இன்றைய காலகட்டத்தில் சுற்றுச்சூழலை பாதுகாப்பது என்பது அரசின் கடமையாக மட்டும் இல்லாமல், ஒவ்வொரு குடும்பத்தின் அன்றாட பொறுப்பாகவும் மாறியுள்ளது. தினமும் பயன்படுத்திவிட்டு தூக்கி எறியப்படும் பிளாஸ்டிக் பாட்டில்கள், தண்ணீர் கேன்கள் போன்றவை நூற்றாண்டுகள் கடந்தும் மண்ணில் கரையாமல் இயற்கைக்கு பெரும் சுமையாகின்றன. ஆனால், சிறிய சிந்தனைக்கும் சற்று படைப்பாற்றலுக்கும் இடமளித்தால், அதே பிளாஸ்டிக் பொருட்களே உங்கள் வீட்டையும் மாடித்தோட்டத்தையும் பசுமையால் நிரப்பும் அரிய கருவிகளாக மாறிவிடும்.

இடம் குறைவா? செங்குத்து தோட்டம் உங்களுக்கான சூப்பர் தீர்வு
நகர வாழ்க்கையில் இடப்பற்றாக்குறை மிகப்பெரிய சவாலாக உள்ளது. குறிப்பாக அடுக்குமாடி குடியிருப்புகளில் பெரிய தோட்டம் அமைப்பது பலருக்கும் கனவாகவே உள்ளது. இப்படிப்பட்ட சூழலில் செங்குத்து தோட்டம் ஒரு புத்திசாலித்தனமான தேர்வாக அமைகிறது.பழைய 1 அல்லது 2 லிட்டர் பிளாஸ்டிக் பாட்டில்களின் பக்கவாட்டில் செவ்வக வடிவில் வெட்டி, அடிப்பகுதியில் நீர் வெளியேற சிறிய துளைகள் போடுங்கள். பின்னர் மண், தேங்காய் நார், இயற்கை உரம் ஆகியவற்றை நிரப்பி சுவர் அல்லது கம்பிகளில் வரிசையாக கட்டித் தொங்கவிடலாம். இதில் புதினா, கொத்தமல்லி, துளசி, கறிவேப்பிலை, பாலக்கீரை போன்ற சிறிய செடிகள் செழிப்பாக வளரும்.

வெளியூர் பயணத்திலும் செடிகள் வாடாது
இரண்டு அல்லது மூன்று நாட்கள் வீட்டை விட்டு வெளியே செல்ல வேண்டிய சூழல் வந்தால், “செடிகளுக்கு தண்ணீர் யார் ஊற்றுவார்கள்?” என்ற கவலை பலருக்கும் இருக்கும்.
இதற்காக விலையுயர்ந்த கருவிகள் தேவையில்லை. ஒரு காலியான பிளாஸ்டிக் பாட்டிலின் மூடியில் சிறிய துளைகள் போட்டு, பாட்டிலை தண்ணீரால் நிரப்பி செடியின் வேர்ப்பகுதியில் தலைகீழாக பதித்துவிட்டால் போதும். தண்ணீர் மெதுவாக சொட்டிச் செடிக்கு தொடர்ந்து ஈரப்பதம் கிடைக்கச் செய்யும். கோடை நாட்களில் இது மிகவும் பயனுள்ளதாக இருக்கும்.

விதை முளைக்க சிறிய நாற்று தொட்டிகள்
விதைகள் முளைக்க விலை உயர்ந்த நர்சரி தட்டுகள் வாங்க வேண்டிய அவசியமில்லை. குளிர்பான பாட்டில்களின் கீழ்ப்பகுதியை வெட்டி சிறிய தொட்டிகளாக மாற்றலாம்.அடிப்பகுதியில் சிறு துளைகள் போட்டு மண்ணை நிரப்பி விதைகளை விதைத்தால் பாதுகாப்பாக முளைக்கும். நாற்றுகள் வளர்ந்த பிறகு அவற்றை பெரிய தொட்டிகளுக்கு மாற்றுவது எளிதாக இருக்கும். மைக்ரோகீரை வளர்ப்பதற்கும் இது சிறந்த தேர்வாகும்.

தொங்கும் பூந்தொட்டிகள்... வீட்டுக்கு புதிய அழகு
வண்ணமயமான பிளாஸ்டிக் பாட்டில்களை நடுவில் வெட்டி கயிறு மூலம் பால்கனி அல்லது ஜன்னல் அருகே தொங்கவிடலாம். அதில் பூச்செடிகள் அல்லது அலங்காரச் செடிகள் வளர்த்தால் வீடு இயற்கை அழகால் ஜொலிக்கும்.பாட்டில்களுக்கு வண்ணம் தீட்டி அலங்கரித்தால், குழந்தைகளும் உற்சாகத்துடன் இந்த முயற்சியில் கலந்து கொள்வார்கள்.

சிறிய தண்ணீர் ஊற்றும் கருவி
பழைய பிளாஸ்டிக் பாட்டிலின் மூடியில் பல சிறிய துளைகள் போட்டு தண்ணீர் நிரப்பினால், அது ஒரு சிறிய நீர்ப்பாய்ச்சும் கருவியாக மாறிவிடும். இதனால் நாற்றுகள் மீது தண்ணீர் மென்மையாகப் பாயும்.

இயற்கை உரம் தயாரிக்க உதவும் பாட்டில்கள்
சமையலறையில் கிடைக்கும் காய்கறித் தோல்கள், பழத்தோல்கள், உலர்ந்த இலைகள் போன்றவற்றை சேகரித்து இயற்கை உரமாக மாற்ற பிளாஸ்டிக் பாட்டில்கள் உதவும்.பாட்டிலின் பக்கங்களில் காற்றோட்டத்திற்காக சிறிய துளைகள் போட்டு இந்த கழிவுகளை சேர்த்தால், சில வாரங்களில் வளமான இயற்கை உரம் கிடைக்கும்.

நாற்றுகளுக்கு பாதுகாப்பு கவசம்
புதிதாக நட்ட நாற்றுகளை வெயில், பலத்த காற்று, பூச்சி தாக்குதல் போன்றவற்றிலிருந்து காக்க பெரிய பிளாஸ்டிக் பாட்டில்களின் அடிப்பகுதியை வெட்டி பாதுகாப்பு கவசமாக பயன்படுத்தலாம்.இது சிறிய பசுமைக் கூடம் போல செயல்பட்டு நாற்றுகள் வேகமாக வளர உதவும்.

பெயர்ப் பலகைகளாக மாற்றலாம்
பிளாஸ்டிக் பாட்டில்களை நீளவாக்கில் வெட்டி சிறிய துண்டுகளாக மாற்றி, அதில் செடியின் பெயரை எழுதி மண்ணில் சொருகலாம். இதனால் எந்த செடி எது என்பதை உடனே அறிய முடியும்.

பறவைகளுக்கான உணவுத் தொட்டி
பெரிய பிளாஸ்டிக் பாட்டிலில் சிறிய துளைகள் செய்து, தானியங்களை நிரப்பி மரக்கிளைகளில் தொங்கவிட்டால் அது அழகான பறவை உணவுத் தொட்டியாக மாறும்.இதன் மூலம் குருவி உள்ளிட்ட சிறிய பறவைகள் உங்கள் தோட்டத்தை அடிக்கடி நாடத் தொடங்கும்.

மழைநீர் சேமிப்புக்கும் பயன்படும்
பழைய பிளாஸ்டிக் கேன்கள் மற்றும் பாட்டில்களை சிறிய அளவில் மழைநீர் சேமிக்க பயன்படுத்தலாம். சேமித்த நீரை பின்னர் வீட்டுச் செடிகளுக்கு பயன்படுத்துவதன் மூலம் தண்ணீர் வீணாவதை குறைக்கலாம்.

சிறிய முயற்சி... பெரிய மாற்றம்
ஒரு பிளாஸ்டிக் பாட்டிலை மறுபயன்படுத்துவது என்பது வெறும் பொருளை மீண்டும் பயன்படுத்துவது மட்டும் அல்ல. அது சுற்றுச்சூழலை காக்கும் விழிப்புணர்வான செயல்.ஒவ்வொரு வீட்டிலும் இதுபோன்ற பழக்கங்கள் உருவானால் பிளாஸ்டிக் கழிவுகள் குறையும். நகரங்களும் பசுமை சூழலாக மாறும்.

அடுத்த முறை காலியான பிளாஸ்டிக் பாட்டிலை தூக்கி எறிவதற்கு முன், அது ஒரு பூந்தொட்டியாகவோ, கீரை வளர்க்கும் கலனாகவோ, உங்கள் மாடித்தோட்டத்தின் அழகிய அலங்காரமாகவோ மாறக்கூடும் என்பதை நினைவில் கொள்ளுங்கள்.சிறிய மாற்றங்களே பெரிய சுற்றுச்சூழல் புரட்சிக்கான முதல் படியாக அமையும். இன்று முதலே இந்த எளிய, செலவில்லாத தோட்டக்கலை யோசனைகளை செயல்படுத்தி உங்கள் இல்லத்தை பசுமை நந்தவனமாக மாற்றுங்கள்.