அதிமுக முன்னாள் எம்.எல்.ஏ.வான ராஜவர்மன், தான் விரைவில் நடிகர் விஜய் தொடங்கிய தமிழக வெற்றிக் கழகத்தில் (தவெக) இணையவுள்ளதாகப் பரவிய தகவலுக்குச் சமூக வலைதளம் மூலம் கடும் கண்டனம் தெரிவித்துள்ளார்.

அதிமுக முன்னாள் அமைச்சர் செங்கோட்டையன் தவெக-வில் இணைந்ததைத் தொடர்ந்து, விருதுநகர் மாவட்டத்தைச் சேர்ந்த முன்னாள் அமைச்சர் ஒருவர் தலைமையில் ராஜவர்மன் உள்ளிட்டோர் தவெக-வில் இணையவுள்ளதாகத் தகவல்கள் வெளியாகின.

இதற்கு மறுப்பு தெரிவித்துள்ள ராஜவர்மன், தவெக-வுக்கு ஓடத் தயாராகும் அதிமுக முன்னாள் அமைச்சர்கள் என்ற தகவல் முற்றிலும் தவறானது என்று குறிப்பிட்டுள்ளார். மேலும், இந்தச் செய்தியில் தனது பெயரை வெளியிட்டது தமது நற்பெயருக்குக் களங்கம் விளைவிப்பதாக அமைந்துள்ளது என்றும் அவர் தெரிவித்துள்ளார்.

அவர் தனது முகநூல் பதிவில், "விட்டில் பூச்சியை நம்பி கலங்கரை விளக்கை விட்டு எப்படி செல்வேன்?" என்று கேள்வியெழுப்பி, தவெக-வில் இணைவது குறித்த தகவலை மறுத்துள்ளார்.

மேலும், "முன்னாள் அமைச்சர் ஒருவரின் தூண்டுதலால் இச்செய்தி வெளியிடப்பட்டிருப்பதாக உணர்கிறேன்" என்று குறிப்பிட்டு, முன்னாள் அமைச்சர் கே.டி.ராஜேந்திர பாலாஜியை மறைமுகமாகச் சாடியுள்ளார். இந்த உள்கட்சி விவாதம் விருதுநகர் மாவட்ட அதிமுக வட்டாரத்தில் பரபரப்பை ஏற்படுத்தியுள்ளது.