நயினார் நாகேந்திரன்
தனது எக்ஸ் தளப் பதிவில் தெரிவித்திருப்பதாவது,"இந்திய கம்யூனிஸ்ட் கட்சியின் முதுபெரும் தலைவர்களில் ஒருவராக விளங்கிய ஆர். நல்லகண்ணு அவர்கள், உடல்நலக்குறைவு காரணமாக 101 வயதில் இயற்கை எய்திய செய்தி ஆழ்ந்த மனவேதனையை ஏற்படுத்தியுள்ளது.

அவரை இழந்து வாடும் குடும்பத்தினருக்கும், உறவினர்களுக்கும் எனது மனமார்ந்த இரங்கல்களை கனிந்த இதயத்துடன் தெரிவித்துக் கொள்கிறேன்.இளம் வயதிலேயே அரசியல் பாதையில் கால்பதித்து, நாட்டின் விடுதலைக்கும், சமூகத்தின் அனைத்து தரப்பினரின் உரிமைகளுக்குமான போராட்டங்களிலும் தீவிரமாக ஈடுபட்டவர் அவர்.

வாழ்நாள் முழுவதும் எளிமை, நேர்மை, அர்ப்பணிப்பு ஆகியவற்றின் உருவகமாக திகழ்ந்த நல்லகண்ணு அவர்களின் பொதுச்சேவை, மக்கள் நினைவிலும் அரசியல் வரலாற்றிலும் என்றும் அழியாத சுவடாக நிலைத்திருக்கும்.ஓம் சாந்தி.

ஆதவ் அர்ஜூனா 
இந்திய கம்யூனிஸ்ட் கட்சியின் முதுபெரும் தலைவர் ஆர். நல்லகண்ணு உடல்நலக்குறைவால் உயிரிழந்தார் என்ற செய்தி அரசியல் வட்டாரங்களில் பெரும் துயரத்தை ஏற்படுத்தியுள்ளது. அவரது மறைவுக்கு தவெக நிர்வாகி ஆதவ் அர்ஜூனா ஆழ்ந்த இரங்கலைத் தெரிவித்துள்ளார்.இதுகுறித்து அவர் தனது எக்ஸ் தளத்தில் வெளியிட்டுள்ள பதிவில்,
“விடுதலைப் போராட்டத்தின் வீரச் சின்னம்!
விவசாயிகளின் உறவுநண்பன்!
உழைக்கும் மக்களின் உரிமைக்குரல்!
மாபெரும் தலைவர் தோழர் ஆர். நல்லகண்ணு அவர்களுக்கு என் தலைவணக்கம், வீரவணக்கம்!” என்று மரியாதை செலுத்தியுள்ளார்.

இந்திய விடுதலைப் போராட்டத்தில் பங்கேற்று பொதுவாழ்வில் காலடி வைத்த அவர், பின்னர் விவசாயத் தொழிலாளர்கள் மற்றும் பாட்டாளி மக்களின் நலனுக்காக தன்னை முழுமையாக அர்ப்பணித்த போராளியாக உயர்ந்தார். வாழ்நாள் முழுவதும் கொள்கைக்காகவே உழைத்த அந்தத் தலைவரின் மறைவு வார்த்தைகளால் விவரிக்க முடியாத வேதனையை ஏற்படுத்தியுள்ளதாக அவர் குறிப்பிட்டுள்ளார்.

‘பொதுவாழ்வில் நேர்மை’ என்ற சொல்லுக்கே நல்லகண்ணு ஒரு அடையாளம் என்று தமிழக அரசியல் உலகம் கருதுகிறது. தன்னலமற்ற சேவை, இடையறாத போராட்டங்கள், எண்ணற்ற தியாகங்கள் ஆகியவற்றால் நிரம்பிய அவரது வாழ்க்கை, பொதுவாழ்வில் இருப்பவர்களுக்கு நிலையான பாடமாக இருக்கும் என்றும் அவர் பாராட்டியுள்ளார்.

நல்லகண்ணுவின் மறைவு தமிழக அரசியலுக்கு மட்டுமல்லாது, இந்திய அளவிலான பொதுவுடைமை இயக்கத்திற்கும், சமத்துவத்தை கனவு காணும் ஒவ்வொரு உழைப்பாளிக்கும் பேரிழப்பாகும்.

அவரை இழந்து வாடும் இயக்கத் தோழர்களுக்கும், குடும்பத்தினருக்கும் தனது ஆழ்ந்த அனுதாபத்தைத் தெரிவித்தார்.பொதுவாழ்வில் அழியாத தியாகச் சுவடுகளை பதித்து சென்ற பாட்டாளி மக்களின் உண்மையான தோழரான நல்லகண்ணுவுக்கு தனது இறுதியான வீர வணக்கத்தை சமர்ப்பிப்பதாகவும் அவர் தெரிவித்துள்ளார்.

செல்வப்பெருந்தகை:
சுதந்திரப் போராட்டத்தின் தீவிர வீரராகவும், ஆர். நல்லகண்ணு இந்திய கம்யூனிஸ்ட் கட்சியின் முதுபெரும் தலைவராகவும் விளங்கிய அவர், 101 வயது முதிர்வால் இன்று இயற்கை எய்தினார். அவரது மறைவு அரசியல் மற்றும் சமூக வட்டாரங்களில் ஆழ்ந்த துயரத்தை ஏற்படுத்தியுள்ளது.

இதனைத் தொடர்ந்து தமிழ்நாடு காங்கிரஸ் தலைவர் செல்வப்பெருந்தகை தனது இரங்கல் செய்தியை எக்ஸ் தளத்தில் வெளியிட்டார்.அந்த பதிவில், நல்லகண்ணு ஒரு அரசியல் தலைவர் மட்டுமல்ல; தியாகம், நேர்மை, எளிமை ஆகியவற்றின் உருவகமாக வாழ்ந்த மனிதர் எனப் பாராட்டினார்.

நூற்றாண்டைக் கடந்த வயதிலும் பொதுவாழ்வில் சீரிய ஒழுக்கத்துடன் இருந்து, கொள்கையில் ஒருபோதும் சமரசம் செய்யாத உறுதியான போராளி என்று குறிப்பிட்டார். தமிழகத்தையே தாண்டி அகில இந்திய அளவில் மதிப்பைப் பெற்ற பொதுவுடைமை இயக்கத்தின் மூத்த வழிகாட்டியாக அவர் திகழ்ந்தார் என தெரிவித்தார்.

இளம்வயதான 15-ஆம் ஆண்டிலிருந்தே ஏழைகள், தொழிலாளர்கள், விவசாயக் கூலிகள், சமூகத்தின் விளிம்புநிலை மக்கள் ஆகியோரின் உரிமைக்காக வாழ்நாள் முழுவதும் இடைவிடாது போராடியவர். கட்சித் தாண்டிய மரியாதையும் அன்பையும் பெற்ற தலைவராக அவர் விளங்கினார்.

விடுதலைப் போராட்ட காலத்தில் ஆங்கிலேய ஆட்சிக்கு எதிராகச் செயல்பட்டு பல வழக்குகளை எதிர்கொண்டார். நெல்லை சதி வழக்கு உள்ளிட்ட பல தடைகளைச் சந்தித்து, ஏழு ஆண்டுகள் சிறைவாசமும், நான்கு ஆண்டுகள் தலைமறைவான வாழ்வும் அனுபவித்தார்.

நாட்டிற்காக துன்பங்களைத் தைரியமாகச் சுமந்த அர்ப்பணிப்பாளர் என அவர் போற்றப்பட்டார்.சுற்றுச்சூழல் பாதுகாப்பிலும் அவர் தீவிர பங்கு வகித்தார். ஸ்டெர்லைட் காப்பர் ஆலையை மூடுவதற்கான போராட்டம் முதல் தாமிரபரணி ஆற்றில் மணல் கொள்ளையைத் தடுக்கும் இயக்கம் வரை நீதிமன்றத்திலும் களத்திலும் தொடர்ந்து குரல் கொடுத்தார்.

சாதிய அநீதி, வன்கொடுமைகள், ஆணவக் கொலைகள் போன்ற சமூகப் பிழைகளை எதிர்த்து இறுதி மூச்சுவரை போராடியவர் என செல்வப்பெருந்தகை நினைவுகூர்ந்தார்.அவரது சமூகப் பணியை மதித்து முன்னாள் முதலமைச்சர் மு. கருணாநிதி அண்ணல் அம்பேத்கர் விருதால் கௌரவித்தார்; தற்போதைய முதலமைச்சர் மு.க. ஸ்டாலின் ‘தகைசால் தமிழர்’ விருது வழங்கி அவரது சேவையைப் பாராட்டினார்.

தமிழகத்தின் அரசியல் மற்றும் சமூக இயக்கங்களுக்கு ஈடு செய்ய முடியாத இழப்பாக நல்லகண்ணுவின் மறைவு அமைந்துள்ளதாகவும், அவரது நினைவு சமூகநீதிப் போராட்டங்களுக்கு என்றென்றும் வழிகாட்டியாக இருக்கும் என்றும் அவர் குறிப்பிட்டார். குடும்பத்தினரும், தோழர்களும், பொதுவுடைமை இயக்கத்தினரும் ஆழ்ந்த ஆறுதல் பெற வேண்டும் என தமிழ்நாடு காங்கிரஸ் சார்பில் இரங்கல் தெரிவித்தார்.