தமிழக அரசியல் சூழல் சூடுபிடித்துள்ள நிலையில், நடிகர் விஜய் தொடர்பான திரைப்படங்கள் புதிய சர்ச்சையை கிளப்பியுள்ளன. விஜய் நடித்துள்ள ‘ஜன நாயகன்’ திரைப்படம் தேர்தலுக்கு முன் வெளியானால் அரசியல் தாக்கம் ஏற்படும் என்ற காரணத்தால், அந்த படத்தை ஆய்வு செய்ய மத்திய சான்றிதழ் வாரியத்துக்கு தேர்தல் ஆணையம் அறிவுறுத்தியதாக கூறப்படுகிறது. ஆனால் இதுவரை அந்த படத்திற்கு சான்றிதழ் வழங்கப்படவில்லை.

இதற்கிடையில், தேர்தலை முன்னிட்டு விஜய்க்கு எதிரான கருத்துகளை முன்வைக்கும் வகையில் சில திரைப்படங்கள் வெளியாகி வருவது கவனத்தை ஈர்த்துள்ளது. ஏற்கனவே நட்டி நட்ராஜ் நடித்த ‘தங்க நட்சத்திரம்’ திரைப்படம் சர்ச்சையை ஏற்படுத்திய நிலையில், தற்போது ‘தமிழக வெற்றி கழகம்’ என்ற பெயரையே தலைப்பாகக் கொண்டு புதிய திரைப்படம் உருவாக்கப்பட்டுள்ளது.

இந்த புதிய திரைப்படத்தின் முன்னோட்டம் சமூக வலைத்தளங்களில் வேகமாக பரவி வருகிறது. அதில், ஒரு ஊரில் தேர்தல் பிரச்சாரத்தின் போது ஏற்பட்ட கூட்ட நெரிசலில் பலர் உயிரிழந்த சம்பவத்தை மையமாக வைத்து கதை உருவாக்கப்பட்டுள்ளது. இது நேரடியாக விஜயை குறிவைக்கும் முயற்சியா என்ற கேள்வி எழுந்துள்ளது.

தேர்தல் நேரத்துல அரசியல் பேசுற ஜனநாயகன் படம் வரக்கூடாது... ஆனா விஜய குறிவச்சு எடுக்குற எந்த அரசியல் படம் வேணாலும் வரலாம்.
நல்லா இருக்குடா டேய் உங்க சட்டம்😒#TVK @TNelectionsCEO pic.twitter.com/qmmDVEdmwN

— Ꮮᴇɢᴇɴᴅᵀⱽᴷ ·〇 ̶͞ᐟ ✨ (@LegenD_AK_tweet) April 5, 2026

கரூர் பகுதியில் ஏற்பட்ட கூட்ட நெரிசல் சம்பவத்தில் பலர் உயிரிழந்த வழக்கு மத்திய விசாரணையில் உள்ள நிலையில், அதனை அடிப்படையாகக் கொண்டு இப்படம் உருவாக்கப்பட்டிருப்பது விமர்சனத்துக்குள்ளாகியுள்ளது. இதுபோன்ற திரைப்படங்கள் அவசரமாக தயாரித்து வெளியிடப்படுவது திட்டமிட்ட நடவடிக்கையா என விஜய் ஆதரவாளர்கள் சந்தேகம் வெளியிட்டுள்ளனர்.

விஜய் தொடர்ந்து அரசியல் களத்தில் செயல்பட்டு வருவதால், அவரை குறிவைத்து இத்தகைய திரைப்படங்கள் உருவாக்கப்படுகின்றனவா என்ற கேள்வியும் எழுந்துள்ளது. இதனால், தேர்தல் சூழலில் திரைப்படங்களும் அரசியல் ஆயுதமாக மாறிவிட்டன என்ற கருத்து வலுப்பெற்று வருகிறது.

இந்நிலையில், ‘ஜன நாயகன்’ திரைப்படம் எப்போது வெளியாகும் என்ற எதிர்பார்ப்பு அதிகரித்துள்ளது. இதுவரை எந்த அதிகாரப்பூர்வ அறிவிப்பும் வெளியாகாத நிலையில், தேர்தல் முடிந்த பின்னர் அந்த படத்திற்கு அனுமதி கிடைத்து வெளியீடு நடைபெறும் என எதிர்பார்க்கப்படுகிறது.

மேலும், ஏப்ரல் 14ஆம் தேதி நடைபெறவுள்ள சிறப்பு நிகழ்ச்சி மூலம் விஜய் மக்கள் முன்னிலையில் தோன்றுவார் என்ற தகவலும் பரவி வருகிறது. தேர்தல் களத்தில் அரசியல் மற்றும் திரைப்படம் இணைந்து உருவாக்கும் இந்த புதிய சூழல், எதிர்காலத்தில் எந்த மாற்றத்தை ஏற்படுத்தும் என்பது கவனிக்கத்தக்கதாக உள்ளது.