தமிழக அரசியலில் பரபரப்பை ஏற்படுத்தியுள்ள அதிமுக உள்கட்சி பிரச்சனைக்கு மத்தியில், முதலமைச்சர் விஜய்க்கு ஆதரவாக வாக்களித்த அதிமுக எம்.எல்.ஏக்கள் விவகாரம் தொடர்ந்து பேசுபொருளாகி வருகிறது. இந்த நிலையில், காங்கிரஸ் எம்.பி கார்த்தி சிதம்பரம் தெரிவித்துள்ள கருத்து அரசியல் வட்டாரத்தில் புதிய விவாதத்தை கிளப்பியுள்ளது.

சட்டமன்றத்தில் நடைபெற்ற நம்பிக்கை வாக்கெடுப்பில், விஜய் தலைமையிலான தவெக அரசு 144 வாக்குகள் பெற்று வெற்றி பெற்றது. இதில், அதிமுகவின் அதிகாரப்பூர்வ நிலைப்பாடு அரசுக்கு எதிராக இருந்த போதிலும், சி.வி. சண்முகம் தலைமையிலான 25 அதிமுக எம்.எல்.ஏக்கள் கட்சியின் கொறடா உத்தரவை மீறி தவெக அரசுக்கு ஆதரவாக வாக்களித்தனர்.

இந்த நடவடிக்கை அதிமுகவில் பெரிய அதிர்வை ஏற்படுத்தியது. இதையடுத்து, எடப்பாடி பழனிசாமி தலைமையிலான அதிமுக தரப்பு, கொறடா உத்தரவை மீறிய 25 எம்.எல்.ஏக்கள் மீது நடவடிக்கை எடுக்க வேண்டும் என சபாநாயகரிடம் மனு அளித்துள்ளது.

இந்த சூழலில், செய்தியாளர்களிடம் பேசிய காங்கிரஸ் எம்.பி கார்த்தி சிதம்பரம் கூறியதாவது:“நம்பிக்கை வாக்கெடுப்பில் விஜய் வெற்றி பெற்றுவிட்டார். அதிமுகவில் நடந்தது ஒரு தனி விவகாரம். விஜய்க்கு ஆதரவாக வாக்களித்த அணியை தகுதி நீக்கம் செய்ய வேண்டும் என்று மனுக்கள் செல்லலாம். அது நீதிமன்றத்திற்கும் போகலாம். அந்த அணியின் எதிர்காலம் என்ன ஆகும் என்பது இன்னும் தெளிவில்லை. எனவே, இவர்களை ஆட்சிக்குள் சேர்க்க வேண்டிய அவசியம் இல்லை. இவர்கள் இல்லாமலேயே விஜய்க்கு ஆட்சி நடத்தும் வாய்ப்பு இருக்கிறது,” என்றார்.

கார்த்தி சிதம்பரத்தின் இந்த கருத்து அரசியல் வட்டாரத்தில் பல கேள்விகளை எழுப்பியுள்ளது. குறிப்பாக, “அதிமுக ஆதரவு அணியை அமைச்சரவையில் சேர்ப்பதை காங்கிரஸ் விரும்பவில்லையா?” என்ற விவாதமும் தற்போது கிளம்பியுள்ளது.

ஏற்கனவே தவெக அரசுக்கு வெளியிலிருந்து ஆதரவு அளித்து வரும் காங்கிரஸ் மற்றும் இடதுசாரி கட்சிகள், அதிமுக அணியினர் ஆட்சியில் பங்கேற்பது குறித்து எச்சரிக்கையாக உள்ளதாக அரசியல் விமர்சகர்கள் கருத்து தெரிவித்து வருகின்றனர்.

இதனால், விஜய் அடுத்ததாக எடுக்கப்போகும் அரசியல் முடிவுகள் தமிழக அரசியலில் மேலும் பரபரப்பை ஏற்படுத்தும் என எதிர்பார்க்கப்படுகிறது.