உளுந்தூர்பேட்டையில் நடைபெற்ற விசிக மாநாட்டில், தமிழக வெற்றிக் கழகத்துடன் தொடர்ந்து பயணிப்போம் என அக்கட்சியின் தலைவர் தொல். திருமாவளவன் வெளிப்படையாக அறிவித்தது தமிழக அரசியல் களத்தில் பரபரப்பை ஏற்படுத்தியது. எதிர்காலத்திலும் தவெக கூட்டணியில் விசிக இடம்பெறும் என்ற இந்த அறிவிப்புக்கு, முதல்வர் விஜய் தரப்பில் இதுவரை எந்தவித அதிகாரப்பூர்வ எதிர்வினையும் வெளியாகவில்லை.

திருமாவளவனின் அறிவிப்பு வெளியாகி நாட்கள் கடந்தும் விஜய் அமைதியாக இருப்பதும், தவெக அமைச்சர்கள் யாரும் இதுகுறித்து கருத்து தெரிவிக்காததும் அரசியல் வட்டாரத்தில் விவாதத்தை ஏற்படுத்தியுள்ளது. குறிப்பாக, கூட்டணி குறித்து விசிக தரப்பில் வெளிப்படையாக விருப்பம் தெரிவிக்கப்பட்டுள்ள நிலையில், ஆளும் கட்சி அதனை கண்டுகொள்ளாமல் இருப்பது விசிக நிர்வாகிகள் மற்றும் தொண்டர்கள் மத்தியில் அதிருப்தியை ஏற்படுத்தியுள்ளதாக கூறப்படுகிறது.

பல ஆண்டுகளாக சுயமரியாதை மற்றும் சமரசமற்ற அரசியலை முன்னிறுத்தி செயல்பட்டு வரும் விசிக, தாமாக முன்வந்து கூட்டணி விருப்பத்தை தெரிவித்தும் தவெக தரப்பிலிருந்து எந்த பதிலும் வராததை தங்களது அரசியல் கௌரவத்திற்கு ஏற்பட்ட பின்னடைவாக சில நிர்வாகிகள் பார்க்கின்றனர். ஆட்சியமைக்க விசிக உள்ளிட்ட கட்சிகளின் ஆதரவு முக்கியமாக இருந்த நிலையில், தவெகவே கூட்டணி கட்சிகளை தேடி வர வேண்டும் என்ற கருத்தும் கட்சியின் அடிமட்டத்தில் எழுந்துள்ளதாக கூறப்படுகிறது.

இதற்கிடையே, தவெகவின் அமைதிக்கு பின்னால் அரசியல் கணக்கு இருப்பதாகவும் அரசியல் நோக்கர்கள் கருதுகின்றனர். விசிகவின் ஆதரவை உடனடியாக ஏற்றுக்கொண்டால், எதிர்காலத்தில் அக்கட்சியின் கொள்கை மற்றும் அரசியல் கோரிக்கைகளுக்கு பதிலளிக்க வேண்டிய கட்டாயம் ஏற்படும் என்பதால், இப்போதே எந்தவொரு பகிரங்க கூட்டணி உறுதிமொழியையும் வழங்க வேண்டாம் என தவெக தலைமை முடிவு செய்திருக்கலாம் என கூறப்படுகிறது.

மேலும், பாஜக எதிர்ப்பு உள்ளிட்ட தேசிய அரசியல் விவகாரங்களில் விசிகவின் நிலைப்பாடு மிகவும் வெளிப்படையாக இருக்கும் நிலையில், தவெக இதுவரை அந்த விவகாரங்களில் மிகவும் கவனமான அணுகுமுறையையே கடைப்பிடித்து வருகிறது. இதுவும் இரு கட்சிகளுக்கிடையிலான எதிர்கால அரசியல் பயணத்தில் முக்கியமான கேள்வியாக பார்க்கப்படுகிறது.

ஒருபுறம், சட்டமன்றத்தில் தேவையான எண்ணிக்கையை தக்கவைத்துக்கொள்ள விசிக உள்ளிட்ட கூட்டணி கட்சிகளின் ஆதரவு தவெகவுக்கு முக்கியமானதாக இருக்கும் சூழல் உள்ளது. மறுபுறம், எதிர்கால தேர்தல் கூட்டணியை இப்போதே வெளிப்படையாக உறுதி செய்யாமல் அரசியல் சூழலை கவனித்து செல்வதே தவெக தலைமையின் திட்டமாக இருக்கலாம் என கூறப்படுகிறது.

இதனால், திருமாவளவனின் வெளிப்படையான கூட்டணி அறிவிப்புக்கு விஜய் எப்போது பதிலளிப்பார்? விசிகவின் கோரிக்கைக்கு தவெக தலைமை எந்த அளவுக்கு முக்கியத்துவம் அளிக்கும்? அல்லது இந்த மவுனம் தொடருமா? என்ற கேள்விகள் தமிழக அரசியல் களத்தில் தற்போது பரபரப்பை ஏற்படுத்தியுள்ளன.