தமிழக சட்டசபை அடுத்த ஆண்டு (2026) ஏப்ரல் மாதம் நடைபெற உள்ள தேர்தலை முன்னிட்டு, வாக்காளர்களை கவர இந்த மாதமே 3 புதிய மெகா திட்டங்களை அறிவிக்க தி.மு.க. அரசு முடிவு செய்துள்ளது.தமிழ்நாட்டில் கடந்த 4½ ஆண்டுகளில் பல சமூகத் திட்டங்கள் செயல்பாட்டில் உள்ளன:
தமிழ்ப் புதல்வன்
கலைஞர் மகளிர் உரிமைத்தொகை திட்டம்
முதல்-அமைச்சரின் காலை உணவு திட்டம்
நான் முதல்வன் திட்டம்
விடியல் பயணம் திட்டம்
புதுமைப்பெண் திட்டம்
சட்டசபை தேர்தலுக்கான திகதி பிப்ரவரி மாதம் தொடக்கத்தில் அறிவிக்கப்படும் என எதிர்பார்க்கப்படுகிறது.

அதற்குப் பிறகு புதிய திட்டங்களை அறிவிப்பது கடினமாக இருக்கும். எனவே, முக்கியமான 3 மெகா திட்டங்களை தேர்தலுக்கு முன்னதாக தொடங்க திட்டமிடப்பட்டுள்ளது.இதில் முதன்மையானது, 20 லட்சம் கல்லூரி மாணவர்களுக்கு லேப்டாப் வழங்கும் திட்டம். இதற்கான டெண்டர்கள் ஏசர், டெல், எச்.பி. நிறுவனங்களுக்கு வழங்கப்பட்டு, தற்பொழுது 20 லட்சம் லேப்டாப்கள் தயாரிக்கப்பட்டுள்ளன.

முதற்கட்டமாக ஏப்ரல் மாதத்திற்குள் 10 லட்சம் மாணவர்களுக்கு வழங்கப்படும் என்று அதிகாரிகள் தெரிவித்துள்ளனர்.மேலும், கடந்த தேர்தலில் அறிவிக்கப்பட்ட மகளிர் உரிமைத் தொகை (மாதம் ரூ.1,000) திட்டமும் மக்கள் மத்தியில் பெரும் வரவேற்பைப் பெற்றுள்ளது.

இதுவரை ஒரு கோடியே 14 லட்சம் பெண்களுக்கு இந்த தொகை வழங்கப்பட்டு வருகிறது. இருப்பினும், சில பெண்கள் திட்டத்தில் சேர முடியாததாக புகார்கள் வந்ததால், தற்போது புதிய விண்ணப்பதாரர்களுக்கும் திட்ட விரிவாக்கம் செய்யப்பட இருக்கிறது.

மேலும், புத்தாண்டு மற்றும் பொங்கல் பண்டிகையை முன்னிட்டு, பொங்கல் தொகுப்புடன் ரொக்கத் தொகையும் வழங்க திட்டமிடப்பட்டுள்ளது. கடந்த அ.தி.மு.க. ஆட்சியில் இந்த தொகை ரூ.1,000 வழங்கப்பட்டதைப் போன்று, இப்போது முதல்வர் மு.க.ஸ்டாலின் புதிய தொகையை அறிவிப்பார்.

தமிழகத்தில் மொத்தம் 2 கோடியே 27 லட்சம் ரேஷன் கார்டுகள் உள்ள நிலையில், வழங்கப்படும் தொகை அளவு முதல்வர் முடிவு செய்த பின்னரே அறிவிக்கப்படும் என தகவல்கள் தெரிவிக்கின்றன.