உலகளாவிய பயண சுதந்திரத்தை அளவிடும் ஹென்லி பாஸ்போர்ட் குறியீடு 2026 பட்டியலில் இந்தியா குறிப்பிடத்தக்க முன்னேற்றம் கண்டுள்ளது. இந்த ஆண்டின் தரவரிசையில் இந்தியா 75வது இடத்தைப் பெற்றுள்ளது. கடந்த ஆண்டுடன் ஒப்பிடும்போது 10 இடங்கள் உயர்ந்திருப்பது முக்கிய மாற்றமாக பார்க்கப்படுகிறது.

புதிய பட்டியலின்படி, இந்தியப் பாஸ்போர்ட் வைத்திருப்பவர்கள் தற்போது 56 நாடுகளுக்கு விசா இல்லாமல் அல்லது விசா-ஆன்-அறைவல் (Visa on Arrival), இ-விசா (e-Visa) வசதியுடன் பயணம் செய்ய முடிகிறது. இதனால் வெளிநாட்டு சுற்றுலா மற்றும் குறுகிய கால பயணங்களுக்கு முன்கூட்டிய நீண்ட விசா செயல்முறைகள் பல இடங்களில் தவிர்க்கப்படுகின்றன.

ஹென்லி பாஸ்போர்ட் இன்டெக்ஸ், சர்வதேச விமானப் போக்குவரத்து சங்கமான IATA வழங்கும் தரவுகளை அடிப்படையாகக் கொண்டு தயாரிக்கப்படுகிறது. ஒரு நாட்டின் குடிமக்கள் முன் விசா இல்லாமல் எத்தனை நாடுகளுக்கு பயணம் செய்ய முடியும் என்பதே அதன் தரவரிசையை நிர்ணயிக்கும் முக்கிய அளவுகோலாகும்.

2026 பட்டியலில் சிங்கப்பூர் முதலிடத்தைத் தக்க வைத்துள்ளது. ஜப்பான் மற்றும் தென் கொரியா தொடர்ந்து முன்னணி இடங்களில் உள்ளன. பல ஐரோப்பிய நாடுகளும் உயர்ந்த தரவரிசையில் இடம்பெற்று உலகளாவிய பயண சுதந்திரத்தில் முன்னிலை வகிக்கின்றன.

இந்தியாவின் தற்போதைய 75வது இடம், கடந்த ஆண்டைவிட முன்னேற்றமாக இருந்தாலும், 2006ஆம் ஆண்டு பெற்ற 71வது இடத்தை விட சற்றே பின்னிலையில் உள்ளது. இருப்பினும், சமீபத்திய முன்னேற்றம் இந்தியர்களுக்கான சர்வதேச பயண வாய்ப்புகள் மேம்பட்டு வருவதை சுட்டிக்காட்டுகிறது. எதிர்காலத்தில் மேலும் நாடுகள் விசா சலுகைகளை வழங்கினால், இந்தியப் பாஸ்போர்ட் வலிமை மேலும் அதிகரிக்கும் என நிபுணர்கள் எதிர்பார்க்கின்றனர்.