நடந்து முடிந்த சட்டமன்றத் தேர்தலின் வாக்குப்பதிவு நாளில், சென்னை தொகுதிக்குட்பட்ட ஒரு வாக்குச்சாவடி பகுதியில் திடீர் பதற்ற சூழல் நிலவியதால் பரபரப்பு ஏற்பட்டது. அப்போது தமிழக வெற்றிக் கழகம் சார்பில் போட்டியிட்ட வேட்பாளர் சினோரா அசோக் ஆதரவாளர்களுக்கும், சேகர் பாபு ஆதரவாளர்களுக்கும் இடையே கடும் வாக்குவாதம் வெடித்ததாக தெரிவிக்கப்படுகிறது.

வாக்குச்சாவடி வளாகத்திற்கு வெளியே ஏற்பட்ட இந்த மோதல் சூழல் சில நிமிடங்களில் தீவிரமடைந்து, இரு தரப்பினரும் நேரடியாக மோதிக்கொள்ளும் நிலை உருவானதாக கூறப்படுகிறது. தேர்தல் நடைபெறும் முக்கிய தருணத்தில் ஏற்பட்ட இந்த சம்பவம் அப்பகுதியில் பரபரப்பை ஏற்படுத்தியது.

மேலும், தவெக வேட்பாளர் சினோரா அசோக்கை அச்சுறுத்தும் விதமாகவும், தேர்தல் நடைமுறைகளை மீறும் வகையிலும் சேகர் பாபு தரப்பினர் செயல்பட்டதாக குற்றச்சாட்டுகள் எழுந்திருந்தன.

இந்த சம்பவம் தொடர்பாக தவெக தரப்பில் கடும் எதிர்ப்பு தெரிவிக்கப்பட்டது.இதனைத் தொடர்ந்து, சம்பவம் குறித்து சினோரா அசோக் தரப்பில் வடக்கு கடற்கரை காவலர்கள் நிலையத்தில் அதிகாரப்பூர்வ புகார் அளிக்கப்பட்டது.

அந்த புகாரின் அடிப்படையில், வாக்குப்பதிவு நாளில் துறைமுகம் தொகுதி தவெக வேட்பாளர் சினோரா அசோக் உள்ளிட்டோருக்கு எதிராக தாக்குதல் நடத்தப்பட்டதாகக் கூறி, திமுக எம்.எல்.ஏ. சேகர் பாபு மீது வழக்குப்பதிவு செய்யப்பட்டுள்ளதாக தெரிவிக்கப்படுகிறது.

இதன்படி, சட்டவிரோதமாக கூடுதல், பொது அமைதிக்கு பாதிப்பு ஏற்படுத்துதல், மிரட்டல் விடுத்தல் உள்ளிட்ட 4 முக்கிய சட்டப் பிரிவுகளின் கீழ் வடக்கு கடற்கரை காவலர்கள் நிலையத்தில் வழக்குப்பதிவு செய்யப்பட்டுள்ளதாக தகவல்கள் வெளியாகியுள்ளன.