கட்சியின் ஆண்டு தொடக்க விழாவில் பேசிய பிரேமலதா விஜயகாந்த், இடைத்தேர்தல் கூட்டணி முதல் தொகுதிப் பங்கீடு தொடர்பான அரசியல் சர்ச்சைகள் வரை பல்வேறு விவகாரங்கள் குறித்து கருத்து தெரிவித்தார். குறிப்பாக, தொகுதிகள் குறைக்கப்பட்டதாக திருமாவளவன் தெரிவித்த குற்றச்சாட்டுக்கு நாளை நடைபெறும் மாவட்ட செயலாளர்கள் கூட்டத்துக்குப் பிறகு பதில் அளிப்பதாக அவர் கூறியுள்ளார்.

சென்னை கோயம்பேட்டில் உள்ள தே.மு.தி.க. தலைமை அலுவலகத்தில் அக்கட்சியின் 22-வது ஆண்டு தொடக்க விழா நேற்று நடைபெற்றது. இதில் கட்சியின் பொதுச்செயலாளர் பிரேமலதா விஜயகாந்த் கலந்து கொண்டு கட்சிக் கொடியை ஏற்றி வைத்தார். தொடர்ந்து, விஜயகாந்த் நினைவிடத்தில் மலர்தூவி மரியாதை செலுத்தினார்.

பின்னர் செய்தியாளர்களிடம் பேசிய அவர், இடைத்தேர்தலில் கம்யூனிஸ்டு கட்சிகள் தனித்துப் போட்டியிடுவதாக அறிவித்திருப்பது அவர்களின் கட்சி முடிவு என்றும், ஒவ்வொரு கட்சிக்கும் தனித்தனி அரசியல் நிலைப்பாடு இருப்பதால் அதுகுறித்து தாம் கருத்து தெரிவிக்க விரும்பவில்லை என்றும் தெரிவித்தார்.

தங்கள் கட்சி அங்கம் வகிக்கும் தி.மு.க. கூட்டணி, இடைத்தேர்தலில் மிகப்பெரிய வெற்றியை பெறும் என நம்புவதாக பிரேமலதா விஜயகாந்த் தெரிவித்தார். இதற்காக கூட்டணிக் கட்சிகள் அனைத்தும் ஒன்றிணைந்து தேர்தல் பணியாற்றும் என்றும் அவர் கூறினார்.

மேலும், முதல்-அமைச்சர் மு.க.ஸ்டாலின் தொலைபேசியில் தொடர்பு கொண்டு, இடைத்தேர்தலுக்கான வேட்பாளர்கள் அறிவிக்கப்பட உள்ளதாகவும், தே.மு.தி.க.வின் ஆதரவு தேவை என்றும் கேட்டுக்கொண்டதாக அவர் தெரிவித்தார்.இதற்கு பதிலளித்த தாம், தே.மு.தி.க. தொடர்ந்து தி.மு.க.வுடனான கூட்டணியில் இருக்கும் என்றும், தங்களது ஒத்துழைப்பு 100 சதவீதம் இருக்கும் என்றும் தெரிவித்ததாக பிரேமலதா கூறினார்.

இடைத்தேர்தலில் தி.மு.க. வேட்பாளர்களுக்கு தே.மு.தி.க. சார்பில் முழுமையான ஆதரவு அளிக்கப்படும் என்றும், தாமும் தேர்தல் பிரசாரத்தில் ஈடுபட உள்ளதாகவும் அவர் தெரிவித்தார்.ஒவ்வொரு அரசியல் கட்சியும் தங்களது வேட்பாளர்களை வெற்றி பெறச் செய்வதற்காக தீவிரமாக உழைப்பார்கள். ஆனால் தேர்தல் வெற்றியை தீர்மானிக்கும் அதிகாரம் மக்களிடமே உள்ளது. மக்கள் அளிக்கும் தீர்ப்பே இறுதியானது என்றும் பிரேமலதா விஜயகாந்த் குறிப்பிட்டார்.

கடற்கரை அருகே தலைமைச் செயலகம் அமைக்க திட்டமிடப்பட்டுள்ளதாக தெரிவிக்கப்பட்டுள்ள நிலையில், அதற்கு பல்வேறு தரப்பினரும் எதிர்ப்பு தெரிவித்து வருவதாகவும் அவர் கூறினார். மக்களின் நலனுக்காக செயல்படுத்தப்படும் ஒவ்வொரு திட்டமும் அவர்களின் விருப்பத்தையும் ஆதரவையும் பெற்றதாக இருக்க வேண்டும் என்றும் அவர் வலியுறுத்தினார்.

தொடர்ந்து, கூட்டணியில் தொகுதிப் பங்கீடு தொடர்பாக விடுதலை சிறுத்தைகள் கட்சி தலைவர் திருமாவளவன் தெரிவித்த கருத்து குறித்து செய்தியாளர்கள் கேள்வி எழுப்பினர்.

அதற்கு பதிலளித்த பிரேமலதா விஜயகாந்த், “தி.மு.க. கூட்டணியில் நீண்ட காலமாக இருந்த எங்களுக்கு தொகுதிகளின் எண்ணிக்கை குறைக்கப்பட்டு, புதிதாக கூட்டணிக்கு வந்த தே.மு.தி.க.வுக்கு அதிக தொகுதிகள் ஒதுக்கப்பட்டதாக திருமாவளவன் தெரிவித்துள்ளார். இது தொடர்பாக நாளை (புதன்கிழமை) நடைபெறும் மாவட்ட செயலாளர்கள் கூட்டத்துக்குப் பிறகு என்னுடைய பதிலை தெரிவிப்பேன்” என்றார்.