மதுரை விமான நிலையத்தில் இன்று (செப். 22) செய்தியாளர்களை சந்தித்த தமிழக பாஜக தலைவர் நயினார் நாகேந்திரன், அண்ணாமலை புதிய கட்சி தொடங்குவதாக ஒட்டப்பட்ட போஸ்டர்கள் குறித்து விளக்கம் அளித்தார்.

நயினார் நாகேந்திரன் கூறியது:அண்ணாமலை பாஜகவில்தான் இருக்கிறார் — “அண்ணாமலை எங்கள் கட்சியின் முன்னாள் தலைவர். இப்போதும் பாஜகவில்தான் உள்ளார். புதிய கட்சி தொடங்குவதாகும் தகவல்கள்  (எல்லாம்) திமுகவின் வேலை. திமுகவினர் இத்தகைய வதந்திகளை பரப்புகிறார்கள்” என்றார்.

போஸ்டர்களை யார் ஒட்டினர் என்பது தெரியவில்லை என்றும், அதை பெரிதாக எடுத்துக் கொள்ளத் தேவையில்லை என்றும் தெரிவித்தார்.ஓ.பி.எஸ், டிடிவி தினகரன் போன்றவர்கள் மீண்டும் கூட்டணிக்குள் வர விரும்பினால், அவர்களைச் சேர்த்துக் கொள்வோம் எனவும் குறிப்பிட்டார்.

விஜய் குறித்த கேள்விக்கு:“மீனவர் பிரச்சினையில் விஜய் பாஜகவை விமர்சித்துள்ளார். ஆனால் காங்கிரஸ், திமுக கூட்டணிக் காலத்தில் எத்தனை மீனவர்கள் உயிரிழந்தனர் என்பது மக்களுக்கு தெரியும். பிரதமர் மோடி ஆட்சியில் தூக்குத் தண்டனைக்குப் போக இருந்த மீனவர்களையும் மீட்டோம்.

விஜய் இதுவரை எந்தத் தேர்தலையும் சந்திக்கவில்லை. வந்தவுடன் ஆட்சிக்கு வந்துவிடுவோம் என நினைப்பது தவறு. மக்கள் எதை நினைத்து அவருக்கு வாக்களிப்பார்கள் என்பதை சிந்தித்து பேச வேண்டும்” என்றார்.

அண்ணாமலை, பாஜக தலைவராக இருந்த காலத்தில் மாநில அளவில் பெரும் தாக்கத்தை ஏற்படுத்தினார். ஆனால், அவரது பதவிக்காலம் முடிவடைந்ததை அடுத்து புதிய தலைவராக நயினார் நாகேந்திரன் தேர்வு செய்யப்பட்டார்.

அண்ணாமலை பாஜகவில் ஒதுக்கப்பட்டுவிட்டாரா? என்ற கேள்வி எழுந்திருந்தது. சமீபத்தில் அவர் கோவையில் கோடி கணக்கில் நிலம் வாங்கிய விவகாரமும், சில கூட்டங்களில் பங்கேற்காததும் அரசியல் வட்டாரங்களில் சந்தேகங்களை தூண்டியது.

இதற்கிடையே அண்ணாமலை புதிய கட்சி தொடங்குவதாக போஸ்டர்கள் ஒட்டப்பட்டதால், புதிய பரபரப்பு ஏற்பட்டது.

ஆனால் நயினார் நாகேந்திரன் இன்று தெளிவாக “அண்ணாமலை பாஜகவில்தான் இருக்கிறார், புதிய கட்சி தொடங்குவதாகும் செய்திகள் எல்லாம் வதந்தி” என்று மறுத்துள்ளார்.