தமிழகச் சட்டமன்றத் தேர்தல் 2026-க்கான வேட்புமனுக்கள் மீதான பரிசீலனை இன்று  மாநிலம் முழுவதும் நடைபெற்று வரும் வேளையில், தலைநகர் சென்னையில் ஒரு முக்கியத் திருப்பம் ஏற்பட்டுள்ளது. தமிழக வெற்றிக் கழகத்தின் தேர்தல் பிரசார மேலாண்மைப் பொதுச்செயலாளரும், வில்லிவாக்கம் தொகுதியின் நட்சத்திர வேட்பாளருமான ஆதவ் அர்ஜுனாவின் வேட்புமனுவைத் தேர்தல் அதிகாரிகள் தற்காலிகமாக நிறுத்தி வைத்துள்ளனர்.

இது தவெக தொண்டர்களிடையே பெரும் அதிர்ச்சியையும், பரபரப்பையும் ஏற்படுத்தியுள்ளது.

வில்லிவாக்கம் தொகுதியில் திமுக வேட்பாளர் கார்த்திக் மோகன் மற்றும் அதிமுக வேட்பாளர்களை எதிர்த்துத் தீவிரமாகக் களம் இறங்கியுள்ள ஆதவ் அர்ஜுனா, நடிகர் விஜய்யின் நம்பிக்கைக்குரிய தளபதியாகப் பார்க்கப்படுகிறார்.

இன்று காலை தேர்தல் நடத்தும் அலுவலர் முன்னிலையில் வேட்புமனுக்கள் ஆய்வு செய்யப்பட்டபோது, திமுக தரப்பிலிருந்து ஆதவ் அர்ஜுனாவின் மனுவிற்கு கடும் எதிர்ப்பு தெரிவிக்கப்பட்டது. குறிப்பாக, அவர் தனது பிரமாணப் பத்திரத்தில் (Affidavit) குறிப்பிட்டுள்ள சொத்து விவரங்களில் குளறுபடிகள் இருப்பதாகவும், சில முக்கியத் தகவல்களை அவர் மறைத்துள்ளதாகவும் புகார்கள் முன்வைக்கப்பட்டன.

ஆதவ் அர்ஜுனா, லாட்டரி அதிபர் சாண்டியாகோ மார்ட்டினின் மருமகன் என்பது குறிப்பிடத்தக்கது. அவரது குடும்பத்தின் ஒட்டுமொத்த சொத்து மதிப்பு மற்றும் தேர்தல் பத்திரங்கள் தொடர்பான விவகாரங்களைக் குறிப்பிட்டு, அவரது மனுவை நிராகரிக்க வேண்டும் என்று எதிர்க்கட்சிகள் வலியுறுத்தின. இதையடுத்து, தேர்தல் அதிகாரிகள் அவரது மனு மீதான முடிவைத் தற்காலிகமாக நிறுத்தி வைத்தனர். இது குறித்து விளக்கம் அளிக்க ஆதவ் அர்ஜுனா மற்றும் அவரது வழக்கறிஞர்களுக்குக் கூடுதல் கால அவகாசம் வழங்கப்பட்டுள்ளது.

தவெக தலைவர் விஜய்யின் வேட்புமனு ஏற்கனவே ஏற்றுக்கொள்ளப்பட்டுள்ள நிலையில், கட்சியின் முக்கிய வியூக வகுப்பாளரான ஆதவ் அர்ஜுனாவின் மனு நிறுத்தப்பட்டிருப்பது கட்சிக்கு ஒரு பின்னடைவாகப் பார்க்கப்படுகிறது. இருப்பினும், "அனைத்து ஆவணங்களும் முறையாக உள்ளன, சட்டரீதியாக இதை எதிர்கொண்டு மனுவை உறுதி செய்வோம்" என்று தவெக நிர்வாகிகள் நம்பிக்கை தெரிவித்துள்ளனர். இன்று மாலைக்குள் இதற்கான இறுதி முடிவு வெளியாகும் என எதிர்பார்க்கப்படுகிறது.