விஜய்யின் மகன் ஜேசன் சஞ்சய் இயக்குநராக அறிமுகமாகியுள்ள ‘சிக்மா’ திரைப்படம் வரும் அக்டோபர் 2-ம் தேதி திரையரங்குகளில் வெளியாக உள்ளது. சந்தீப் கிஷன், ஃபரியா அப்துல்லா உள்ளிட்டோர் நடிப்பில் உருவாகியுள்ள இந்தப் படத்தை லைகா நிறுவனம் தயாரித்துள்ளது. தமன் இசையமைத்துள்ள நிலையில், படத்தின் பாடல்கள் ஏற்கனவே வெளியாகி ரசிகர்களின் கவனத்தை ஈர்த்துள்ளன.

இந்நிலையில், ‘சிக்மா’ படத்தின் ஆடியோ மற்றும் டிரெய்லர் வெளியீட்டு விழா சென்னையில் உள்ள சாய்ராம் கல்லூரியில் செப்டம்பர் 18-ம் தேதி பிரம்மாண்டமாக நடைபெற உள்ளது. இதற்கான ஏற்பாடுகள் தீவிரமாக நடைபெற்று வரும் நிலையில், ஜேசன் சஞ்சய்யிடம் அவரது தந்தை விஜய் இந்த நிகழ்ச்சியில் பங்கேற்பாரா என்ற கேள்வி எழுப்பப்பட்டது.

‘சிக்மா’ படத்தின் ப்ரீ-ரிலீஸ் நிகழ்ச்சி ஏற்கனவே சேலத்தில் நடைபெற்றது. ஆனால், அந்த நிகழ்ச்சியில் விஜய், சங்கீதா விஜய் உள்ளிட்ட குடும்பத்தினர் யாரும் பங்கேற்கவில்லை. இதனால், சென்னையில் நடைபெறவுள்ள ஆடியோ லாஞ்சில் விஜய் கலந்துகொள்வாரா என்ற எதிர்பார்ப்பு ரசிகர்கள் மத்தியில் உருவானது.

குறிப்பாக, நடிகர் அஜித்குமார் பங்கேற்ற கார் பந்தய நிகழ்வை பார்ப்பதற்காகவும், அதனை தொடங்கி வைப்பதற்காகவும் முதலமைச்சர் விஜய் லண்டன் சென்றிருந்தார். அங்கு அஜித்துடன் விஜய் இருக்கும் காட்சிகளும், நடிகை திரிஷா அவர்களுடன் இணைந்து பந்தயத்தை பார்வையிட்ட காட்சிகளும் சமூக வலைதளங்களில் வைரலாகின.

நண்பர் அஜித்துக்காக லண்டன் சென்ற விஜய், தனது மகன் இயக்குநராக அறிமுகமாகும் முதல் படத்தின் ஆடியோ வெளியீட்டு விழாவில் பங்கேற்பாரா என்ற கேள்வி இதனால் மேலும் அதிகரித்தது.

இந்நிலையில், செய்தியாளர்களை சந்தித்த ஜேசன் சஞ்சய்யிடம், “உங்கள் அப்பா தற்போது முதலமைச்சராக உள்ளார். அவர் உங்கள் படத்தை புரமோட் செய்வதற்காக ஒரு நாளாவது வருவாரா?” என கேள்வி எழுப்பப்பட்டது.

இதற்கு பதிலளித்த ஜேசன் சஞ்சய், தனது தந்தை ‘சிக்மா’ படத்தின் ரிலீஸுக்காக மிகவும் ஆர்வமாக காத்திருப்பதாக தெரிவித்துள்ளார்.

“என்னுடைய படத்தின் ரிலீஸுக்காக அப்பா ரொம்பவே ஆர்வமாக காத்திருக்கிறார். ஆனால், புரமோஷனுக்கெல்லாம் அவர் வரத் தேவையில்லை. வரவும் மாட்டார். அவருக்கு இருக்கும் வேலை ரொம்பவே பெரிது. நான் என்ன செய்து வைத்திருக்கிறேன் என்பதைப் பார்க்க அவர் மிகவும் ஆர்வமாகவும், எனக்கு உறுதுணையாகவும் இருக்கிறார்” என ஜேசன் சஞ்சய் தெரிவித்துள்ளார்.

இதன் மூலம் ‘சிக்மா’ படத்தின் புரமோஷன் நிகழ்ச்சிகளில் விஜய் பங்கேற்பாரா என்ற எதிர்பார்ப்புக்கு ஜேசன் சஞ்சய் முற்றுப்புள்ளி வைத்துள்ளார்.

தமன் இசையமைத்துள்ள ‘சிக்மா’ படத்தின் பாடல்கள் ஏற்கனவே வெளியாகி நல்ல வரவேற்பைப் பெற்றுள்ளன. தற்போது செப்டம்பர் 18-ம் தேதி நடைபெறும் ஆடியோ மற்றும் டிரெய்லர் வெளியீட்டு விழாவை ரசிகர்கள் எதிர்பார்த்து வருகின்றனர்.

லைகா நிறுவனம் தயாரித்துள்ள இந்தப் படம் அக்டோபர் 2-ம் தேதி திரையரங்குகளில் வெளியாகிறது. இதற்கு முந்தைய நாளான அக்டோபர் 1-ம் தேதி விஜய் சேதுபதி நடித்துள்ள ‘பத்தா’ திரைப்படமும், ராம் இயக்கத்தில் நிவின் பாலி நடித்துள்ள நீண்ட நாட்களாக ரிலீஸுக்காக காத்திருக்கும் ‘ஏழு கடல் ஏழு மலை’ திரைப்படமும் வெளியாக உள்ளன.

இதனால் அக்டோபர் முதல் வாரத்தில் அடுத்தடுத்து வெளியாகும் படங்களுக்கு இடையே திரையரங்குகள் மற்றும் ரசிகர்களின் கவனம் எப்படி பகிரப்படும் என்பதும் திரையுலகில் எதிர்பார்ப்பை ஏற்படுத்தியுள்ளது.