கொளத்தூர் தொகுதி தமிழக வெற்றிக் கழக எம்.எல்.ஏ. விஎஸ். பாபு உடல்நலக் குறைவு காரணமாக சென்னை அமைந்தகரையில் உள்ள எம்.ஜி.எம். ஹெல்த்கேர் மருத்துவமனையில் சிகிச்சை பெற்று வருகிறார். கடந்த 10 நாட்களுக்கும் மேலாக அவரது உடல்நிலை குறித்து மருத்துவமனை நிர்வாகத்திடம் இருந்து எந்தவொரு அதிகாரப்பூர்வ அறிக்கையும் வெளியாகாத நிலையில், சமூக வலைதளங்களில் அவரது உடல்நிலை தொடர்பாக பல்வேறு தகவல்களும் ஊகங்களும் பரவி வருகின்றன.

கடந்த ஏப்ரல் மாதம் நடைபெற்ற சட்டப்பேரவைத் தேர்தலில் திமுக ஆட்சியை இழந்ததுடன், கொளத்தூர் தொகுதியில் அக்கட்சியின் தலைவர் மு.க.ஸ்டாலின் தோல்வியடைந்ததும் அரசியல் வட்டாரத்தில் பெரும் கவனம் பெற்றது. அவரை எதிர்த்து போட்டியிட்டு வெற்றி பெற்ற தவெக வேட்பாளர் விஎஸ். பாபு, சட்டப்பேரவையில் ஸ்டாலின் பாணியில் கைகளால் செய்கை செய்வது போன்ற காட்சிகளால் அரசியல் வட்டாரத்தில் பேசுபொருளானார்.

கடந்த ஒரு மாதத்திற்கு முன்பு வரை நல்ல உடல்நிலையில் இருந்ததாக கூறப்படும் விஎஸ். பாபுவுக்கு, கடந்த செப்டம்பர் 9-ஆம் தேதி இரவு திடீரென மூச்சுத்திணறல் ஏற்பட்டதாக தெரிகிறது. இதையடுத்து அவர் சென்னை அமைந்தகரை நெல்சன் மாணிக்கம் சாலையில் உள்ள எம்.ஜி.எம். ஹெல்த்கேர் மருத்துவமனையில் அனுமதிக்கப்பட்டார்.

தீவிர சிகிச்சைப் பிரிவில் அனுமதிக்கப்பட்டுள்ள அவருக்கு, தேவைக்கேற்ப செயற்கை சுவாசக் கருவியின் உதவியுடன் பல்வேறு மருத்துவத் துறைகளைச் சேர்ந்த மருத்துவர்கள் சிகிச்சை அளித்து வருவதாக தகவல்கள் தெரிவிக்கின்றன.

இதனிடையே, கடந்த செப்டம்பர் 23-ஆம் தேதி முதல்வர் விஜய் மருத்துவமனைக்கு நேரில் சென்று விஎஸ். பாபுவை சந்தித்து நலம் விசாரித்ததாக கூறப்படுகிறது. மேலும், அவருக்கு வழங்கப்பட்டு வரும் சிகிச்சைகள் மற்றும் உடல்நிலை முன்னேற்றம் குறித்து மருத்துவர்களிடமும் முதல்வர் கேட்டறிந்ததாக தகவல்கள் வெளியாகின.

விஎஸ். பாபுவின் உடல்நிலை தொடர்பாக அவ்வப்போது சமூக வலைதளங்களில் பல்வேறு வதந்திகள் பரவி வந்த நிலையில், இதற்கு முன்பு மருத்துவமனை நிர்வாகம் அவ்வப்போது அதிகாரப்பூர்வ அறிக்கைகளை வெளியிட்டு வந்ததாக கூறப்படுகிறது. ஆனால், கடந்த 10 நாட்களுக்கும் மேலாக புதிய அறிக்கை எதுவும் வெளியாகாததால், அவரது உடல்நிலை குறித்து மீண்டும் பல்வேறு தகவல்கள் சமூக வலைதளங்களில் பரவத் தொடங்கின.

குறிப்பாக, சுவாசப் பிரச்சனை காரணமாக விஎஸ். பாபுவுக்கு ‘டிரக்கியாஸ்டமி’ சிகிச்சை அளிக்கப்பட்டு வருவதாகவும், கழுத்தின் முன்பகுதியில் துளையிட்டு மூச்சுக்குழாயில் குழாய் பொருத்தப்பட்டுள்ளதாகவும் சில ஆன்லைன் ஊடகங்களில் செய்திகள் வெளியாகின.

இந்தத் தகவல் குறித்து விசாரிக்கப்பட்டபோது, அத்தகைய கருவி எதுவும் பொருத்தப்படவில்லை என்றும், விஎஸ். பாபுவுக்கு தொடர்ந்து மருத்துவர்கள் சிகிச்சை அளித்து வருவதாகவும் தகவல்கள் கிடைத்துள்ளதாக கூறப்படுகிறது. இதனால் ‘டிரக்கியாஸ்டமி’ சிகிச்சை அளிக்கப்பட்டதாக வெளியான தகவல் உறுதி செய்யப்படாத தகவலாகவே உள்ளது.

பொதுவாக, ஒரு நோயாளியால் வாய் அல்லது மூக்கு வழியாக போதுமான அளவு மூச்சுவிட முடியாத சூழலில், கழுத்தின் முன்பகுதியில் சிறிய திறப்பு ஏற்படுத்தி மூச்சுக்குழாயுடன் நேரடியாக ஒரு குழாய் இணைக்கும் மருத்துவ நடைமுறையே டிரக்கியாஸ்டமி எனப்படுகிறது. ஆனால், விஎஸ். பாபுவுக்கு இந்த சிகிச்சை மேற்கொள்ளப்பட்டதாக வெளியான தகவலுக்கு அதிகாரப்பூர்வ மருத்துவ உறுதிப்படுத்தல் வெளியாகவில்லை.

இதனிடையே, விஎஸ். பாபுவுக்கு பல்துறை மருத்துவர்கள் தொடர்ந்து தீவிர சிகிச்சை அளித்து வருவதாக தகவல்கள் தெரிவிக்கின்றன. அவரது உடல்நிலை குறித்து அதிகாரப்பூர்வ மருத்துவ அறிக்கை வெளியாகாத நிலையில், சமூக வலைதளங்களில் பரவும் உறுதி செய்யப்படாத தகவல்களை வைத்து முடிவுக்கு வர வேண்டாம் என்ற எதிர்பார்ப்பும் எழுந்துள்ளது.

மருத்துவமனை நிர்வாகத்தின் அடுத்தகட்ட அதிகாரப்பூர்வ அறிக்கை வெளியாகும்போதுதான் விஎஸ். பாபுவின் உடல்நிலை குறித்த முழுமையான தகவல்கள் தெளிவாகும் என எதிர்பார்க்கப்படுகிறது.