தமிழ்நாட்டில் உள்ள தனியார் பள்ளிகளுக்கு நிரந்தர அங்கீகாரம், டிடிசிபி (DTCP), சிஎம்டிஏ (CMDA) மற்றும் என்.ஓ.சி (NOC) உள்ளிட்ட சட்டப்பூர்வ அனுமதிகளைப் பெற்றுத் தருவதாகக் கூறி, தமிழகம் முழுவதும் நூற்றுக்கணக்கான பள்ளி நிர்வாகிகளிடம் ரூ.100 கோடி வரை வசூலித்து மோசடி செய்ததாகச் சென்னை மத்திய குற்றப்பிரிவு (CCB) போலீஸார் வழக்குப்பதிவு செய்தனர். இவ்வழக்கில் கைது செய்யப்பட்ட தமிழ்நாடு பெற்றோர் ஆசிரியர் சங்கத் தலைவரும், தனியார் பள்ளிகள் சங்கத் தலைவருமான பி.டி. அரசகுமாரைக் குண்டர் தடுப்புச் சட்டத்தின் கீழ் சிறையில் அடைக்கச் சென்னை காவல் ஆணையர் கடந்த ஜூலை 11-ஆம் தேதி உத்தரவு பிறப்பித்திருந்தார்.

மனைவியின் மனுவும் முக்கிய வாதங்களும்:

இக்குண்டர் சட்ட உத்தரவை ரத்து செய்யக் கோரி பி.டி. அரசகுமாரின் மனைவி கோகிலா சென்னை உயர்நீதிமன்றத்தில் மனு தாக்கல் செய்தார். அம்மனுவில், "கடந்த 2024–2025-ஆம் ஆண்டுகளில் நடந்ததாகக் கூறப்படும் ஒரு சம்பவத்திற்கு, 2026-ஆம் ஆண்டில் வழக்குப்பதிவு செய்து அரசகுமாரைக் கைது செய்து குண்டர் சட்டத்தில் அடைத்துள்ளது முற்றிலும் அரசியல் உள்நோக்கம் கொண்டதாகும். அவர் மீது சுமத்தப்பட்டுள்ள குற்றச்சாட்டுகள் ஜோடிக்கப்பட்டவை. மேலும், குண்டர் சட்டத்திற்கு எதிராக அளிக்கப்பட்ட பிரதிநிதித்துவ மனுவைப் பரிசீலிப்பதில் 13 நாட்கள் தேவையின்றி காலதாமதம் செய்யப்பட்டுள்ளது" எனக் குறிப்பிடப்பட்டிருந்தது.

நீதிபதிகள் அமர்வின் அதிரடி தீர்ப்பு:

இந்த மனு உயர்நீதிமன்ற நீதிபதிகள் என். சதீஷ்குமார் மற்றும் கே. ராஜசேகர் ஆகியோர் அடங்கிய அமர்வு முன்பு விசாரணைக்கு வந்தது. மனுதாரர் தரப்பில் வைக்கப்பட்ட வாதங்கள் மற்றும் சட்டரீதியான நடைமுறைத் தவறுகளை விரிவாகப் பரிசீலித்த நீதிபதிகள், பி.டி. அரசகுமார் மீது பிறப்பிக்கப்பட்ட குண்டர் தடுப்புச் சட்ட உத்தரவை ரத்து செய்து அதிரடியாக உத்தரவிட்டனர்.