தமிழக சட்டமன்றத்தின் நடப்பு கூட்டத்தொடர் வரும் 8-ஆம் தேதியுடன் நிறைவடைய உள்ள நிலையில், அதனைத் தொடர்ந்து அமைச்சரவையில் மிகப்பெரிய அளவில் மாற்றங்களை மேற்கொள்ள முதல்வர் விஜய் திட்டமிட்டு வருவதாக தலைமைச் செயலக வட்டாரங்கள் தெரிவிக்கின்றன. சில அமைச்சர்களின் செயல்பாடுகள் எதிர்பார்த்த அளவில் இல்லாததால், அவர்களிடம் இருந்து முக்கிய துறைகளை மாற்றுவதுடன், சிலரை அமைச்சரவையில் இருந்தே நீக்கிவிட்டு புதிய முகங்களுக்கு வாய்ப்பளிப்பது குறித்தும் ஆலோசனைகள் நடைபெற்று வருவதாகக் கூறப்படுகிறது.

கடந்த சில மாதங்களாகவே அமைச்சர்களின் செயல்பாடுகள் குறித்து தலைமை தரப்பில் விரிவான ஆய்வுகள் மேற்கொள்ளப்பட்டதாகத் தெரிகிறது. நிர்வாகத் திறனில் பின்தங்கியவர்கள், தொடர்ந்து சர்ச்சைகளில் சிக்குபவர்கள் மற்றும் மக்கள் மத்தியில் அதிருப்தியை எதிர்கொள்பவர்கள் குறித்து தனிப்பட்ட முறையில் கவனம் செலுத்தப்பட்டதாகவும் தகவல்கள் தெரிவிக்கின்றன. இதன் தொடர்ச்சியாக, சட்டமன்றக் கூட்டத்தொடர் நிறைவடைந்த உடனேயே புதிய அமைச்சர்கள் பதவியேற்பு மற்றும் இலாகா மாற்றங்கள் தொடர்பான அறிவிப்புகள் வெளியாகலாம் என அரசியல் வட்டாரங்களில் எதிர்பார்ப்பு நிலவுகிறது.

தமிழகத்தின் பொருளாதார வளர்ச்சி மற்றும் தொழில் முதலீடுகளை ஈர்ப்பதில் முக்கிய பங்கு வகிக்கும் தொழில்துறை அமைச்சரவையில் முக்கியமான துறையாக பார்க்கப்படுகிறது. தற்போது இத்துறையைக் கவனித்து வரும் அமைச்சர் கீர்த்தனாவின் செயல்பாடுகள் எதிர்பார்த்த அளவில் இல்லை என்ற விமர்சனங்கள் ஆளுங்கட்சி வட்டாரத்திலேயே எழுந்துள்ளதாக கூறப்படுகிறது. இதனால், தொழில்துறையை மேலும் வேகமாகவும் செயல்திறனுடனும் முன்னெடுக்க, அந்தத் துறையை முக்கிய நிர்வாகியான ஆதவ் அர்ஜுனாவிடம் ஒப்படைப்பது குறித்து ஆலோசிக்கப்பட்டு வருவதாக தகவல் வெளியாகியுள்ளது. அதேநேரத்தில், கீர்த்தனாவுக்கு மனிதவள மேம்பாட்டுத் துறை வழங்கப்படலாம் என்றும் கூறப்படுகிறது.

முன்னாள் அதிமுக ஆட்சிக் காலத்தில் பள்ளிக்கல்வித் துறை அமைச்சராகப் பணியாற்றிய அனுபவம் தற்போதைய வருவாய்த்துறை அமைச்சர் செங்கோட்டையனுக்கு உள்ளது. பள்ளிக்கல்வித் துறையில் நிர்வாக ரீதியாக பல்வேறு முன்னெடுப்புகளை மேற்கொண்ட அனுபவம் அவருக்கு இருப்பதால், அந்தத் துறையை மீண்டும் அவரிடம் ஒப்படைப்பது குறித்து ஆலோசனை நடைபெற்று வருவதாகத் தெரிகிறது.

தற்போது செய்தி மற்றும் விளம்பரம், தமிழ் வளர்ச்சி, செய்தித் தொடர்பு மற்றும் திரைப்படத் துறை உள்ளிட்ட பல்வேறு பொறுப்புகளை அமைச்சர் ராஜ்மோகன் கவனித்து வருகிறார். அவரது பணிச்சுமையைக் குறைக்கும் வகையில், பள்ளிக்கல்வித் துறையை மட்டும் பிரித்து செங்கோட்டையனிடம் வழங்கும் திட்டம் பரிசீலனையில் இருப்பதாக கூறப்படுகிறது. அதேவேளையில், ராஜ்மோகனுக்கு வேறு சில முக்கியமான துறைகள் கூடுதலாக வழங்கப்படலாம் என்றும் தகவல்கள் தெரிவிக்கின்றன.

கூட்டணிக் கட்சியான காங்கிரஸைச் சேர்ந்த அமைச்சர் விஸ்வநாதனிடம் தற்போது உள்ள உயர்கல்வித் துறையிலும் மாற்றம் வர வாய்ப்புள்ளதாக கூறப்படுகிறது. அதேபோல், சுற்றுலாத்துறை அமைச்சராக உள்ள காங்கிரஸ் நிர்வாகி ராஜேஷுக்கு கூடுதலாக சில முக்கிய துறைகள் வழங்கப்படலாம் என்ற தகவலும் அரசியல் வட்டாரங்களில் பரவி வருகிறது.

கனிமவளத் துறை அமைச்சர் பிரபுவின் இலாகாவிலும் மாற்றம் ஏற்படலாம் என்றும், அவருக்கு ஆவின் மற்றும் பால்வள மேம்பாட்டுத் துறை வழங்கப்படலாம் என்றும் கூறப்படுகிறது. இதேபோல், மீன்வளம் மற்றும் கைத்தறித் துறைகளுக்கு இடையேயும் இலாகா மாற்றம் செய்யப்பட வாய்ப்புள்ளதாக தகவல்கள் வெளியாகியுள்ளன. அதன்படி, அமைச்சர் விஜய் பாலாஜி கவனித்து வரும் மீன்வளத்துறையும், அமைச்சர் ஸ்ரீநாத் கவனித்து வரும் கைத்தறித்துறையும் பரஸ்பரம் மாற்றப்படலாம் என தலைமைச் செயலக வட்டாரங்கள் தெரிவிக்கின்றன.

இதற்கிடையே, பொதுவெளியில் அடிக்கடி பேசுவதன் மூலம் தேவையற்ற சர்ச்சைகளில் சிக்கி அரசுக்கு நெருக்கடியை ஏற்படுத்தியதாகக் கூறப்படும் போக்குவரத்துத் துறை அமைச்சர் விஜய் பார்த்திபன் மீதும் தலைமை அதிருப்தியில் இருப்பதாக தகவல்கள் தெரிவிக்கின்றன. இதனால், அவரிடமிருந்து போக்குவரத்துத் துறை பறிக்கப்பட்டு, அதற்குப் பதிலாக கூட்டுறவுத் துறை வழங்கப்படலாம் என்ற பேச்சும் எழுந்துள்ளது.

அனைத்துக்கும் மேலாக, போதைப்பொருள் விவகாரம் மற்றும் சட்டவிரோதப் புகார்கள் தொடர்பாக சட்டமன்றத்திலும் மக்கள் மத்தியிலும் எதிர்க்கட்சிகளின் கடுமையான விமர்சனங்களை எதிர்கொண்ட அமைச்சர் 'கில்லி' சரத்குமார் அமைச்சரவையில் இருந்து நீக்கப்படலாம் என்ற தகவலும் வெளியாகியுள்ளது. அவரது செயல்பாடுகள் குறித்து தலைமை தரப்பில் அதிருப்தி நிலவுவதாகவும், இந்த முறை அமைச்சரவை மாற்றத்தில் அவருக்கு இடம் கிடைக்காமல் போக அதிக வாய்ப்புள்ளதாகவும் அரசியல் வட்டாரங்கள் கூறுகின்றன.

மொத்தத்தில், சட்டமன்றக் கூட்டத்தொடர் நிறைவடைந்ததும் தமிழக அமைச்சரவையில் பல்வேறு மாற்றங்கள் நிகழலாம் என்ற எதிர்பார்ப்பு ஏற்பட்டுள்ளது. செயல்திறன் மிக்க புதியவர்களுக்கு வாய்ப்பு அளிப்பது, முக்கிய துறைகளின் நிர்வாகத்தை வேகப்படுத்துவது மற்றும் மக்கள் மத்தியில் அரசின் மீதான நம்பிக்கையை வலுப்படுத்துவது ஆகியவற்றை மையமாகக் கொண்டு இந்த மறுசீரமைப்பு மேற்கொள்ளப்படலாம் என அரசியல் நோக்கர்கள் கருதுகின்றனர். இறுதியாக எந்தெந்த அமைச்சர்களின் இலாகாக்கள் மாற்றப்படுகின்றன, யாருக்கு புதிய பொறுப்புகள் வழங்கப்படுகின்றன என்பது தொடர்பான தெளிவு கூட்டத்தொடர் நிறைவுக்குப் பிறகே கிடைக்கும் என எதிர்பார்க்கப்படுகிறது.