தொடர்ந்து ஒரு தசாப்த காலம் 1995 முதல் 2005 வரை வடஇந்திய மாநிலங்களைச் சேர்ந்த பவாரியா கொள்ளையர்கள் தமிழகத்தில் கொலை, கொள்ளை சம்பவங்களால் கண்மூடித்தனமான அச்சத்தை விதைத்தனர். அவர்களால் நடத்தப்பட்ட பல வன்முறைகளில், மிகப் பரபரப்பை ஏற்படுத்தியது 2005 ஆம் ஆண்டு கும்மிடிப்பூண்டி தொகுதி அ.தி.மு.க. எம்.எல்.ஏ சுதர்சனின் படுகொலை.

வீட்டிற்குள் நுழைந்து தாராளமாக சுட்டுக்கொன்ற அவர்கள், அங்கிருந்த நகைகளை பறித்துச் சென்று தமிழகத்தை அதிரவைத்தனர்.இதற்கு பதிலளித்த அப்போதைய முதல்-அமைச்சர் ஜெயலலிதா, “எப்படி இருந்தாலும் பிடிக்க வேண்டும்” எனக் கடுமையான உத்தரவு பிறப்பித்தார்.

பின்னர் ஐ.ஜி. ஜாங்கிட் தலைமையில் அமைக்கப்பட்ட சிறப்பு தனிப்படை, வெறும் ஒரு மாதத்தில் ராஜஸ்தான், அரியானா பகுதிகளில் பதுங்கியிருந்த 9 பவாரியா கொள்ளையர்களைக் கைது செய்து தமிழகத்துக்கு கொண்டு வந்தது.

கைதான 9 பேரில், 3 பேர் ஜாமீனில் வெளியேறி தலைமறைவாக, 2 பேர் சிறையிலேயே உயிரிழந்து, தற்போது ஜெகதீஷ், ராகேஷ், அசோக் மற்றும் ஜாமீனில் இருக்கும் ஜெயில்தார் சிங் ஆகிய 4 பேர் மட்டும் நீதிமன்றத்தில் வழக்கை எதிர்கொண்டு வருகின்றனர்.

சுமார் 20 ஆண்டுகளுக்குப் பின், சென்னை கூடுதல் நீதிமன்றத்தில் கடந்த 21 ஆம் தேதி தீர்ப்பு வெளியானது. அதில், பவாரியா கும்பல் உறுப்பினர்கள் ஜெகதீஷ், ராகேஷ், அசோக் ஆகியோர் குற்றவாளிகள் என அறிவிக்கப்பட்டனர்.

இந்தியாவை அதிரவைத்த அந்த வழக்கின் இறுதி அத்தியாயமாக, குற்றவாளிகளின் தண்டனை விவரம் இன்றே (24 ஆம் தேதி) நீதிமன்றம் மூலம் அறிவிக்கப்பட உள்ளது.