பள்ளி முடிந்து நண்பர்களுடன் வீடு திரும்பும் வழியில், டீக்கடையில் வாங்கி சாப்பிட்ட பட்டர் பிஸ்கட்டின் சுவையை அவ்வளவு எளிதில் மறந்துவிட முடியாது. கண்ணாடி பாட்டிலில் அழகாக அடுக்கி வைக்கப்பட்டிருக்கும் அந்த மொறுமொறுப்பான பிஸ்கட்டை வாயில் போட்டதும், வெண்ணெயின் மணமும், மென்மையாகக் கரையும் தன்மையும் நாவில் தனி சுவையை ஏற்படுத்தும்.

அந்தக் காலத்து பேக்கரி சுவையை வீட்டிலேயே மீண்டும் கொண்டுவர வேண்டும் என்று பலரும் முயற்சி செய்வார்கள். ஆனால், கடைகளில் கிடைப்பது போன்ற மொறுமொறுப்பும், வாயில் கரையும் பதமும் வீட்டில் தயாரிக்கும்போது சில நேரங்களில் கிடைக்காமல் போகலாம். சரியான அளவீடுகளுடன் ஒரு சிறிய ரகசியப் பொருளையும் சேர்த்தால், பேக்கரி பாணியிலான பட்டர் பிஸ்கட்டை வீட்டிலேயே எளிதாகத் தயாரிக்கலாம்.

தேவையான பொருட்கள்
மைதா மாவு – 1 கப்
வெண்ணெய் – அரை கப்
பொடித்த சர்க்கரை – அரை கப்
பேக்கிங் பவுடர் – அரை தேக்கரண்டி
வெண்ணிலா எசன்ஸ் – 1 தேக்கரண்டி
உப்பு – ஒரு சிட்டிகை
கஸ்டர்ட் பவுடர் – 2 மேஜைக்கரண்டி

செய்வது எப்படி?
முதலில் அறை வெப்பநிலையில் இருக்கும் வெண்ணெயை ஒரு அகலமான பாத்திரத்தில் எடுத்துக்கொள்ளவும். அதில் பொடித்த சர்க்கரையைச் சேர்த்து, கம்பிக் கரண்டியால் சுமார் 5 நிமிடங்கள் நன்றாகக் கலக்கவும். வெண்ணெய் மற்றும் சர்க்கரை ஒன்றுடன் ஒன்று கலந்து, இலகுவான கிரீம் பதத்திற்கு வரும் வரை தொடர்ந்து அடித்துக் கலக்க வேண்டும்.
அதன் பிறகு வெண்ணிலா எசன்ஸைச் சேர்த்து நன்றாகக் கலக்கவும்.
இப்போது பிஸ்கட்டின் தனிச்சுவையையும், மொறுமொறுப்பையும் கூட்டும் முக்கியமான கட்டம் வருகிறது. மைதா மாவு, பேக்கிங் பவுடர், உப்பு மற்றும் கஸ்டர்ட் பவுடரை ஒன்றாகச் சேர்த்து நன்றாகச் சலித்துக்கொள்ளவும். பின்னர் இதனை வெண்ணெய் கலவையில் சிறிது சிறிதாகச் சேர்த்து மெதுவாகக் கலக்கவும்.
இங்கு ஒரு விஷயத்தை மட்டும் மறக்கக்கூடாது. மாவை சப்பாத்தி மாவைப் போல அழுத்திப் பிசையக்கூடாது. விரல்களால் மென்மையாகச் சேர்த்து, மாவு ஒன்றாகத் திரளும் அளவுக்கு மட்டுமே பிசைய வேண்டும். அதிக நேரம் பிசைந்தால் பிஸ்கட்டின் மென்மையும் மொறுமொறுப்பும் குறைந்துவிடும்.
மாவு மிகவும் தளர்வாக இருந்தாலோ அல்லது சூடாக இருந்தாலோ, அதை மூடி வைத்து சுமார் 15 நிமிடங்கள் குளிர்சாதனப் பெட்டியில் வைக்கலாம். இதனால் மாவை எளிதாக வடிவமைக்க முடியும்.பின்னர் மாவை சிறு சிறு உருண்டைகளாகப் பிரித்து, உள்ளங்கையில் வைத்து லேசாகத் தட்டையாக்கிக் கொள்ளவும்.

அடுப்பில் சுடும் முறை
அடுப்பு இருந்தால், அதை 180 டிகிரி செல்சியஸ் வெப்பநிலையில் முன்கூட்டியே சூடாக்கவும். தயாரித்து வைத்துள்ள பிஸ்கட்டுகளை தட்டில் இடைவெளிவிட்டு அடுக்கி, சுமார் 15 நிமிடங்கள் சுட்டெடுக்கவும்.

அடுப்பு இல்லாதவர்கள் இப்படிச் செய்யலாம்
கனமான அடிப்பகுதி கொண்ட கடாயில் தேவையான அளவு உப்பைக் கொட்டி, அதன் மீது ஒரு நிலைத்தாங்கியை வைத்து மூடி, சுமார் 10 நிமிடங்கள் மிதமான தீயில் சூடாக்கவும்.பின்னர் நெய் தடவிய தட்டில் பிஸ்கட் உருண்டைகளை அடுக்கி, அந்தத் தட்டைக் கடாய்க்குள் வைத்து மூடி, மிதமான தீயில் சுமார் 15 முதல் 20 நிமிடங்கள் வரை வேகவிடவும்.பிஸ்கட் தயாரானதும் உடனடியாக எடுத்துப் பார்த்தால் சற்று மென்மையாக இருக்கும். அதைப் பார்த்து இன்னும் வேகவைக்க வேண்டும் என்று நினைக்க வேண்டாம்.

முழுமையாக ஆறியதும் பிஸ்கட்டின் உண்மையான கரகரப்பான பதம் வெளிப்படும்.வீட்டிலேயே தயாரிப்பதால் தேவையான பொருட்களை நாமே தேர்வு செய்து, குழந்தைகளுக்கும் குடும்பத்தினருக்கும் சுவையான மாலை நேரச் சிற்றுண்டியாகக் கொடுக்கலாம்.

தயாரித்த பட்டர் பிஸ்கட்டுகளை முழுமையாக ஆறவைத்து, காற்று புகாத டப்பாவில் சேமித்து வைத்தால் சுமார் இரண்டு வாரங்கள் வரை பயன்படுத்தலாம்.மாலை நேர தேநீர் அல்லது காபியுடன் வீட்டிலேயே சுட்டெடுத்த இந்த வெண்ணெய் மணம் கமழும் பட்டர் பிஸ்கட்டைச் சுவைத்துப் பாருங்கள். ஒருமுறை செய்து பார்த்தால், கடையில் வாங்கும் பிஸ்கட்டை விட வீட்டுப் பிஸ்கட்டுக்கே மனம் மாறிவிடும்!