உள்ளிட்ட பல பிரபல நடிகர்கள் நடித்துள்ளனர். பெண் பாதுகாப்பு மற்றும் அரசியல் பின்னணியை மையமாகக் கொண்டு உருவாக்கப்பட்டுள்ள இந்த திரைப்படத்திற்கு அனிருத் ரவிச்சந்தர் இசையமைத்துள்ளார். அனிருத்தின் இசையில் வெளியான பாடல்கள் ஏற்கனவே ரசிகர்களிடையே நல்ல வரவேற்பைப் பெற்றுள்ளன.

முதலில், ‘ஜன நாயகன்’ திரைப்படத்தை 2026 ஆம் ஆண்டு ஜனவரி 9ஆம் தேதி திரையரங்குகளில் வெளியிட தயாரிப்பு நிறுவனம் திட்டமிட்டிருந்தது. ஆனால், எதிர்பாராத வகையில் ஏற்பட்ட சென்சார் தொடர்பான பிரச்னைகள் காரணமாக அந்த ரிலீஸ் தேதி தள்ளிப்போனது. இந்த விவகாரம் தொடர்பான வழக்கு இன்னும் முழுமையாக முடிவுக்கு வராத நிலையில், படக்குழு அந்த வழக்கை வாபஸ் பெறலாம் என்ற தகவல்களும் சமீபத்தில் வெளியாகின. இதனால், படத்தின் வெளியீடு எப்போது என்ற கேள்வி ரசிகர்களிடையே அதிகமாக பேசப்பட்டது.

இந்த நிலையில், லண்டனை தலைமையிடமாகக் கொண்ட “Cineworld” என்ற வெளிநாட்டு டிக்கெட் விநியோக நிறுவனம், ‘ஜன நாயகன்’ திரைப்படம் பிப்ரவரி 20ஆம் தேதி வெளியாகும் என அறிவித்துள்ளது. இந்த தகவல் சமூக வலைதளங்களில் வேகமாக பரவி, தளபதி ரசிகர்களிடையே பெரும் உற்சாகத்தை ஏற்படுத்தியுள்ளது. அதே நாளில், சிவகார்த்திகேயன் தயாரித்துள்ள ‘தாய்க்கிழவி’ திரைப்படமும் வெளியாக உள்ளதாக கூறப்படுவது குறிப்பிடத்தக்கது.

ஆனால், இந்த புதிய ரிலீஸ் தேதி குறித்து ‘ஜன நாயகன்’ படக்குழு தரப்பில் இதுவரை அதிகாரப்பூர்வ அறிவிப்பு எதுவும் வெளியாகவில்லை. இதனால், இந்த தகவல் உண்மையாவதாக மாற வேண்டும் என்ற நம்பிக்கையுடன் ரசிகர்கள் சமூக வலைதளங்களில் தங்களது கருத்துகளை பகிர்ந்து வருகின்றனர்.

விரைவில் படத்தின் சரியான வெளியீட்டு தேதி குறித்து அதிகாரப்பூர்வ அறிவிப்பு வெளியாகும் என்ற எதிர்பார்ப்புடன், ஒட்டுமொத்த தளபதி ரசிகர்களும் ஆவலுடன் காத்திருக்கின்றனர்.