பீட்ரூட் என்றாலே அதன் அடர்ந்த சிவப்பு நிறமும், இயற்கையான இனிப்புச் சுவையும் முதலில் நினைவுக்கு வரும். பல்வேறு சத்துக்களை கொண்ட இந்தக் காய்கறியை சில குழந்தைகள் விரும்பி சாப்பிடுவதில்லை. ஆனால், வழக்கமான சமையல் முறையைத் தாண்டி, பீட்ரூட்டை வைத்து சுவையான இனிப்பு வகைகளைச் செய்து கொடுத்தால் குழந்தைகள் ஆர்வத்துடன் சாப்பிடுவார்கள்.அந்த வகையில் வீட்டிலேயே எளிதாகச் செய்து ருசிக்கக்கூடிய பீட்ரூட் அல்வா மற்றும் பீட்ரூட் ஜெல்லி தயாரிக்கும் முறையைப் பார்க்கலாம்.

பீட்ரூட் அல்வா
வழக்கமாகச் செய்யப்படும் அல்வாவுக்கு பதிலாக பீட்ரூட்டை வைத்து தயாரிக்கப்படும் இந்த அல்வா, கண்ணைக் கவரும் நிறத்திலும், மணமிக்க சுவையிலும் இருக்கும். பீட்ரூட்டின் இயற்கையான இனிப்புடன் பால், நெய், முந்திரி, ஏலக்காய் ஆகியவை சேரும்போது அல்வாவின் சுவை மேலும் சிறப்பாகிறது.

தேவையான பொருட்கள்
பீட்ரூட் – 250 கிராம்
பசும்பால் – அரை லிட்டர்
சர்க்கரை – தேவையான அளவு
முந்திரி – தேவையான அளவு
உலர் திராட்சை – தேவையான அளவு
நெய் – தேவையான அளவு
உப்பு – சிறிதளவு
ஏலக்காய்த்தூள் – தேவையான அளவு

செய்முறை
முதலில் பீட்ரூட்டை நன்றாகக் கழுவி, தோலை நீக்கிக் கொள்ள வேண்டும். பின்னர் அதைத் துருவி தனியாக வைத்துக் கொள்ளவும்.அடிகனமான வாணலியை அடுப்பில் வைத்து சிறிதளவு நெய் ஊற்றவும். அதில் முந்திரி மற்றும் உலர் திராட்சையைப் போட்டு பொன்னிறமாக வறுத்து தனியாக எடுத்து வைக்கவும்.அதே வாணலியில் தேவையான அளவு நெய் சேர்த்து, துருவி வைத்துள்ள பீட்ரூட்டை போட்டு நன்றாக வதக்க வேண்டும். பீட்ரூட் சிறிது வதங்கியதும் தேவையான அளவு நீர் ஊற்றி மூடி வைத்து மிதமான தீயில் வேகவிடவும்.பீட்ரூட் நன்கு வெந்ததும் அதில் பசும்பாலை ஊற்றி நன்றாகக் கிளற வேண்டும். பால் பீட்ரூட்டுடன் கலந்து சற்று வற்றும் வரை மிதமான தீயில் வேகவிடவும்.பின்னர் சர்க்கரையைச் சேர்த்து தொடர்ந்து கிளற வேண்டும். பீட்ரூட்டும் பாலும் ஒன்றாகக் கலந்து கெட்டியாகத் தொடங்கியதும் ஏலக்காய்த்தூள், வறுத்த முந்திரி, உலர் திராட்சை ஆகியவற்றைச் சேர்க்கவும்.இறுதியாக சிறிதளவு உப்பு சேர்த்து நன்றாகக் கிளறினால் மணமும் சுவையும் நிறைந்த பீட்ரூட் அல்வா தயார்.வாணலியின் அடிப்பகுதியில் ஒட்டாமல், அல்வா ஒன்றாகத் திரண்டு வரும் நிலையே சரியான பதமாகும். சூடாகவும் பரிமாறலாம்; ஆறிய பிறகும் சுவையாக இருக்கும்.

பீட்ரூட் ஜெல்லி
கடைகளில் கிடைக்கும் இனிப்பு வகைகளுக்குப் பதிலாக, வீட்டிலேயே பீட்ரூட்டை வைத்து எளிய முறையில் தயாரிக்கக்கூடிய மற்றொரு சிற்றுண்டி வகைதான் பீட்ரூட் ஜெல்லி.பீட்ரூட்டின் இயற்கையான நிறத்தில் தயாராகும் இந்த ஜெல்லி, குழந்தைகளைக் கவரும் தோற்றத்துடன் இருக்கும். வீட்டில் கிடைக்கும் பொருட்களைக் கொண்டு எளிதாகச் செய்ய முடிவதும் இதன் சிறப்பாகும்.

தேவையான பொருட்கள்
பீட்ரூட் – அரை கிலோ
அகர் அகர் – 50 கிராம்
சர்க்கரை – தேவையான அளவு
நீர் – தேவையான அளவு

செய்முறை
முதலில் பீட்ரூட்டை நன்றாகக் கழுவி, தோலை நீக்கிக் கொள்ள வேண்டும். பின்னர் சிறு துண்டுகளாக நறுக்கி அரைக்கும் பாத்திரத்தில் போட்டு நன்றாக அரைக்கவும்.அரைத்த பீட்ரூட்டை வடிகட்டி அதன் சாற்றை மட்டும் தனியாக எடுத்துக் கொள்ள வேண்டும்.அடிகனமான பாத்திரத்தில் தேவையான அளவு நீரை ஊற்றி, அதில் அகர் அகரைச் சேர்த்து நன்றாகக் கரைக்கவும். அகர் அகர் முழுமையாகக் கரைந்ததும் தேவையான அளவு சர்க்கரையைச் சேர்த்து கலக்க வேண்டும்.பின்னர் வடிகட்டி வைத்துள்ள பீட்ரூட் சாற்றை ஊற்றி, அனைத்தும் ஒன்றாகக் கலந்து கொதிக்க விடவும். கலவை நன்றாகக் கொதித்ததும் அடுப்பை அணைத்து சிறிது நேரம் ஆறவிட வேண்டும்.அதன்பிறகு தயாரித்த கலவையை விருப்பமான வடிவிலான அச்சில் ஊற்றி, இரண்டு முதல் மூன்று மணி நேரம் குளிரவிடவும். நன்றாக இறுகியதும் அச்சில் இருந்து எடுத்து பரிமாறலாம்.அடர்ந்த சிவப்பு நிறத்தில் பார்ப்பதற்கே அழகாக இருக்கும் பீட்ரூட் ஜெல்லி, குழந்தைகளுக்கு புதிய சுவை அனுபவத்தைத் தரும்.

காய்கறியைத் தவிர்க்கும் குழந்தைகளுக்கு சுவையான வழி!
பீட்ரூட்டை நேரடியாக சாப்பிட விரும்பாத குழந்தைகளுக்கு, அதை அல்வா அல்லது ஜெல்லி போன்ற இனிப்பு வகைகளில் சேர்த்துக் கொடுப்பது ஒரு மாற்று வழியாக இருக்கலாம். குறிப்பாக வீட்டிலேயே தயாரிப்பதால் தேவையான இனிப்பின் அளவை நாமே கட்டுப்படுத்த முடியும்.பீட்ரூட்டின் இயற்கையான நிறம், இனிப்புச் சுவை மற்றும் புதிய வடிவம் ஆகியவற்றை ஒன்றாக இணைத்து தயாரிக்கப்படும் இந்த இரண்டு வகை இனிப்புகளும் குழந்தைகளின் உணவுப் பட்டியலில் வித்தியாசமான தேர்வாக அமையும்.பீட்ரூட்டை தட்டில் வைத்தால் குழந்தைகள் முகம் சுளிக்கிறார்களா? அப்படியானால், இந்த இரண்டு இனிப்புகளில் ஒன்றைச் செய்து கொடுத்து பாருங்கள்... நிறம் பார்த்தே ஆர்வத்துடன் ருசிக்கத் தொடங்கிவிடுவார்கள்!