திமுக கூட்டணியில் இருந்து விடுதலைச் சிறுத்தைகள் கட்சி தானாக வெளியேறவில்லை என்றும், திமுக தரப்புதான் விசிக தற்போது தங்கள் கூட்டணியில் இல்லை என்று கூறியதாகவும் அக்கட்சியின் தலைவர் தொல்.திருமாவளவன் புதிய விளக்கத்தை அளித்துள்ளார். சில விஷயங்களை வெளிப்படையாக பேசினால் நன்றாக இருக்காது என்றும், தனக்கு வந்த பல வாய்ப்புகளை நிராகரித்ததாகவும் அவர் கூறியிருப்பது தமிழக அரசியல் வட்டாரங்களில் பரபரப்பை ஏற்படுத்தியுள்ளது.

சென்னையில் நடைபெற்ற நிகழ்ச்சி ஒன்றில் பேசிய திருமாவளவன், கடந்த சட்டசபைத் தேர்தலுக்கு பிறகு உருவான அரசியல் சூழல், தமிழக வெற்றிக் கழகத்துக்கு விசிக ஆதரவு அளித்தது மற்றும் திமுகவுடனான உறவு குறித்து விரிவாக பேசினார்.

சட்டசபைத் தேர்தலில் தமிழக வெற்றிக் கழகம் தனிப்பெரும் கட்சியாக வெற்றி பெற்றது. வேறொரு கூட்டணியில் இருந்த விடுதலைச் சிறுத்தைகள் கட்சிக்கு அந்த வெற்றி எப்படி மகிழ்ச்சியை தர முடியும் என்று கேள்வி எழுப்பிய அவர், அதேநேரத்தில் அதிமுக போன்ற கட்சிகளை தவிர்த்துவிட்டு மதச்சார்பற்ற சக்தியாக இருக்கும் விசிகவை அழைத்து ஆதரவு கேட்டது தவெகவின் துணிச்சலான முடிவு என்று தெரிவித்தார்.

திமுக கூட்டணியில் விசிக இல்லை என்று அந்த கட்சிதான் கூறியதாகவும், கூட்டணியில் இருந்து விசிக தானாக வெளியேறவில்லை என்றும் திருமாவளவன் விளக்கம் அளித்தார். அதேபோல் தற்போது தவெக கூட்டணியில் இருப்பதாகவும் தான் இதுவரை அறிவிக்கவில்லை என்று அவர் தெரிவித்தார்.

எதிர்காலத்தில் தமிழக வெற்றிக் கழகத்தின் தலைமையில் கூட்டணி உறுதியானால், அந்த கூட்டணியில் விடுதலைச் சிறுத்தைகள் கட்சி இடம் பெறும் என்றும் அவர் கூறினார்.

தற்போது தமிழக அரசியலில் பேசப்பட்டு வரும் குதிரை பேரம் விவகாரம் குறித்தும் திருமாவளவன் கருத்து தெரிவித்தார். இந்த விவகாரத்தில் ஆளுநருக்கு அதிகாரம் இருந்தால் அவர் தலையிட வேண்டும் என்று தெரிவித்தார்.

திமுக கூட்டணியில் இருந்த காலத்தில் முன்னாள் முதலமைச்சர் மு.க.ஸ்டாலின், அம்பேத்கர் தொடர்பான நூலை வெளியிட்டபோது, “திருமாவளவன் எங்கு இருந்தாலும் அவரது உள்ளம் இங்கேதான் இருக்கும்” என்று கூறியிருந்ததை அவர் நினைவுகூர்ந்தார்.

தேர்தலுக்கு முன்பே தனக்கு பல்வேறு தரப்புகளில் இருந்து ஆசை வார்த்தைகள் வந்ததாகவும், ஆனால் மதச்சார்பற்ற முற்போக்கு கூட்டணி பலவீனமடைய தான் ஒருபோதும் இடம் கொடுக்க மாட்டேன் என்பதில் உறுதியாக இருந்ததாகவும் திருமாவளவன் தெரிவித்தார்.

தமிழக வெற்றிக் கழகத்துக்கு ஆதரவு அளிக்கும் முடிவை எடுப்பதற்கு முன்பே திமுக தலைமையிடம் அது குறித்து தகவல் தெரிவித்ததாகவும் அவர் கூறினார்.

தவெக அமைச்சரவையில் விடுதலைச் சிறுத்தைகள் கட்சிக்கு இடம் வழங்கப்பட்ட பிறகு, திமுக தலைவர்கள் ஒன்று கூடியதாகவும், அப்போது திமுக தலைமையே விசிக தற்போது தங்கள் கூட்டணியில் இல்லை என்று தெரிவித்ததாகவும் திருமாவளவன் கூறினார்.

ஆனால் இதுவரை திமுகவுடன் தங்களுக்கு உறவு இல்லை என்று தான் ஒருபோதும் கூறவில்லை என்றும் அவர் விளக்கம் அளித்தார்.

“திமுக கூட்டணியில் விசிக இல்லை என்று முன்னாள் முதலமைச்சர் முத்துவேல் கருணாநிதி ஸ்டாலின்தான் கூறினார். நான் அந்த நட்பை ஒருபோதும் சிதைக்கவில்லை. எனது மதிப்புக்குரியவர் மீதான மதிப்பு என்றைக்கும் குறையாது” என்று திருமாவளவன் தெரிவித்தார்.

திமுகவுக்கு தான் துரோகம் இழைத்துவிட்டதாக கூறப்படுவது குறித்தும் அவர் வேதனை தெரிவித்தார். தனது நட்பு எவ்வளவு தூய்மையானது என்பது அனைவருக்கும் தெரியும் என்றும் அவர் கூறினார்.

விடுதலைச் சிறுத்தைகள் கட்சி ஏன் 234 தொகுதிகளிலும் தனித்து போட்டியிடவில்லை, அதற்கான வலிமையை திருமாவளவனுக்கு ஏன் கொடுக்கவில்லை என்பது குறித்து யாரும் இதுவரை விவாதித்ததில்லை என்றும் அவர் ஆதங்கம் தெரிவித்தார்.

ஆனால் தமிழக வெற்றிக் கழகத்தை எந்த அடிப்படையில் ஆதரித்தீர்கள் என்ற கேள்வி மட்டும் தொடர்ந்து தன்னிடம் கேட்கப்படுவதாகவும் அவர் கூறினார்.

தவெகவுக்கு ஆதரவு அளிப்பதில் ஏற்பட்ட தாமதத்தை வைத்து தன்னை பல்வேறு விதமாக விமர்சித்ததாக திருமாவளவன் தெரிவித்தார். சோபா, பார்ட்டி பண்ட், துணை முதலமைச்சர் பதவி மற்றும் முதலமைச்சர் பதவி என பல்வேறு விஷயங்களுடன் தொடர்புபடுத்தி தன்னை விமர்சித்ததாகவும் அவர் கூறினார்.

“சில விஷயங்களை வெளிப்படையாக பேச முடியாது. அப்படி பேசினால் நன்றாக இருக்காது. எனக்கு வந்த பல வாய்ப்புகளை நான் நிராகரித்திருக்கிறேன்” என்றும் திருமாவளவன் தெரிவித்தார்.

அவர் எந்த வாய்ப்புகளை குறிப்பிடுகிறார், யார் அந்த வாய்ப்புகளை வழங்கினர், எதற்காக அவற்றை நிராகரித்தார் என்பது குறித்து அவர் விரிவாக விளக்கவில்லை. இதனால் அவரது இந்த பேச்சு தமிழக அரசியல் வட்டாரங்களில் புதிய விவாதத்தை ஏற்படுத்தியுள்ளது.

திமுக கூட்டணியில் இருந்து விசிக தானாக வெளியேறவில்லை என்று திருமாவளவன் கூறியிருப்பதும், தவெகவுக்கு ஆதரவு அளிப்பதற்கு முன்பே திமுக தலைமையிடம் தகவல் தெரிவித்ததாக பேசியிருப்பதும் இரு கட்சிகளுக்கு இடையிலான உறவு முற்றிலுமாக முறிந்துவிடவில்லை என்பதற்கான அறிகுறியா என்ற கேள்வியையும் எழுப்பியுள்ளது.

அதேநேரத்தில், தவெக தலைமையில் எதிர்காலத்தில் கூட்டணி உறுதியானால் அதில் விசிக இடம்பெறும் என்று திருமாவளவன் கூறியிருப்பது, அவரது அடுத்தகட்ட அரசியல் பயணம் எந்த திசையில் இருக்கும் என்ற எதிர்பார்ப்பையும் அதிகரித்துள்ளது.

“சில விஷயங்களை வெளிப்படையாக பேசினால் நன்றாக இருக்காது” என்று திருமாவளவன் கூறியதன் பின்னணியில் என்ன இருக்கிறது என்பதுதான் தற்போது தமிழக அரசியல் வட்டாரங்களில் எழுந்துள்ள முக்கிய கேள்வியாக உள்ளது.