‘மாற்றம்’, ‘புதிய அரசியல்’ என்ற முழக்கங்களுடன் களமிறங்கி ஆட்சியைப் பிடித்த தமிழக வெற்றிக் கழகத்தில் தற்போது நடைபெற்று வரும் அரசியல் நகர்வுகள் புதிய விவாதத்தை ஏற்படுத்தியுள்ளன. மேலோட்டமாக பார்த்தால், அதிமுகவின் முக்கிய தலைவர்களை தவெக தொடர்ந்து தங்கள் பக்கம் இழுத்து அந்தக் கட்சியை பலவீனப்படுத்துவது போலத் தோன்றலாம்.

ஆனால், இந்த அரசியல் நகர்வுகளை கூர்ந்து கவனித்தால் நிலைமை வேறுவிதமாக இருப்பதாக தவெகவின் ஒரு தரப்பினர் குமுறத் தொடங்கியுள்ளனர். அதிமுகவை தவெக உடைக்கிறதா அல்லது அதிமுகவில் இருந்து வரும் தலைவர்கள் கொஞ்சம் கொஞ்சமாக தவெகவை தங்களது கட்டுப்பாட்டுக்குள் கொண்டு வருகிறார்களா என்ற கேள்வி தற்போது அக்கட்சிக்குள்ளேயே எழுந்துள்ளதாக கூறப்படுகிறது.

2026 சட்டமன்றத் தேர்தலில் வெற்றி பெற்று விஜய் தலைமையில் தமிழக வெற்றிக் கழகம் ஆட்சியைப் பிடித்தபோது, அக்கட்சியின் அடிமட்டத் தொண்டர்கள் தங்களுக்கு பிரகாசமான அரசியல் எதிர்காலம் காத்திருப்பதாக நம்பினர்.

கட்சி தொடங்கிய காலம் முதல் விஜய்யுடன் பயணித்தவர்கள், ஆட்சி அமைந்த பிறகு தங்களுக்கு உரிய அங்கீகாரம், கட்சிப் பதவிகள் மற்றும் அரசியல் வாய்ப்புகள் கிடைக்கும் என்ற எதிர்பார்ப்பில் இருந்தனர்.

ஆனால் தேர்தல் முடிந்து இரண்டே மாதங்களில் தவெகவின் உட்கட்சி அரசியல் வேறு திசையை நோக்கி நகர்ந்து வருவதாக அக்கட்சியின் ஒரு தரப்பினர் கருதுவதாக தகவல்கள் வெளியாகியுள்ளன.

இதனால் பழைய நிர்வாகிகள் பலருக்கும் கட்சியில் தங்களுக்கு எதிர்காலம் இருக்குமா என்ற அச்சம் உருவாகத் தொடங்கியுள்ளதாக கூறப்படுகிறது.

கடந்த ஒரு ஆண்டாக அதிமுகவில் இருந்து பல முக்கிய தலைவர்கள் தொடர்ந்து தவெகவில் இணைந்து வருவதாக கூறப்படுகிறது.

தொடக்கத்தில் ஒரு சில நிர்வாகிகள் மட்டுமே அதிமுகவில் இருந்து தவெக பக்கம் வந்த நிலையில், தற்போது முக்கிய தலைவர்கள் மற்றும் நிர்வாகிகள் கொத்து கொத்தாக கட்சி மாறத் தொடங்கியுள்ளதாக அரசியல் வட்டாரங்களில் பேசப்படுகிறது.

சி.விஜயபாஸ்கர், எம்.ஆர்.விஜயபாஸ்கர், எஸ்.எஸ்.வைகைச்செல்வன் மற்றும் எம்.சி.சம்பத் உள்ளிட்ட முன்னாள் அமைச்சர்கள் தவெகவில் இணைந்துள்ளதாக கூறப்படுகிறது.

மேலும், அதிமுகவை சேர்ந்த சிலர் தங்களது எம்எல்ஏ பதவிகளையும் ராஜினாமா செய்துவிட்டு தவெகவில் இணைந்துள்ளதாக தகவல்கள் வெளியாகியுள்ளன.

இந்த தொடர்ச்சியான கட்சித் தாவல்கள் அதிமுகவுக்கு பின்னடைவை ஏற்படுத்தியிருந்தாலும், தற்போது தவெகவுக்குள்ளேயே புதிய அதிகார மோதலுக்கான சூழலை உருவாக்கியுள்ளதாக கூறப்படுகிறது.

“அதிமுகவினர் தவெகவில் இணையவில்லை; மாறாக தவெகவை அதிமுக கொஞ்சம் கொஞ்சமாக விழுங்கிக் கொண்டிருக்கிறது” என்ற குமுறல் அக்கட்சியின் அடிமட்ட தொண்டர்கள் மத்தியில் எழத் தொடங்கியுள்ளதாக தகவல்கள் தெரிவிக்கின்றன.

புதியவர்களின் வருகை அதிகரிப்பது மட்டுமின்றி, அவர்களுக்கு முக்கிய பதவிகளும் அதிகாரமும் வழங்கப்பட உள்ளதாக வெளியாகும் தகவல்களே இந்த அதிருப்திக்கு முக்கிய காரணமாக கூறப்படுகிறது.

கட்சி தொடங்கிய காலம் முதல் போஸ்டர் ஒட்டி, கொடி பிடித்து, பொதுக்கூட்டங்களை நடத்தி, தேர்தல் களத்தில் இரவு பகலாக உழைத்த நிர்வாகிகளில் பலருக்கு இன்னும் உரிய அங்கீகாரம் கிடைக்கவில்லை என்ற குற்றச்சாட்டு எழுந்துள்ளது.

தவெக தொடங்கப்பட்ட காலம் முதல் கட்சிக்காக உழைத்த பலர், ஆட்சி அமைந்த பிறகு மாவட்டச் செயலாளர், மாநில நிர்வாகி உள்ளிட்ட முக்கிய பதவிகள் தங்களுக்கு கிடைக்கும் என்று எதிர்பார்த்து காத்திருந்ததாக கூறப்படுகிறது.

ஆனால் தற்போது அந்த பதவிகளில் பெரும்பாலானவை அதிமுகவில் இருந்து புதிதாக வந்துள்ள முன்னாள் அமைச்சர்கள் மற்றும் முன்னாள் எம்எல்ஏக்களுக்கு வழங்கப்படலாம் என்ற தகவல்கள் வெளியாகி வருகின்றன.இதனால் பழைய நிர்வாகிகள் மத்தியில் கடும் அதிருப்தி உருவாகியுள்ளதாக கூறப்படுகிறது.

“கட்சிக்காக நாங்கள் வியர்வை சிந்தி உழைத்தோம். ஆனால் இன்று அதிகாரமும் முக்கியப் பதவிகளும், நேற்று வரை எங்களை எதிர்த்து அரசியல் செய்தவர்களின் கைகளுக்கு செல்கின்றன” என்ற வேதனை ஆரம்பகால நிர்வாகிகள் மத்தியில் இருப்பதாக சொல்லப்படுகிறது.

கட்சிப் பதவிகள் மட்டுமின்றி, வரவிருக்கும் அமைச்சரவை விரிவாக்கத்திலும் அதிமுகவில் இருந்து தவெகவுக்கு வந்த முக்கிய தலைவர்களுக்கு வாய்ப்பு வழங்கப்படலாம் என்ற தகவல்கள் வெளியாகியுள்ளன.

வரவிருக்கும் சட்டசபை இடைத்தேர்தலுக்குப் பிறகு அமைச்சரவை விரிவாக்கம் நடைபெற வாய்ப்பு இருப்பதாகவும், அப்போது தவெகவின் பழைய நிர்வாகிகளை விட மாற்றுக் கட்சிகளில் இருந்து வந்த தலைவர்களுக்கு முக்கியத்துவம் அளிக்கப்படலாம் என்றும் கூறப்படுகிறது.

இந்த தகவல், ஏற்கனவே அதிருப்தியில் இருக்கும் தவெக நிர்வாகிகள் மத்தியில் மேலும் கவலையை ஏற்படுத்தியுள்ளதாக சொல்லப்படுகிறது.

அதிமுகவின் தொடர் தேர்தல் தோல்விகள் மற்றும் உட்கட்சிப் பூசல்கள் காரணமாக அங்கிருந்து வெளியேறிய மூத்த தலைவர்கள், தவெகவில் இணைந்த வேகத்திலேயே தங்களது செல்வாக்கை அதிகரிக்கத் தொடங்கியுள்ளதாக கூறப்படுகிறது.

பல்லாண்டு கால அரசியல் அனுபவம், மாவட்ட அளவிலான செல்வாக்கு, தொண்டர் பலம் மற்றும் பொருளாதார பலம் ஆகியவற்றை பயன்படுத்தி, கட்சியின் முக்கிய முடிவுகளை எடுக்கும் அதிகார மையத்தை நோக்கி அவர்கள் நகர்ந்து வருவதாக தவெகவின் ஒரு தரப்பினர் கருதுகின்றனர்.

புதிய கட்சியான தவெகவில் அரசியல் அனுபவம் கொண்ட தலைவர்கள் குறைவாக இருப்பதால், மாற்றுக் கட்சிகளில் இருந்து வரும் மூத்த தலைவர்களின் செல்வாக்கு இயல்பாகவே அதிகரிக்க வாய்ப்பு இருப்பதாகவும் கூறப்படுகிறது.

‘புதிய அரசியல்’ மற்றும் ‘மாற்று அரசியல்’ என்ற அடையாளத்துடன் உருவான தமிழக வெற்றிக் கழகம், தொடர்ந்து அதிமுக தலைவர்களை உள்வாங்கி அவர்களுக்கு முக்கிய பொறுப்புகளை வழங்கினால், கட்சியின் தனித்துவம் பாதிக்கப்படுமா என்ற கேள்வி எழுந்துள்ளது.

நிலைமை இப்படியே நீடித்தால், தமிழக அரசியலில் புதிய மாற்று சக்தியாக உருவான தவெக, எதிர்காலத்தில் மற்றொரு ‘அதிமுக’வாக மாறிவிடுமோ என்ற அச்சம் கட்சியின் பழைய நிர்வாகிகள் மற்றும் தொண்டர்களில் ஒரு பகுதியினரிடம் உருவாகியுள்ளதாக கூறப்படுகிறது.

அதேநேரத்தில், தமிழகம் முழுவதும் கட்சியை விரைவாக வலுப்படுத்த அரசியல் அனுபவம் கொண்ட தலைவர்களை இணைப்பது அவசியம் என்பதே தவெக தலைமையின் கணக்காக இருக்கலாம் என்றும் அரசியல் பார்வையாளர்கள் கூறுகின்றனர்.

அதிமுகவின் முக்கிய தலைவர்களை தங்கள் பக்கம் இழுத்து அந்தக் கட்சியை பலவீனப்படுத்தும் விஜய்யின் வியூகம் வெற்றி பெறுமா? அல்லது அதிமுகவில் இருந்து வரும் தலைவர்களின் செல்வாக்கு அதிகரித்து தவெகவின் அடையாளத்தையே மாற்றுமா? என்பதே தற்போது தமிழக அரசியலில் எழுந்துள்ள புதிய கேள்வியாக உள்ளது.