காங்கிரஸ் நாடாளுமன்ற உறுப்பினர் கார்த்தி சிதம்பரம் செய்தியாளர்களை சந்தித்து தமிழக அரசியல் சூழல் குறித்து பல்வேறு கருத்துகளை பகிர்ந்ததாக தெரிவிக்கப்படுகிறது.அப்போது அவர் பேசியதாவது,'தமிழக வெற்றிக் கழகம் கணிசமான வாக்குகளை பெறும் என்று தேர்தலுக்கு முன்பே நான் கூறியிருந்தேன்.

ஆனால் அந்த வாக்குகள் வெற்றிச் சீடுகளாக மாறாது என கணித்திருந்தேன். அந்த கணிப்பு தவறானதாகிவிட்டது என்பதை இப்போது ஒப்புக்கொள்கிறேன்.இந்த தேர்தல் முடிவை பெரும்பாலான அரசியல் பார்வையாளர்களும் சரியாக கணிக்கவில்லை. குறிப்பாக இளைஞர்கள் மத்தியில் விஜய்க்கு தனித்துவமான நல்லெண்ணமும் ஈர்ப்பும் இருப்பது இந்த தேர்தலில் வெளிப்படையாக தெரியவந்துள்ளது.

சாதி மற்றும் மத அரசியலை தாண்டியும் விஜய்க்கு மக்கள் மத்தியில் நல்ல வரவேற்பு உருவாகியுள்ளது என்பதை முழுமையாக ஏற்றுக்கொள்கிறேன். இந்த நல்லெண்ணம் இன்னும் சில காலம் நீடிக்கும். ஆனால் அது எதிர்காலத்தில் எவ்வாறு வளர்ச்சி அடையும் என்பது அவரின் ஆட்சிச் செயல்பாடுகளைப் பொறுத்தே அமையும்.

தமிழக வெற்றிக் கழகம் இனி தமிழகத்தின் முக்கிய அரசியல் சக்திகளில் ஒன்றாக இருக்கும். அதேசமயம் திராவிட முன்னேற்றக் கழகத்தையும் எளிதாக குறைத்து மதிப்பிட முடியாது.

தி.மு.க.வை புறக்கணித்து அரசியல் மதிப்பீடு செய்வது சரியான புரிதலாக இருக்காது.இந்த தேர்தலில் அ.தி.மு.க.வும் பா.ஜ.க.வும் கடுமையான பின்னடைவை சந்தித்துள்ளன. மக்கள் மாற்றத்தை விரும்பியதன் வெளிப்பாடாகவே இந்த தேர்தல் முடிவுகள் அமைந்துள்ளதாக தெரிவிக்கப்படுகிறது.

நிலையான மற்றும் மதச்சார்பற்ற ஆட்சி அமைய வேண்டும் என்ற அடிப்படையில், தமிழக வெற்றிக் கழகத்திற்கு காங்கிரஸ் ஆதரவு வழங்க விரும்புகிறது.

அதேநேரத்தில், தமிழக வெற்றிக் கழகத்திற்கு காங்கிரஸ் ஆதரவு வழங்குவதன் மூலம் தி.மு.க. ஒரு வலுவான மற்றும் ஆக்கப்பூர்வமான எதிர்க்கட்சியாக செயல்படும் சூழலும் உருவாகும்.மு.க.ஸ்டாலின் மீது இன்றும் தனிப்பட்ட மரியாதை உள்ளது.

ஆட்சி அமைக்க தேவையான எண்ணிக்கை இல்லாத நிலையில், “தி.மு.க.வின் முதுகில் காங்கிரஸ் குத்தியது” என கூறப்படுவது பொருத்தமற்ற விமர்சனம் என்றே நான் கருதுகிறேன்.இவ்வாறு அவர் தெரிவித்ததாக கூறப்படுகிறது.