மேற்குத் தொடர்ச்சி மலைகளின் உயரமான பகுதிகளில் காணப்படும் அரிய வன உயிரினமான நீலகிரி வரையாடு, மனிதர்களின் தலையீடு மற்றும் வாழ்விட அழிவால் ஒரு கட்டத்தில் எண்ணிக்கை குறைந்து அழிவின் விளிம்பை நோக்கிச் சென்றது. ஆனால், கேரளாவின் இடுக்கி மாவட்டத்தில் உள்ள வரையாட்டுமுடி மலைப்பகுதியில் இயற்கை சூழல் பாதுகாக்கப்பட்டதன் விளைவாக, தற்போது இந்த உயிரினத்தின் எண்ணிக்கை பல மடங்கு அதிகரித்து வருவதாக தெரிவிக்கப்படுகிறது.

நீலகிரி வரையாடு என்பது ஆட்டினத்தைச் சேர்ந்த ஒரு காட்டுயிரினமாகும். கேரளா மற்றும் தமிழ்நாட்டின் மேற்குத் தொடர்ச்சி மலைகளின் தென்பகுதிகளில் இவை பெருமளவில் காணப்படுகின்றன. பாறைகள் நிறைந்த உயரமான மலைச்சரிவுகள், பசுமையான புல்வெளிகள் மற்றும் இயற்கை நீராதாரங்கள் அமைந்த பகுதிகள் வரையாடுகளின் முக்கிய வாழ்விடங்களாக உள்ளன.

பொதுவாக, வன உயிரினங்கள் வாழும் பகுதிகளில் உணவு, நீர் மற்றும் பாதுகாப்பு போன்ற அடிப்படை தேவைகள் குறையும்போது அவற்றின் எண்ணிக்கை படிப்படியாக சரிவடையும். அதிலும் மனிதர்களின் அத்துமீறல் அதிகரித்து, இயற்கையான வாழ்விடங்கள் அழிக்கப்படும்போது பல உயிரினங்கள் அழிவின் அபாயத்தை எதிர்கொள்ள வேண்டிய நிலை ஏற்படுகிறது.

வரையாடுகளின் எண்ணிக்கை குறைந்ததற்கு முக்கிய காரணங்களில் ஒன்றாக அவற்றின் இயற்கையான வாழ்விடங்கள் சிதைக்கப்பட்டதும் குறிப்பிடப்படுகிறது. பரந்து விரிந்த புல்வெளிகள் அகற்றப்பட்டு காய்கறித் தோட்டங்கள் உருவாக்கப்பட்டன. மேலும், வரையாடுகள் ஓய்வெடுக்கவும் மறைவிடமாகவும் பயன்படுத்திய குள்ள மரங்கள் வெட்டப்பட்டதால் அவற்றின் இயற்கையான தங்குமிடங்களும் குறைந்தன.

இதனால் சுதந்திரமாக நடமாடுவதற்கான பரப்பளவு சுருங்கியது. உணவு மற்றும் பாதுகாப்புக்கான வாய்ப்புகள் குறைந்ததால் அவற்றின் இயல்பான வாழ்க்கை முறையும் பாதிக்கப்பட்டது. இதன் தொடர்ச்சியாக நோய்த்தாக்குதல்கள் அதிகரித்து, இனப்பெருக்க நடவடிக்கைகளிலும் பாதிப்பு ஏற்பட்டதாக சுற்றுச்சூழல் ஆர்வலர்கள் தெரிவிக்கின்றனர்.கேரளாவின் இடுக்கி மாவட்டத்தில் அமைந்துள்ள வரையாட்டுமுடி மலைப்பகுதி, வரையாடுகளுக்கு ஏற்ற இயற்கை வாழ்விடமாக திகழ்கிறது.

இங்கு மனிதர்களின் குறுக்கீடு குறைவாக இருப்பதுடன், பசுமையான புல்வெளிகள், இயற்கையான நீராதாரங்கள், தூய்மையான காற்றோட்டம் மற்றும் பாதுகாப்பான மலைப்பகுதிகள் போன்றவை தொடர்ந்து காணப்படுகின்றன.குறிப்பாக, இனப்பெருக்கத்திற்கு ஏற்ற அமைதியான சூழல் நிலவுவதால் வரையாடுகள் அச்சமின்றி வாழவும், புதிய தலைமுறையை உருவாக்கவும் வாய்ப்பு கிடைத்துள்ளது.

இதன் விளைவாகவே வரையாடுகளின் எண்ணிக்கை கணிசமாக உயர்ந்துள்ளதாக சுற்றுச்சூழல் ஆர்வலரும் புகைப்படக் கலைஞருமான இந்திரஜித் கோர்படே தெரிவித்துள்ளார்.வரையாடுகளின் வாழ்விடத்திற்கு ஏற்ற வகையில் பசுமையான புல்வெளிகள், குள்ள மரங்கள், உணவு, நீர் மற்றும் பாதுகாப்பான இனப்பெருக்க இடங்கள் ஆகிய அனைத்தும் ஒருங்கிணைந்து காணப்படும் மலைப்பகுதிகளே அவற்றின் முக்கிய வாழ்விடங்களாக உள்ளன.

மனிதர்கள் உருவாக்கும் செயற்கையான மாற்றங்களுக்கு ஏற்ப தங்களை மாற்றிக்கொள்ளும் திறன் சில விலங்குகளுக்கு இருந்தாலும், வரையாடு போன்ற குறிப்பிட்ட வாழ்விடத்தைச் சார்ந்த உயிரினங்களுக்கு இயற்கையான சூழலை பாதுகாப்பதே அவற்றின் எதிர்காலத்தை உறுதி செய்யும் முக்கிய வழியாகும்.வரையாடுகளுக்கு ஏற்பட்ட இந்த மீட்சி, ஒரு குறிப்பிட்ட உயிரினத்தின் வளர்ச்சி மட்டுமல்ல; இயற்கையை பாதுகாத்தால் அழிவை எதிர்கொள்ளும் வன உயிரினங்களையும் மீண்டும் செழிக்கச் செய்ய முடியும் என்பதற்கான சிறந்த எடுத்துக்காட்டாக அமைந்துள்ளது.

வளர்ச்சிப் பணிகள், வன உயிரினங்களின் வாழ்விடப் பாதுகாப்பு, வேட்டையாடும் உயிரினங்களுக்கும் அவற்றின் இரைகளுக்கும் இடையேயான இயற்கை சமநிலை மற்றும் சுற்றுலா வளர்ச்சி ஆகிய அனைத்தும் ஒன்றுக்கொன்று பாதிப்பு ஏற்படுத்தாத வகையில் ஒருங்கிணைந்து செயல்பட வேண்டும். அவ்வாறு சமநிலையுடன் முன்னெடுக்கப்படும் சுற்றுலா நடவடிக்கைகள், இயற்கை பாதுகாப்புக்குத் தேவையான நிதி ஆதாரங்களையும் உருவாக்கக்கூடும் என இந்திரஜித் கோர்படே தெரிவித்துள்ளார்.

வரையாடுகளின் எண்ணிக்கை மீண்டும் உயர்ந்து வருவது, இயற்கை வளங்களை பாதுகாப்பதன் அவசியத்தை நமக்கு உணர்த்தும் முக்கியமான செய்தியாக அமைந்துள்ளது. வனப்பகுதிகளை அழிப்பதை தவிர்த்து, உயிரினங்களின் இயற்கையான வாழ்விடங்களை பாதுகாப்பதே அவற்றின் எதிர்காலத்தையும், சுற்றுச்சூழலின் சமநிலையையும் காக்கும் சிறந்த வழியாகும்.