டிஜிட்டல் பணப் பரிவர்த்தனைகளை பொதுமக்களுக்கு தொடர்ந்து இலவசமாக வழங்க வேண்டும் என்றும், யு.பி.ஐ. பரிவர்த்தனைகளுக்கு கட்டணம் விதிக்கும் முடிவை மத்திய அரசு திரும்பப் பெற வேண்டும் என்றும் மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயலாளர் பெ.சண்முகம் வலியுறுத்தியுள்ளார்.இதுதொடர்பாக அவர் வெளியிட்டுள்ள அறிக்கையில் தெரிவித்திருப்பதாவது,"செல்லா நோட்டு அறிவிப்புக்குப் பிறகு நாட்டில் டிஜிட்டல் பணப் பரிவர்த்தனையை ஊக்குவிக்கும் நடவடிக்கைகள் தீவிரமடைந்தன.

இதன் தொடர்ச்சியாக இன்று கோடிக்கணக்கான வணிகர்களும், பொதுமக்களும் யு.பி.ஐ. பணப் பரிவர்த்தனை முறையைப் பயன்படுத்தி வருகின்றனர்.இந்த நிலையில், இதுவரை கட்டணமின்றி மேற்கொள்ளப்பட்டு வந்த யு.பி.ஐ. வணிகப் பரிவர்த்தனைகளில் குறிப்பிட்ட வரம்புக்கு மேல் கட்டணம் விதிக்கும் நடைமுறை கொண்டுவரப்படுவது பொதுமக்கள் மற்றும் சிறு வணிகர்கள் மீது கூடுதல் சுமையை ஏற்படுத்தும் என்று பெ.சண்முகம் தெரிவித்துள்ளார்.

ஏற்கனவே பல்வேறு வரிகள் மற்றும் சேவைக் கட்டணங்களால் மக்கள் சிரமங்களை எதிர்கொண்டு வரும் நிலையில், தங்களது பணத்தை டிஜிட்டல் முறையில் பரிமாற்றம் செய்வதற்கும் கூடுதல் செலவு ஏற்படும் நிலை உருவாகக் கூடாது என்றும் அவர் குறிப்பிட்டுள்ளார்.

மத்திய அரசின் சமீபத்திய விளக்கத்தின்படி, ரூ.2,000-க்கு மேற்பட்ட குறிப்பிட்ட நபரிடம் இருந்து வணிகருக்கான யு.பி.ஐ. பரிவர்த்தனைகளுக்கு 0.4 சதவீத வணிகர் தள்ளுபடி விகிதம் விதிக்கப்படும். ரூ.75,000 மற்றும் அதற்கு மேற்பட்ட பரிவர்த்தனைகளுக்கு ஒரு பரிவர்த்தனைக்கு அதிகபட்சம் ரூ.300 என வரம்பு நிர்ணயிக்கப்பட்டுள்ளது.

ரெயில்வே, தொலைத்தொடர்பு, காப்பீடு, எரிபொருள், வேளாண் இடுபொருட்கள் உள்ளிட்ட சில அத்தியாவசியத் துறைகளில் ரூ.2,000-க்கு மேற்பட்ட பரிவர்த்தனைகளுக்கு பரிவர்த்தனை ஒன்றுக்கு ரூ.5 என்ற நிலையான கட்டணம் நிர்ணயிக்கப்பட்டுள்ளது.அதேவேளையில், தனிநபர் ஒருவரிடமிருந்து மற்றொரு தனிநபருக்கு மேற்கொள்ளப்படும் யு.பி.ஐ. பரிவர்த்தனைகளுக்கு தொகை எவ்வளவு இருந்தாலும் கட்டணம் இல்லை என்றும், ரூ.2,000 வரையிலான வணிகப் பரிவர்த்தனைகளும் இலவசமாக தொடரும் என்றும் மத்திய அரசு தெரிவித்துள்ளது.

வணிகர்களிடம் வசூலிக்கப்படும் கூடுதல் செலவு, பொருட்கள் மற்றும் சேவைகளின் விலைகளில் பிரதிபலித்து இறுதியில் பொதுமக்கள் மீதே சுமையாக மாறும் வாய்ப்பு உள்ளது என்று பெ.சண்முகம் தெரிவித்துள்ளார்.ஏற்கனவே பொருளாதார நெருக்கடிகளை எதிர்கொண்டு வரும் சிறு வணிகர்கள், கடைக்காரர்கள், தொழிலாளர்கள் மற்றும் நடுத்தர மக்கள் மீது மேலும் ஒரு செலவை திணிப்பது அவர்களின் சுமையை அதிகரிக்கும் என்றும் அவர் கூறியுள்ளார்.

ரூ.2,000-க்கு மேற்பட்ட பரிவர்த்தனைகள் எண்ணிக்கையில் குறைவாகத் தோன்றினாலும், யு.பி.ஐ. பரிவர்த்தனைகளின் மொத்த மதிப்பில் அவற்றின் பங்கு கணிசமானதாக இருக்கும் என்பதால், இதன் தாக்கம் குறித்து மத்திய அரசு மறுபரிசீலனை செய்ய வேண்டும் என்றும் அவர் வலியுறுத்தியுள்ளார்.சிறு வணிகர்கள் மற்றும் தெருவோர வியாபாரிகளுக்கு கூடுதல் சுமை ஏற்படாத வகையில் விதிமுறைகள் அமைய வேண்டும்.

சிறு வணிகர்களுக்கான சில வகை யு.பி.ஐ. பரிவர்த்தனைகளுக்கு தொடர்ந்து பூஜ்ஜியக் கட்டண நடைமுறை இருக்கும் என்று மத்திய அரசு தெரிவித்துள்ளது.இருப்பினும், வணிகப் பரிவர்த்தனைகளில் கட்டணம் விதிக்கும் நடைமுறை விரிவடையும் பட்சத்தில், அதன் சுமை பொதுமக்கள் மற்றும் சிறு வணிகர்களை பாதிக்காத வகையில் அரசு உரிய நடவடிக்கை எடுக்க வேண்டும் என்று பெ.சண்முகம் தெரிவித்துள்ளார்.

யு.பி.ஐ. போன்ற டிஜிட்டல் பணப் பரிவர்த்தனை அமைப்புகள் பொதுமக்களின் அன்றாட வாழ்க்கையில் முக்கிய இடத்தைப் பெற்றுள்ள நிலையில், அவற்றை கூடுதல் செலவு இல்லாமல் பயன்படுத்தும் சூழல் தொடர வேண்டும்.எனவே, யு.பி.ஐ. பணப் பரிவர்த்தனைகளுக்கு கட்டணம் விதிக்கும் முடிவை மத்திய அரசு உடனடியாக மறுபரிசீலனை செய்து திரும்பப் பெற வேண்டும்.

மக்கள் நலனை கருத்தில் கொண்டு, டிஜிட்டல் பணப் பரிவர்த்தனைகள் தொடர்ந்து இலவசமாக இருக்கும் வகையில் நடவடிக்கை எடுக்க வேண்டும்.யு.பி.ஐ. கட்டமைப்பை லாப நோக்கில் பெரிய நிறுவனங்களுக்கு சாதகமாக மாற்றாமல், பொதுமக்கள் மற்றும் சிறு வணிகர்களின் நலனை பாதுகாக்கும் வகையில் செயல்படுத்த வேண்டும் என்று மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயற்குழு சார்பில் வலியுறுத்தப்படுகிறது.இவ்வாறு பெ.சண்முகம் தனது அறிக்கையில் தெரிவித்துள்ளார்.