தமிழக அரசியலில் புதிய பரபரப்பை ஏற்படுத்தும் வகையில், காங்கிரஸ் கட்சியில் இருந்து பல்வேறு மாவட்ட நிர்வாகிகள் மற்றும் தொண்டர்கள் தமிழக வெற்றிக் கழகத்தில் இணைந்து வருவது அரசியல் வட்டாரங்களில் கவனம் ஈர்த்துள்ளது.

2026 சட்டப்பேரவைத் தேர்தலில் 108 இடங்களை கைப்பற்றி தனிப்பெரும் கட்சியாக உருவெடுத்த தவெக, பெரும்பான்மை இல்லாத நிலையில் காங்கிரஸ் உள்ளிட்ட கட்சிகளின் ஆதரவுடன் ஆட்சியை அமைத்தது. காங்கிரஸ் கட்சியின் 5 எம்.எல்.ஏக்கள் ஆதரவு, விஜய் தலைமையிலான அரசுக்கு முக்கிய பலமாக அமைந்தது.

ஆனால் தற்போது, அதே காங்கிரஸ் கட்சியிலிருந்து பல நிர்வாகிகள் தவெகவில் இணைந்து வருவது கூட்டணிக்குள் புதிய சிக்கலை உருவாக்கியுள்ளது. குறிப்பாக திருச்சி, மதுரை, நெல்லை உள்ளிட்ட காங்கிரஸ் வலுவாக இருந்த பகுதிகளில் இந்த மாற்றம் அதிகமாக நடைபெறுவதாக கூறப்படுகிறது.

கடந்த சில நாட்களாக நடைபெற்ற இணைப்பு நிகழ்ச்சிகளில், காங்கிரஸ் முன்னாள் மாவட்ட நிர்வாகிகள், வட்டார பொறுப்பாளர்கள் உள்ளிட்டோர் தவெக தலைவர்களின் முன்னிலையில் கட்சியில் இணைந்துள்ளனர்.

இதுகுறித்து அரசியல் விமர்சகர்கள் கூறுகையில், “பொதுவாக கூட்டணி கட்சிகள் ஒருவரின் நிர்வாகிகளை மற்றொருவர் இழுப்பது தவிர்க்கப்படும். ஆனால் இங்கு காங்கிரஸ் அடித்தள அமைப்பையே தவெக பலவீனப்படுத்துகிறது என்ற குற்றச்சாட்டு எழுகிறது” என தெரிவித்துள்ளனர்.

மேலும், “திமுக கூட்டணியில் இருந்து வெளியேறிய பிறகு, தமிழகத்தில் காங்கிரஸுக்கு தவெக மட்டுமே முக்கிய அரசியல் தளமாக உள்ளது. அந்த சூழ்நிலையை பயன்படுத்தி காங்கிரஸ் வாக்கு வங்கியை முழுமையாக தனது பக்கம் இழுக்கும் முயற்சியில் தவெக ஈடுபடுகிறது” என்ற கருத்தும் அரசியல் வட்டாரங்களில் பேசப்படுகிறது.

இதனால் காங்கிரஸ் தொண்டர்களிடையே அதிருப்தி ஏற்பட்டுள்ளதாக கூறப்படுகிறது. “கூட்டணியில் இருந்தும், எங்கள் கட்சி நிர்வாகிகள் தொடர்ந்து வெளியேறுவது வேதனை அளிக்கிறது” என்று சில மூத்த காங்கிரஸ் நிர்வாகிகள் அதிருப்தி தெரிவித்துள்ளனர்.

தற்போதைய சூழலில், வெளிப்படையாக கூட்டணியில் இருந்தாலும், அடிமட்டத்தில் காங்கிரஸ் – தவெக இடையே அமைதியான அரசியல் போட்டி தொடங்கியுள்ளதாக அரசியல் ஆய்வாளர்கள் கருதுகின்றனர். விஜய்யின் இந்த அமைதியான அரசியல் நகர்வு, தமிழகத்தில் தவெகவை மேலும் வலுப்படுத்தும் முயற்சியாக பார்க்கப்படுகிறது.