தமிழக சட்டசபைத் தேர்தல் நெருங்கி வரும் நிலையில், அரசியல் களம் இப்போது முழுமையாக தேர்தல் மோடுக்கு மாறியுள்ளது. கூட்டணி கணக்குகள், விருப்ப மனு அரசியல், பிரசார உத்திகள், பொதுக்கூட்டங்கள், தேர்தல் அறிக்கை வடிவமைப்பு என அனைத்துக் கட்சிகளும் ஒரே நேரத்தில் களத்தில் இறங்கி, தேர்தல் சூட்டைக் கூட்டி வருகின்றன.

இந்தச் சூழலில், தமிழக பா.ஜ.க. சட்டமன்ற தேர்தல் ஒருங்கிணைப்பாளராக நியமிக்கப்பட்டுள்ள மத்திய அமைச்சர் பியூஷ் கோயல், இன்று அரசியல் முக்கியத்துவம் வாய்ந்த சென்னை வருகையை மேற்கொண்டார்.

தியாகராய நகரில் உள்ள பாஜக மாநில அலுவலகத்தில், கட்சியின் மூத்த தலைவர்கள் மற்றும் நிர்வாகிகளுடன் அவர் தீவிர ஆலோசனையில் ஈடுபட்டார். இதில், தமிழகத்தின் தற்போதைய அரசியல் களநிலை, தொகுதி வாரியான வெற்றி வாய்ப்புகள், கூட்டணி உத்திகள் மற்றும் பிரசார பாதை வரைபடம் ஆகியவை விரிவாக விவாதிக்கப்பட்டதாக தெரிவிக்கப்படுகிறது.

இதனைத் தொடர்ந்து, தமிழக அரசியலில் முக்கிய திருப்பமாக, அதிமுக பொதுச் செயலாளர் எடப்பாடி பழனிசாமியை பியூஷ் கோயல் நேரில் சந்தித்து பேச்சுவார்த்தை நடத்தி வருகிறார். சென்னை எம்.ஆர்.சி. நகரில் உள்ள நட்சத்திர ஹோட்டலில் நடைபெறும் இந்த சந்திப்பு, அரசியல் வட்டாரங்களில் பெரும் எதிர்பார்ப்பையும், பரபரப்பையும் ஏற்படுத்தியுள்ளது.

இந்த பேச்சுவார்த்தையின் மையமாக, தேசிய ஜனநாயக கூட்டணியை மறுசீரமைப்பது, தொகுதி பங்கீட்டை இறுதி செய்வது, மற்றும் ஒற்றுமையான தேர்தல் அணியை உருவாக்குவது ஆகியவை இடம் பெற்றுள்ளதாக தகவல்கள் தெரிவிக்கின்றன.

இந்தச் சந்திப்பில், எடப்பாடி பழனிசாமியுடன் அதிமுக முன்னாள் அமைச்சர்கள் கே.பி. முனுசாமி, தங்கமணி, எஸ்.பி. வேலுமணி, திண்டுக்கல் சீனிவாசன் ஆகியோர் பங்கேற்று, ஆலோசனைகளில் ஈடுபட்டு வருகின்றனர்.

மேலும், டிடிவி தினகரன், ஓ. பன்னீர்செல்வம் உள்ளிட்ட அரசியல் தலைவர்களை மீண்டும் தேசிய ஜனநாயக கூட்டணிக்குள் இணைப்பது குறித்தும், கடந்த கால கூட்டணிகளில் இருந்த சிறு கட்சிகளை ஒரே அரசியல் மேடையில் கொண்டு வருவது குறித்தும் தீவிர பேச்சுவார்த்தை நடைபெற்று வருவதாக அரசியல் வட்டாரங்கள் தெரிவிக்கின்றன.

இந்த தகவல்களின் படி, அதிமுகவிடம் இருந்து 30 முதல் 40 தொகுதிகள் வரை பாஜக கோரிக்கை வைக்கக்கூடும் என்றும், அதனுடன் இணையும் சிறு கட்சிகளுக்காக சேர்த்து 50 தொகுதிகள் வரை பாஜக இலக்கு நிர்ணயித்துள்ளதாகவும் தெரிவிக்கப்படுகிறது.

ஆனால், இந்த உயர்மட்ட பேச்சுவார்த்தையின் முடிவுகள் வெளியாகிய பின்னரே, தமிழக தேர்தல் கூட்டணியின் இறுதி வடிவம் தெளிவாகும் என எதிர்பார்க்கப்படுகிறது.