தமிழக அரசியல் களம் தற்போது முழுமையாக இடைத்தேர்தல் மோடிற்குள் நகர்ந்துள்ள நிலையில், தேர்தல் முடிவடைந்ததும் தமிழக அமைச்சரவையில் பெரிய அளவிலான மாற்றங்கள் மேற்கொள்ளப்படலாம் என்ற தகவல் கோட்டை வட்டாரங்களில் பரபரப்பாக பேசப்பட்டு வருகிறது. குறிப்பாக அதிமுகவில் இருந்து விலகி தமிழக வெற்றிக் கழகத்தில் இணைந்துள்ள மூத்த தலைவர்கள் இடைத்தேர்தலில் வெற்றி பெற்றால், அவர்களுக்கு முக்கிய அமைச்சர் பதவிகள் வழங்கப்படலாம் என்று எதிர்பார்க்கப்படுகிறது.

அதிமுகவில் இருந்து மூத்த தலைவர்கள் அடுத்தடுத்து தமிழக வெற்றிக் கழகத்தை நோக்கி நகர்வது தமிழக அரசியலில் மிகப்பெரிய பேசுபொருளாக மாறியுள்ளது. அதிமுகவை சேர்ந்த சி.விஜயபாஸ்கர், எம்.ஆர்.விஜயபாஸ்கர், மரகதம் குமாரவேல், எஸ்.ஜெயகுமார், பி.சத்யபாமா மற்றும் இசக்கி சுப்பையா ஆகிய ஆறு எம்.எல்.ஏக்கள் தங்களது சட்டமன்ற உறுப்பினர் பதவிகளை அடுத்தடுத்து ராஜினாமா செய்துவிட்டு, முதலமைச்சர் விஜய்யின் தமிழக வெற்றிக் கழகத்தில் இணைந்துள்ளனர்.

இதில் குறிப்பாக முன்னாள் அமைச்சர்களான சி.விஜயபாஸ்கர் மற்றும் எம்.ஆர்.விஜயபாஸ்கர் ஆகியோரின் வருகை, தற்போதைய தவெக அமைச்சரவைக்குள் ஒரு விதமான பதற்றத்தை ஏற்படுத்தியுள்ளதாக கூறப்படுகிறது. இருவரும் நீண்ட அரசியல் அனுபவம் கொண்டவர்கள் என்பதால், அவர்களின் அடுத்தகட்ட அரசியல் பயணம் சாதாரண எம்.எல்.ஏ பதவியோடு நின்றுவிடாது என்று அரசியல் வட்டாரங்களில் பேசப்படுகிறது.

சட்டமன்ற உறுப்பினர் பதவியை ராஜினாமா செய்துவிட்டு, தங்களது அரசியல் எதிர்காலத்தையே பணயம் வைத்து தமிழக வெற்றிக் கழகத்தில் இணைந்துள்ள இந்த அதிமுக முன்னாள் அமைச்சர்கள், மீண்டும் இடைத்தேர்தலில் போட்டியிட்டு வெற்றி பெற்ற பிறகு சாதாரண எம்.எல்.ஏக்களாக பின்வரிசையில் அமர சம்மதித்திருக்க மாட்டார்கள் என்று கூறப்படுகிறது.

குறிப்பாக இவர்கள் பல ஆண்டுகளாக அமைச்சர்களாக பணியாற்றியவர்கள். அதிகார பலம், மாவட்ட அளவிலான செல்வாக்கு மற்றும் நிர்வாக அனுபவம் ஆகியவற்றை கொண்டவர்கள். ஜெயலலிதா மற்றும் எடப்பாடி பழனிசாமி தலைமையிலான அமைச்சரவைகளில் முக்கிய இலாக்காக்களை கையாண்ட அனுபவமும் இவர்களுக்கு உள்ளது.

இதனால் தமிழக வெற்றிக் கழகத்தில் இணைவதற்கு முன்பே இவர்களுடன் முக்கிய பேச்சுவார்த்தைகள் நடைபெற்றிருக்கலாம் என்றும், இடைத்தேர்தலில் மீண்டும் வெற்றி பெற்றால் அமைச்சரவையில் முக்கிய இடம் வழங்கப்படும் என்ற உத்தரவாதத்தின் அடிப்படையிலேயே கட்சி மாற்றம் நடந்திருக்கலாம் என்றும் அரசியல் வட்டாரங்களில் விவாதங்கள் எழுந்துள்ளன.

விரைவில் நடைபெறவுள்ள இடைத்தேர்தலில் இவர்கள் மீண்டும் களம் கண்டு வெற்றி பெற்றால், அவர்களுக்கு முக்கிய இலாக்காக்கள் ஒதுக்கப்படலாம் என்ற எதிர்பார்ப்பு அதிகரித்துள்ளது. இதன் காரணமாக தற்போதைய அமைச்சரவையில் இருக்கும் சில அமைச்சர்களின் பதவிகள் மற்றும் இலாக்காக்கள் மாற்றப்படலாம் என்றும் கூறப்படுகிறது.

முதலமைச்சர் விஜய் தனது முதல் அமைச்சரவையை அமைத்தபோது இளைஞர்கள் மற்றும் புதுமுகங்களுக்கு அதிக வாய்ப்புகளை வழங்கினார். அரசியலில் புதியவர்கள் மற்றும் முதல் முறையாக சட்டமன்ற உறுப்பினர்களாக தேர்வு செய்யப்பட்ட பலருக்கும் முக்கிய அமைச்சர் பதவிகள் வழங்கப்பட்டன.

தற்போதைய அமைச்சரவையில் கட்சியின் பொதுச்செயலாளர் என்.ஆனந்த் மற்றும் செங்கோட்டையன் போன்ற ஓரிரு மூத்த தலைவர்களை தவிர, பெரும்பாலான அமைச்சர்கள் சட்டமன்ற மற்றும் நிர்வாக அனுபவம் குறைந்தவர்களாகவே இருப்பதாக அரசியல் வட்டாரங்களில் விமர்சனங்கள் முன்வைக்கப்பட்டு வருகின்றன.

அதிலும் சரத் மற்றும் கீர்த்தனா உள்ளிட்ட சில அமைச்சர்கள் தொடர்ச்சியாக சர்ச்சைகளில் சிக்கி வருவதாகவும், அவர்களின் செயல்பாடுகள் முதலமைச்சர் அலுவலகத்தின் கவனத்துக்கு சென்றுள்ளதாகவும் கூறப்படுகிறது.

இந்த சூழலில் சி.விஜயபாஸ்கர் மற்றும் எம்.ஆர்.விஜயபாஸ்கர் போன்ற அனுபவம் வாய்ந்த முன்னாள் அமைச்சர்கள் இடைத்தேர்தலில் வெற்றி பெற்று சட்டமன்றத்துக்குள் வந்தால், அமைச்சரவை மாற்றம் தவிர்க்க முடியாததாக இருக்கும் என்று கோட்டை வட்டாரங்களில் பேசப்படுகிறது.

நிர்வாகத்தை சீர்படுத்துவதற்கும், திமுக போன்ற பலமான எதிர்க்கட்சிகளின் தாக்குதல்களை சட்டமன்றத்தில் எதிர்கொள்வதற்கும் அனுபவம் வாய்ந்த மூத்த தலைவர்கள் தேவை என்று முதலமைச்சர் விஜய் கருதுவதாக கூறப்படுகிறது.

தற்போதைய அமைச்சரவையில் சில ஜூனியர் அமைச்சர்கள் நிர்வாக ரீதியாக திணறி வருவதாகவும், சில துறைகளில் எதிர்பார்த்த வேகத்தில் பணிகள் நடைபெறவில்லை என்றும் முதலமைச்சர் அலுவலகத்துக்கு தகவல்கள் சென்றுள்ளதாக சொல்லப்படுகிறது.

இதனால் சிறப்பாக செயல்படாத சில அமைச்சர்களின் பதவிகள் பறிக்கப்படலாம் அல்லது அவர்களிடம் இருக்கும் முக்கிய இலாக்காக்கள் மாற்றப்பட்டு, அனுபவம் வாய்ந்த தலைவர்களிடம் ஒப்படைக்கப்படலாம் என்ற பேச்சு எழுந்துள்ளது.

தற்போதைய அமைச்சரவையில் அனைத்து இடங்களும் நிரம்பியுள்ளதால், புதிதாக மூத்த தலைவர்களை அமைச்சரவைக்குள் கொண்டு வர வேண்டுமானால் ஏற்கனவே பதவியில் இருக்கும் சிலரை நீக்க வேண்டிய கட்டாயம் ஏற்படும் என்றும் கூறப்படுகிறது. இதனால் தற்போதைய அமைச்சர்கள் சிலர் தங்களது பதவிகளை இழக்க நேரிடலாம் என்ற தகவல் கோட்டை வட்டாரங்களில் பரபரப்பை ஏற்படுத்தியுள்ளது.

முதலமைச்சர் விஜய்யை பொறுத்தவரை, அதிமுகவில் இருந்து மூத்த தலைவர்களை தவெகவில் இணைப்பது வெறும் அரசியல் பலத்தை அதிகரிக்கும் நடவடிக்கை மட்டுமல்ல என்றும், அரசாங்கத்தின் நிர்வாகத்தை வலுப்படுத்தும் முயற்சியாகவும் அவர் இதனை பார்க்கிறார் என்றும் கூறப்படுகிறது.

நிர்வாக அனுபவம் இல்லாத அமைச்சர்களால் அரசு இயந்திரத்தின் வேகம் குறைந்துவிடக் கூடாது என்பதில் விஜய் தெளிவாக இருப்பதாகவும், அதனால் அனுபவம் வாய்ந்த முன்னாள் அமைச்சர்களை முக்கிய பொறுப்புகளுக்கு கொண்டு வர அவர் விரும்புவதாகவும் தகவல்கள் தெரிவிக்கின்றன.

குறிப்பாக சி.விஜயபாஸ்கர் சுகாதாரத் துறையிலும், எம்.ஆர்.விஜயபாஸ்கர் போக்குவரத்துத் துறையிலும் ஏற்கனவே அமைச்சர்களாக பணியாற்றிய அனுபவம் கொண்டவர்கள். சம்பந்தப்பட்ட துறைகளின் நிர்வாக நடைமுறைகளை நன்கு அறிந்தவர்கள் என்பதால், அவர்களை மீண்டும் அதேபோன்ற முக்கிய இலாக்காக்களில் பயன்படுத்தலாம் என்ற பேச்சும் எழுந்துள்ளது.

இவர்களைப் போன்ற ஹெவிவெயிட் தலைவர்களை அமைச்சரவையில் சேர்ப்பது அரசாங்கத்தின் நிர்வாக பலத்தை அதிகரிப்பதோடு, மக்கள் மத்தியிலும் அரசின் இமேஜை உயர்த்தும் என்று முதலமைச்சர் விஜய் தனிப்பட்ட முறையில் கருதுவதாக கூறப்படுகிறது.

இடைத்தேர்தல் முடிவுகளுக்கு பிறகு தமிழக அமைச்சரவையில் மிகப்பெரிய மாற்றம் நடைபெறுமா, அதிமுகவில் இருந்து வந்த முன்னாள் அமைச்சர்களுக்கு முக்கிய இலாக்காக்கள் வழங்கப்படுமா, தற்போதைய அமைச்சர்களில் யாருடைய பதவி பறிக்கப்படும் என்பதுதான் தற்போது கோட்டை வட்டாரத்தின் மிகப்பெரிய எதிர்பார்ப்பாக மாறியுள்ளது.