வளைகுடா பிராந்தியத்தில் ஏற்பட்டுள்ள போர் பதற்றம் இந்தியா முழுவதும் எதிர்பாராத தாக்கத்தை ஏற்படுத்தியுள்ளது. அதன் விளைவாக சமையல் எரிவாயு சிலிண்டர்களின் விநியோகம் கடுமையாக பாதிக்கப்பட்டு, பல இடங்களில் தட்டுப்பாடு நிலவி வருவதாக தகவல்கள் வெளியாகியுள்ளன.

குறிப்பாக வணிக பயன்பாட்டிற்கான சிலிண்டர்கள் கிடைக்காமல் போனதால், பல கல்வி நிறுவனங்களும் சிக்கலில் சிக்கியுள்ளன.அந்த வகையில், சென்னை நகரில் செயல்பட்டு வரும் சில தனியார் கல்லூரிகளின் விடுதிகளில் தங்கி கல்வி கற்கும் மாணவ-மாணவிகளுக்கான உணவு தயாரிப்பில் பெரும் சிரமம் உருவாகியுள்ளது.

விடுதி சமையலறைகளில் பயன்படுத்தப்படும் வணிக சிலிண்டர்கள் கிடைக்காத காரணத்தால், மாணவர்களுக்கு உணவு சமைத்து வழங்குவது சாத்தியமற்ற நிலைக்கு தள்ளப்பட்டுள்ளதாகத் தெரிவிக்கப்படுகிறது.

இதனால், கல்லூரி நிர்வாகங்கள் அவசர ஆலோசனைகளை நடத்தி உடனடி நடவடிக்கைகளை எடுத்து வருகின்றன.

இந்நிலையில், ரம்ஜான் பண்டிகையை முன்னிட்டு வருகிற 17-ஆம் தேதி முதல் கல்லூரிகளுக்கு விடுமுறை வழங்க திட்டமிடப்பட்டிருந்த சூழலில், தற்போது நிலவும் சிலிண்டர் தட்டுப்பாடு காரணமாக அதற்கு முன்பே விடுமுறையை அறிவிக்கும் முடிவை சில கல்லூரிகள் எடுத்துள்ளன.

இதற்கான அறிவிப்புகள் மாணவர்களுக்கும் பெற்றோருக்கும் வெளியிடப்பட்டு வருவதாக தெரிவிக்கப்படுகிறது.இந்த திடீர் நிலைமை மாணவர்களிடையிலும் பெற்றோர்களிடையிலும் குழப்பத்தை ஏற்படுத்தியுள்ளதுடன், எரிவாயு தட்டுப்பாட்டின் தாக்கம் கல்வி துறையையும் எவ்வாறு பாதிக்கிறது என்பதையும் வெளிப்படுத்தி வருகிறது.