இன்றைய வேகமான வாழ்க்கை முறையில் செயற்கை குளிர்பானங்களின் அதிகப்படியான பயன்பாடு அதிகரித்துள்ள நிலையில், மக்கள் மீண்டும் ஆரோக்கியமான இயற்கை பானங்களைத் தேடி திரும்பி வருகின்றனர். அந்த மாற்றத்தின் மையமாக, நெல்லை மாவட்டத்தில் தென்னை மரத்திலிருந்து பெறப்படும் ‘நீரா’ பானம் தற்போது பெரும் வரவேற்பைப் பெற்று வருகிறது.

நீரா என்பது தென்னை மரத்தின் பூமொட்டு மலருவதற்கு முன்பே அதன் பாளையிலிருந்து சுரக்கும் இனிப்பான, சுத்தமான இயற்கை திரவமாகும். இதில் எந்தவித வேதிப்பொருட்களும் சேர்க்கப்படாததால், இயல்பான சுவையுடனும், சத்துக்களுடனும் கூடிய பானமாக இது திகழ்கிறது. சரியான முறையில் சேகரித்து உடனடியாக குளிர்சாதனத்தில் பாதுகாத்தால், அதன் தரமும் சுவையும் முழுமையாக நிலைத்திருக்கும்.பொதுமக்கள் மத்தியில் நீரா குறித்து நிலவும் பெரிய தவறான எண்ணம் என்னவெனில், அதை பதநீர் அல்லது கள் என நினைப்பதே.

ஆனால் உண்மையில், நீரா அவற்றின் ஆரம்ப நிலையில் கிடைக்கும் தூய்மையான பானம். அதில் சுண்ணாம்பு சேர்க்கப்பட்டால் பதநீராகவும், புளிக்க விட்டால் கள்ளாகவும் மாறுகிறது.மருத்துவ நிபுணர்கள் கூறுவதன்படி, நீரா உடலுக்கு தேவையான நீர்ச்சத்தையும் உடனடி சக்தியையும் வழங்குகிறது. கோடைக்காலத்தில் உடல் வெப்பத்தை குறைத்து இயற்கையான குளிர்ச்சியை தருவதோடு, நோய் எதிர்ப்பு சக்தியையும் மேம்படுத்துகிறது.

இதனால் செயற்கை குளிர்பானங்களை தவிர்த்து நீரா போன்ற இயற்கை பானங்களை தேர்வு செய்வது ஆரோக்கியத்திற்கு சிறந்ததாக கருதப்படுகிறது.மேலும், நீரா உற்பத்தி தென்னை விவசாயிகளுக்கு கூடுதல் வருமான வாய்ப்பாக உருவெடுத்துள்ளது.

அரசு மற்றும் கூட்டுறவு அமைப்புகள் இதனை ஊக்குவித்தால், கிராமப்புறங்களில் வேலைவாய்ப்புகள் அதிகரித்து, விவசாயிகளின் வாழ்க்கை தரம் மேம்படும் வாய்ப்பு உள்ளது.

சில பகுதிகளில் சுத்தமான சேகரிப்பு, குளிர்சாதன பாதுகாப்பு மற்றும் நவீன விநியோக முறைகள் அறிமுகப்படுத்தப்பட்டுள்ளதால், பாரம்பரிய விவசாயத்துக்கும் சந்தை வளர்ச்சிக்கும் இடையே புதிய இணைப்பு உருவாகியுள்ளது.

இதனால், ஆரோக்கியத்தையும் பொருளாதார முன்னேற்றத்தையும் ஒருசேர தாங்கி நிற்கும் ‘நீரா’ பானம், எதிர்காலத்தில் முக்கியமான இயற்கை குளிர்பானமாக உருவெடுக்கும் என்று நிபுணர்கள் கணிக்கின்றனர்.

நெல்லை போன்ற தென்னை வளமான பகுதிகளில் இது சிறு தொழில்கள் உருவாக்கி, கிராமப்புற பொருளாதார வளர்ச்சிக்கும் வலுவூட்டும் சக்தியாக மாறியுள்ளது.