தமிழக காங்கிரஸ் அரசியலில் புதிய திருப்பமாக, மாநில தலைவராக மாணிக்கம் தாகூர் எம்.பி. நியமிக்கப்பட்டுள்ளார். அவரது நியமனம் அரசியல் வட்டாரங்களில் முக்கிய கவனத்தை ஈர்த்துள்ள நிலையில், பல்வேறு கட்சி தலைவர்களும் அவருக்கு வாழ்த்துகளை தெரிவித்து வருகின்றனர்.நாளை அதிகாரப்பூர்வமாக பொறுப்பேற்க உள்ள மாணிக்கம் தாகூர், தமிழகத்தில் காங்கிரஸ் கட்சியை வலுவான மக்கள் இயக்கமாக மாற்றுவதே தனது முதன்மை நோக்கம் என உறுதிபட தெரிவித்துள்ளார்.

இதுகுறித்து அவர் வெளியிட்டுள்ள கருத்தில், “காங்கிரஸ் கட்சியின் வரலாற்றில் இது மிகவும் முக்கியமான கட்டமாகும். 59 ஆண்டுகளுக்குப் பிறகு, முதல்-அமைச்சர் விஜய் தலைமையிலான த.வெ.க. கூட்டணி அமைச்சரவையில் காங்கிரஸ் கட்சி மீண்டும் ஆட்சியில் பங்கெடுத்துள்ளது. இது கட்சிக்கான புதிய வாய்ப்புகளையும் பொறுப்புகளையும் உருவாக்கியுள்ளது” என்று தெரிவித்துள்ளார்.

மேலும், வரவிருக்கும் உள்ளாட்சித் தேர்தலிலும் த.வெ.க.-காங்கிரஸ் கூட்டணி தொடரும் என நம்பிக்கை தெரிவித்த அவர், தேர்தல் அறிவிப்பு வெளியாகும் நேரத்தில் தொகுதி பங்கீடு குறித்து உரிய முடிவுகள் எடுக்கப்படும் என்றும் கூறியுள்ளார்.த.வெ.க. கூட்டணி அரசில் காங்கிரஸ் இடம்பெற்றிருப்பதால் கட்சியின் பொறுப்பு மேலும் அதிகரித்துள்ளதாக குறிப்பிட்ட அவர், தோழமைக் கட்சிகளுடன் இணைந்து மக்களுக்கு நல்லாட்சியை வழங்குவது முக்கிய கடமையாகும் என்றார்.

அத்துடன், வரவிருக்கும் பாராளுமன்றத் தேர்தலில் கூட்டணி 40 தொகுதிகளிலும் வெற்றி பெற வேண்டும் என்பதே முதன்மை இலக்காக நிர்ணயிக்கப்பட்டுள்ளதாகவும் தெரிவித்துள்ளார்.தமிழ்நாடு காங்கிரஸ் கமிட்டியின் தலைமைப் பொறுப்பு என்பது சாதாரண பதவி அல்ல; பல முன்னணி தலைவர்கள் அலங்கரித்த பொறுப்பாகும். அந்த பொறுப்பின் முக்கியத்துவத்தை முழுமையாக உணர்ந்து செயல்படுவேன் என்றும் மாணிக்கம் தாகூர் தெரிவித்துள்ளார்.

மேலும், தற்போது கிடைத்துள்ள அமைச்சரவை வாய்ப்பை முழுமையாக பயன்படுத்தி, 2 அமைச்சர்களின் ஒத்துழைப்புடன் மற்றும் கட்சி நிர்வாகிகளின் ஒருங்கிணைந்த ஆதரவோடு, காங்கிரஸ் கட்சியை மாநில அளவில் மிக வலுவான இயக்கமாக மாற்றுவதே தனது ஒரே இலட்சியம் என்றும் உறுதியாக தெரிவித்துள்ளார்.