அதிமுக தலைமைத்துடன் தமிழக வெற்றிக்கழகம் (தவெக) கூட்டணி அமைக்கும் விவகாரத்தில் பல்வேறு சர்ச்சைகள் கிளம்பியுள்ளன. இந்நிலையில் மூத்த பத்திரிகையாளர் தராசு ஷ்யாம், “எடப்பாடி பழனிசாமி கூட்டணி விவகாரத்தில் மிகப்பெரிய தவறு செய்துவிட்டார்” என்று பேட்டியொன்றில் கருத்து தெரிவித்துள்ளார்.

யூடியூப் சேனலுக்கு அளித்த பேட்டியில் தராசு ஷ்யாம் கூறியதாவது:“விஜயின் வருகைக்காக அதிமுக மிகவும் எதிர்பார்த்து காத்திருந்தது போலாகிவிட்டது. இது அதிமுகவின் பல முக்கிய தலைவர்களுக்கு பிடிக்கவில்லை. ஒரு பெரிய கட்சி — பலமுறை ஆட்சியில் இருந்த அதிமுக — விஜய் வந்துதான் காப்பாற்றப்படவேண்டும் என்ற தோற்றத்தை எடப்பாடி பழனிசாமி ஏற்படுத்திவிட்டார் என்பது அதிருப்தியை ஏற்படுத்தியுள்ளது” என்றார்.

மேலும் அவர் கூறியதாவது, “ஒருங்கிணைந்த அதிமுக வேண்டும் என்று செங்கோட்டையன் கேட்டு கெடு வைத்தார். அதற்கு பதிலாக எடப்பாடி அவரின் பதவியை பறித்துவிட்டார். தற்போது செங்கோட்டையன் அடிப்படை உறுப்பினராக மட்டுமே உள்ளார். ஓபிஎஸ்ஸை கட்சியில் இருந்து நீக்கிய எடப்பாடிக்கு, செங்கோட்டையனை நீக்குவது சிரமமல்ல. இது கட்சியின் விரோத நடவடிக்கை என்று காரணம் சொல்லி முடித்துவிடலாம்” என தெரிவித்தார்.

அதிமுக உள்ளகத்தில் தற்போது முக்குலத்தோர் ஆதரவை மீட்டெடுப்பதற்காக பல தந்திரங்கள் வகுக்கப்படுகின்றன என்றும், பசும்பொன் தேவர் ஐயாவுக்கு பாரத் ரத்னா வழங்க வேண்டும் என்ற கோரிக்கையை அரசியல் ரீதியாக அதிமுக கணக்கில் எடுத்துக் கொண்டிருப்பதாகவும் அவர் கூறினார்.

அதே நேரத்தில், தவெக தலைவர் விஜயுடன் கூட்டணி ஏற்படும் என எதிர்பார்த்த அதிமுகவுக்கு நேற்று சி.டி. நிர்மல் குமார் அளித்த விளக்கம் பெரிய அதிர்ச்சியாக மாறியுள்ளது. அவர், “ஒரு மாதத்திற்கு முன்பே எங்கள் நிலைப்பாட்டை தெரிவித்தோம், அதில் எந்த மாற்றமும் இல்லை” என்று கூறியுள்ளார். இது அதிமுகவின் மனநிலையை கோபமாகவும் ஏமாற்றமாகவும் மாற்றியுள்ளது என்று தராசு ஷ்யாம் கூறினார்.

மேலும், செங்கோட்டையன், ஓபிஎஸ், டிடிவி தினகரன் ஆகிய மூவரும் சமீபத்தில் பாண்டியன் ஓட்டலில் சந்தித்து, பின்னர் குருபூஜையில் ஒரே வாகனத்தில் பங்கேற்றிருப்பது, அதிமுகவில் ஒருங்கிணைப்பு தேவை என்பதைக் காட்டுகிறது என்றும் அவர் கூறியுள்ளார்.

இவ்வாறு அவர் முடிவுறுத்தியதாவது:“இந்த சூழ்நிலையில்தான் எடப்பாடி பழனிசாமி கட்சிக்குள் மீண்டும் அழுத்தத்தில் இருக்கிறார். செங்கோட்டையனை அடிப்படை உறுப்பினர் பதவியிலிருந்தும் நீக்காவிட்டால், எடப்பாடி பழனிசாமி பலவீனமானவர் என்றே தோன்றும்” எனக் கூறியுள்ளார்.