தமிழக அரசியலில் மிகப்பெரிய திருப்புமுனையை உருவாக்கியுள்ள தமிழக வெற்றிக்கழகத் தலைவர் விஜய், இன்று தமிழ்நாட்டின் 12-வது முதலமைச்சராக பொறுப்பேற்று புதிய அரசியல் அத்தியாயத்தை தொடங்கியுள்ளார். கடந்த சில நாட்களாக பரபரப்பை கிளப்பிய ஆட்சியமைப்பு நகர்வுகள் அனைத்துக்கும் முற்றுப்புள்ளி வைக்கும் வகையில், சென்னை நேரு உள் விளையாட்டு அரங்கில் நடைபெற்ற பிரமாண்ட விழாவில் அவர் பதவியேற்றார்.

2024 ஆம் ஆண்டு பிப்ரவரி மாதத்தில் அரசியல் கட்சியை தொடங்கிய விஜய், வெறும் இரண்டு ஆண்டுகளுக்குள் ஆட்சிப் பொறுப்பை கைப்பற்றியிருப்பது இந்திய அரசியலிலேயே ஆச்சரியமான வளர்ச்சியாக பார்க்கப்படுகிறது. திரையுலகில் பெற்றிருந்த மகத்தான வரவேற்பு அவருக்கு ஆதரவாக அமைந்திருந்தாலும், நீண்டகாலமாக ஆட்சி செய்து வந்த தி.மு.க. மற்றும் அ.தி.மு.க. மீதான மக்களின் அதிருப்தியும், மாற்றத்திற்கான எதிர்பார்ப்பும் விஜய்க்கு வாக்கு வெள்ளமாக மாறியதாக அரசியல் விமர்சகர்கள் மதிப்பிடுகின்றனர்.

தமிழகத்தில் உள்ள 234 தொகுதிகளில் எடப்பாடி தொகுதியை தவிர்த்து 233 தொகுதிகளில் போட்டியிட்ட த.வெ.க., 108 இடங்களில் வெற்றி பெற்று அரசியல் வலிமையை நிரூபித்தது. தனித்து ஆட்சியமைக்க தேவையான எண்ணிக்கையை எட்டாதபோதிலும், பல தசாப்தங்களாக தமிழக அரசியலை ஆட்சி செய்த இரு பெரிய திராவிடக் கட்சிகளை பின்னுக்குத் தள்ளி முன்னணியில் வந்திருப்பது அரசியல் வரலாற்றில் முக்கிய நிகழ்வாக கருதப்படுகிறது.

தேர்தல் பிரசாரத்தின் தொடக்கத்திலிருந்தே விஜய்க்கு பல்வேறு சவால்கள் தொடர்ச்சியாக எழுந்தன. அவரது இறுதி திரைப்படமான ‘ஜனநாயகன்’ வெளியீட்டில் ஏற்பட்ட சிக்கல்கள், கரூர் கூட்ட நெரிசல் விபத்து தொடர்பான சர்ச்சைகள், அதனைத் தொடர்ந்து நடந்த விசாரணைகள், குடும்ப வாழ்க்கையைச் சுற்றிய பரபரப்புகள் என பல்வேறு அழுத்தங்களை எதிர்கொண்டபோதிலும், அனைத்தையும் தாண்டி தேர்தல் வெற்றியை பெற்று முதலமைச்சர் பதவியை அடைந்துள்ளார்.ஆட்சியமைப்பதற்கான பெரும்பான்மை முதலில் இல்லாததால் விஜய்க்கு அரசியல் சிக்கல் உருவானது.

காங்கிரஸ் கட்சி முதன்முதலில் ஆதரவு வழங்கியபோதும், தேவையான எண்ணிக்கை எட்டப்படவில்லை. பின்னர் விடுதலை சிறுத்தைகள், இந்திய கம்யூனிஸ்டு கட்சி, மார்க்சிஸ்ட் கம்யூனிஸ்டு கட்சி, இந்திய யூனியன் முஸ்லிம் லீக் உள்ளிட்ட கட்சிகள் நிபந்தனையற்ற ஆதரவை அறிவித்ததன் மூலம் ஆட்சிக்கான பாதை திறந்தது. இதனைத் தொடர்ந்து ஆளுநர் ராஜேந்திர அர்லேகர், விஜய்யை ஆட்சி அமைக்க அதிகாரப்பூர்வமாக அழைத்தார்.

இப்போது முதலமைச்சர் விஜய்க்கு முன் நிற்கும் மிகப்பெரிய சவால் தமிழகத்தின் நிதிநிலை என பார்க்கப்படுகிறது. மாநிலத்தின் மொத்த கடன் சுமை சுமார் 10 லட்சம் கோடி ரூபாயாக இருப்பதாக கூறப்படும் நிலையில், வருவாயை விட செலவுகள் அதிகரித்து வரும் சூழல் புதிய அரசுக்கு பெரும் அழுத்தத்தை ஏற்படுத்தும் என பொருளாதார வல்லுநர்கள் கருதுகின்றனர்.

தமிழக அரசுக்கு ஆண்டு வருவாயாக கிடைக்கும் தொகையை விட, அரசு ஊழியர் ஊதியம், கடன் வட்டி, மக்கள் நலத்திட்டங்கள் மற்றும் நிர்வாக செலவுகள் அதிகமாக இருப்பதால் ஒவ்வொரு ஆண்டும் புதிய கடன் வாங்க வேண்டிய நிலை உருவாகி வருவதாக தெரிவிக்கப்படுகிறது. இந்த சூழலில், தேர்தல் பிரசாரத்தின் போது விஜய் அறிவித்த பல்வேறு மக்கள் நலத் திட்டங்களை செயல்படுத்துவது மிகப்பெரிய நிர்வாக சவாலாக பார்க்கப்படுகிறது.

பெண்களுக்கான உரிமைத்தொகை உயர்வு, திருமண உதவித் திட்டங்கள், இலவச சிலிண்டர் வழங்கல், புதிதாக பிறக்கும் குழந்தைகளுக்கான நலத்திட்டங்கள் உள்ளிட்ட பல வாக்குறுதிகளை நிறைவேற்றுவதற்கு கூடுதல் நிதி தேவைப்படும் நிலையில், அதற்கான வருவாய் ஆதாரங்களை எவ்வாறு உருவாக்கப் போகிறார் என்பது முக்கிய கேள்வியாக எழுந்துள்ளது.அதேபோல், எதிர்க்கட்சியாக அமர இருக்கும் தி.மு.க. மற்றும் அ.தி.மு.க. ஆகிய இரு பெரிய அரசியல் சக்திகளின் கடுமையான விமர்சனங்களையும் எதிர்கொண்டு ஆட்சியை முன்னெடுக்க வேண்டிய கட்டாயமும் விஜய்க்கு உள்ளது.

மத்திய அரசுடன் உறவை எவ்வாறு பேணப் போகிறார்? தமிழக நலனுக்கான நிதி மற்றும் திட்டங்களை எப்படிப் பெற்றுத்தரப் போகிறார்? மாநில உரிமை தொடர்பான பிரச்சினைகளில் எந்த நிலைப்பாட்டை எடுக்கப் போகிறார்? என்ற கேள்விகளும் அரசியல் அரங்கில் பேசப்பட்டு வருகின்றன.

மேலும், த.வெ.க. சார்பில் வெற்றி பெற்ற பல உறுப்பினர்களுக்கு சட்டமன்ற அனுபவம் புதிதாக இருப்பதும், அமைச்சரவை பொறுப்பேற்ற பலருக்கு நிர்வாக அனுபவம் குறைவாக இருப்பதும் மற்றொரு சவாலாக பார்க்கப்படுகிறது. இருப்பினும், “விஜய்” என்ற ஒற்றை முகத்தின் மீதான மக்களின் நம்பிக்கையே இந்த வெற்றிக்கான மிகப்பெரிய காரணமாக அமைந்துள்ளதாக அரசியல் பார்வையாளர்கள் மதிப்பிடுகின்றனர்.

சட்டம்-ஒழுங்கை உறுதிப்படுத்துவது, மக்களுக்கு அரசு சேவைகளை எளிதாக கொண்டு சேர்ப்பது, அடிப்படை வசதிகளை மேம்படுத்துவது போன்ற நடவடிக்கைகள் உடனடி மக்கள் நம்பிக்கையை பெற உதவும் எனவும் கருதப்படுகிறது. இந்நிலையில், அரசியல் மற்றும் நிர்வாக சவால்களை முதலமைச்சர் விஜய் எவ்வாறு சமாளித்து புதிய ஆட்சியை முன்னெடுக்கப் போகிறார் என்பது தமிழக அரசியலின் அடுத்த கட்ட பரபரப்பாக மாறியுள்ளது என தெரிவிக்கப்படுகிறது.