அன்றாட உணவில் சிறுதானியங்களை சேர்க்க நினைப்பவர்களுக்கு குதிரைவாலி நல்ல தேர்வாக அமையும். இதை வைத்து வழக்கமான உணவுகளை மட்டுமின்றி, மொறுமொறுப்பான வடை முதல் இனிப்பான பர்பி, பாயாசம் வரை பலவிதமான உணவுகளையும் தயாரிக்கலாம். வீட்டில் எளிதாக செய்து சுவைக்கக்கூடிய குதிரைவாலி உணவுகளில் 5 வகைகள் இங்கே...

1. குதிரைவாலி வடை
தேவையான பொருட்கள்:
குதிரைவாலி – 1 கப்
கடலைப்பருப்பு – அரை கப்
பச்சை மிளகாய் – 2
இஞ்சி – 1 சிறு துண்டு
சீரகம் – 1 தேக்கரண்டி
மிளகு – அரை தேக்கரண்டி
பெருங்காயத்தூள் – 1 சிட்டிகை
கறிவேப்பிலை – சிறிதளவு
கொத்தமல்லித்தழை – சிறிதளவு
உப்பு – தேவையான அளவு
எண்ணெய் – பொரிப்பதற்கு தேவையான அளவு

செய்முறை:
முதலில் குதிரைவாலியை சுமார் 10 மணி நேரமும், கடலைப்பருப்பை 3 மணி நேரமும் தனித்தனியாக ஊறவைக்கவும். பின்னர் இரண்டையும் ஒன்றாகச் சேர்த்து, அதிக தண்ணீர் சேர்க்காமல் கொரகொரப்பாக அரைத்துக் கொள்ளவும்.அரைத்த கலவையுடன் பொடியாக நறுக்கிய பச்சை மிளகாய், இஞ்சி, சீரகம், மிளகு, பெருங்காயத்தூள், கறிவேப்பிலை, கொத்தமல்லித்தழை மற்றும் உப்பு சேர்த்து நன்றாகப் பிசையவும்.பின்னர் சிறு உருண்டைகளாக எடுத்து உள்ளங்கையில் வைத்து தட்டி வடை வடிவத்துக்கு கொண்டு வரவும். எண்ணெயை மிதமான சூட்டில் காயவைத்து, வடைகளை பொன்னிறமாகவும் மொறுமொறுப்பாகவும் பொரித்தெடுக்கவும்.மாலை நேர சிற்றுண்டியாகவும், தேநீருடன் சாப்பிடவும் ஏற்ற சுவையான குதிரைவாலி வடை தயார்.

2. குதிரைவாலி ஊத்தப்பம்
தேவையான பொருட்கள்:
குதிரைவாலி அரிசி – ஒன்றரை கப்
உளுத்தம்பருப்பு – அரை கப்
குடைமிளகாய் – 1
வெங்காயம் – 2
இஞ்சி – 1 தேக்கரண்டி
பச்சை மிளகாய் – அரை தேக்கரண்டி
கொத்தமல்லித்தழை – 1 மேசைக்கரண்டி
கேரட் – 1
உப்பு – தேவையான அளவு
எண்ணெய் – தேவையான அளவு

செய்முறை:
குதிரைவாலி அரிசியை 2 மணி நேரமும், உளுத்தம்பருப்பை அரை மணி நேரமும் ஊறவைக்கவும். பின்னர் இரண்டையும் தனித்தனியாக அரைத்து, தேவையான உப்பு சேர்த்து ஒன்றாகக் கலந்து வைக்கவும்.மாவை சுமார் 4 மணி நேரம் புளிக்கவிட்ட பிறகு, அதில் பொடியாக நறுக்கிய குடைமிளகாய், வெங்காயம், இஞ்சி, பச்சை மிளகாய், கேரட் மற்றும் கொத்தமல்லித்தழையை சேர்த்து நன்றாகக் கலக்கவும்.தோசைக்கல்லை சூடாக்கி, சிறிதளவு எண்ணெய் தடவி, மாவை சற்று தடிமனாக ஊற்றவும். இருபுறமும் நன்றாக வெந்ததும் எடுத்துப் பரிமாறலாம்.வெளிப்புறம் சற்றே மொறுமொறுப்பாகவும், உள்ளே மென்மையாகவும் இருக்கும் குதிரைவாலி ஊத்தப்பம், தேங்காய் சட்னியுடன் சுவையாக இருக்கும்.

3. குதிரைவாலி பர்பி
தேவையான பொருட்கள்:
குதிரைவாலி மாவு – 1 கப்
பால் பொடி – முக்கால் கப்
அடர்த்தியான இனிப்புப் பால் – அரை கப்
பசும்பால் – 50 மில்லி
நெய் – 2 மேசைக்கரண்டி
வெண்ணெய் – 2 மேசைக்கரண்டி
முந்திரி – 5
பாதாம் – 5

செய்முறை:
முதலில் முந்திரி மற்றும் பாதாமை பொடித்துக் கொள்ளவும். கடாயை சூடாக்கி, அதில் குதிரைவாலி மாவை சேர்த்து லேசாக வாசனை வரும் வரை வறுக்கவும்.பின்னர் பால் பொடி, முந்திரி-பாதாம் பொடி, பசும்பால் மற்றும் அடர்த்தியான இனிப்புப் பால் ஆகியவற்றை ஒன்றன் பின் ஒன்றாக சேர்த்து, கட்டிகள் ஏற்படாதவாறு தொடர்ந்து கிளறவும்.கலவை நன்றாகத் திரண்டு வரத் தொடங்கியதும் நெய் சேர்த்து கிளறவும். கடாயில் ஒட்டாமல் சுருண்டு வந்து, பால்கோவா பதத்துக்கு வந்ததும் அடுப்பை அணைக்கவும்.ஒரு தட்டில் வெண்ணெய் தடவி, தயாரித்த கலவையை அதில் கொட்டி சமமாகப் பரப்பவும். சிறிது நேரம் ஆறியதும் சிறு துண்டுகளாக வெட்டி, குளிர்சாதனப் பெட்டியில் சுமார் ஒரு மணி நேரம் வைத்து எடுத்துப் பரிமாறலாம்.இனிப்புடன் குதிரைவாலியின் சுவையையும் இணைக்கும் இந்தப் பர்பி, குழந்தைகள் முதல் பெரியவர்கள் வரை விரும்பி சாப்பிடும் வகையில் இருக்கும்.

4. குதிரைவாலி அரிசி பாயாசம்
தேவையான பொருட்கள்:
குதிரைவாலி அரிசி – 100 கிராம்
தேங்காய்ப்பால் – 1 கப்
சர்க்கரை – 100 கிராம்
பாசிப்பருப்பு – 50 கிராம்
முந்திரி – 1 தேக்கரண்டி
திராட்சை – 1 தேக்கரண்டி
ஏலக்காய்த்தூள் – 1 தேக்கரண்டி
நெய் – தேவையான அளவு

செய்முறை:
குதிரைவாலி அரிசியை சுமார் அரை மணி நேரம் ஊறவைக்கவும். பாசிப்பருப்பை தனியாக வாணலியில் போட்டு லேசாக சிவக்கும் வரை வறுத்துக் கொள்ளவும்.பின்னர் ஒரு பாத்திரத்தில் வறுத்த பாசிப்பருப்புடன் 4 கப் தண்ணீர் சேர்த்து பாதியளவு வேகவிடவும். அதன்பிறகு ஊறவைத்த குதிரைவாலி அரிசியை சேர்த்து நன்றாக வேகவைக்கவும்.அரிசியும் பருப்பும் நன்றாக வெந்ததும் தேங்காய்ப்பால் மற்றும் சர்க்கரையை சேர்த்து சுமார் 5 நிமிடங்கள் மிதமான தீயில் கொதிக்கவிடவும்.மற்றொரு சிறிய வாணலியில் நெய் ஊற்றி முந்திரி மற்றும் திராட்சையை வறுத்து, பாயாசத்தில் சேர்க்கவும். இறுதியாக ஏலக்காய்த்தூள் தூவி கிளறி, 2 நிமிடங்கள் கழித்து அடுப்பிலிருந்து இறக்கவும்.மணமும் சுவையும் நிறைந்த குதிரைவாலி பாயாசம் பரிமாறத் தயாராகிவிடும்.

5. குதிரைவாலி எலுமிச்சை இட்லி
தேவையான பொருட்கள்:
குதிரைவாலி அரிசி – 3 கப்
சம்பா அவல் – 1 கப்
உளுந்து – 1 கப்
கடுகு – தேவையான அளவு
உளுத்தம்பருப்பு – தேவையான அளவு
கடலைப்பருப்பு – தேவையான அளவு
வேர்க்கடலை – தேவையான அளவு
முந்திரி – தேவையான அளவு
பச்சை மிளகாய் – 2 தேக்கரண்டி
மஞ்சள்தூள் – கால் தேக்கரண்டி
எலுமிச்சைச்சாறு – 4 தேக்கரண்டி
பெருங்காயத்தூள் – கால் தேக்கரண்டி
கறிவேப்பிலை – சிறிதளவு
நல்லெண்ணெய் – 5 தேக்கரண்டி
உப்பு – தேவையான அளவு

செய்முறை:
குதிரைவாலி அரிசி மற்றும் உளுந்தை நன்றாகக் கழுவி 4 மணி நேரம் ஊறவைக்கவும். அவலையும் சுத்தம் செய்து சிறிது நேரம் ஊறவைக்கவும்.பின்னர் குதிரைவாலி அரிசி, உளுந்து, அவல் ஆகிய மூன்றையும் ஒன்றாகச் சேர்த்து இட்லி மாவு பதத்துக்கு மென்மையாக அரைக்கவும். உப்பு சேர்த்து நன்றாகக் கலந்து, சுமார் 8 மணி நேரம் புளிக்கவிடவும்.புளித்த மாவை சிறிய இட்லிகளாக ஊற்றி வேகவைத்து தனியாக எடுத்து வைக்கவும்.பின்னர் வாணலியில் நல்லெண்ணெய் ஊற்றி கடுகு, உளுத்தம்பருப்பு, கடலைப்பருப்பு, வேர்க்கடலை, முந்திரி ஆகியவற்றை தாளிக்கவும். அவை பொன்னிறமானதும் நறுக்கிய பச்சை மிளகாய், கறிவேப்பிலை, மஞ்சள்தூள் மற்றும் பெருங்காயத்தூள் சேர்த்து கிளறவும்.

அதன்பிறகு எலுமிச்சைச்சாறு மற்றும் தேவையான அளவு உப்பு சேர்த்து உடனடியாக வேகவைத்த இட்லிகளைப் போடவும். இட்லிகள் உடையாமல் மெதுவாகக் கிளறி, தாளிப்பு முழுவதும் நன்றாகப் படிந்ததும் அடுப்பிலிருந்து இறக்கவும்.புளிப்பு, காரம், மணம் என அசத்தும் குதிரைவாலி எலுமிச்சை இட்லி காலை உணவாகவும், மாலை நேரச் சிற்றுண்டியாகவும் பரிமாறலாம்.குதிரைவாலியை ஒரே விதமாக சமைக்காமல், இவ்வாறு வடை, ஊத்தப்பம், பர்பி, பாயாசம், எலுமிச்சை இட்லி என பல்வேறு சுவைகளில் செய்து பார்த்தால், சிறுதானிய உணவுகளை குடும்பத்தினரின் அன்றாட உணவுப் பட்டியலில் எளிதாக இணைக்கலாம்.