ரூ.2,000-க்கு மேல் யுபிஐ மூலம் பணம் செலுத்தினால் இனிமேல் பொதுமக்களிடம் கூடுதல் கட்டணம் வசூலிக்கப்படுமா என்ற குழப்பம் கடந்த சில நாட்களாக நீடித்து வந்த நிலையில், மத்திய நிதியமைச்சர் நிர்மலா சீதாராமன் இதற்கு தெளிவான விளக்கம் அளித்துள்ளார். புதிய விதிகளின்படி, குறிப்பிட்ட வணிகர் யுபிஐ பரிவர்த்தனைகளுக்கு மட்டும் 0.4 சதவீதம் Merchant Discount Rate எனப்படும் MDR கட்டணம் விதிக்கப்படுகிறது. ஆனால் இந்தக் கட்டணத்தை வாடிக்கையாளர்களிடம் தனியாக வசூலிக்கக் கூடாது என்று தெரிவிக்கப்பட்டுள்ளது.

இந்த புதிய MDR நடைமுறை வரும் அக்டோபர் 15ஆம் தேதி முதல் அமலுக்கு வருகிறது. ரூ.2,000-க்கு மேல் நடைபெறும் குறிப்பிட்ட Person-to-Merchant எனப்படும் வணிக யுபிஐ பரிவர்த்தனைகளுக்கு 0.4 சதவீதம் கட்டணம் விதிக்கப்படும். ரூ.75,000 அல்லது அதற்கு மேல் நடைபெறும் பரிவர்த்தனைகளுக்கு அதிகபட்ச MDR கட்டணம் ரூ.300 என வரம்பு நிர்ணயிக்கப்பட்டுள்ளது.

முக்கியமாக, இந்தக் கட்டணத்தை வாடிக்கையாளர் செலுத்த வேண்டியதில்லை. வணிகரே MDR கட்டணத்தை ஏற்க வேண்டும். வங்கிகள் மற்றும் யுபிஐ சேவை வழங்குநர்கள் இந்தக் கட்டணத்தை வாடிக்கையாளர்களிடம் மாற்றிக் கட்டணமாக வசூலிக்கக் கூடாது என்றும் அறிவுறுத்தப்பட்டுள்ளது.

உதாரணமாக, ஒருவர் ரூ.5,000 மதிப்புள்ள பொருளை கடையில் வாங்கி யுபிஐ மூலம் பணம் செலுத்தினால், அந்த ரூ.5,000 தொகைக்கு மேலாக MDR என்ற பெயரில் தனியாக கட்டணம் செலுத்த வேண்டியதில்லை. அந்த பரிவர்த்தனைக்கு பொருந்தும் MDR கட்டணத்தை வணிகர்தான் ஏற்க வேண்டும். அதேபோல், நண்பர் அல்லது உறவினருக்கு ஒருவர் மற்றொருவர் அனுப்பும் Person-to-Person எனப்படும் தனிநபர் யுபிஐ பரிவர்த்தனைகளுக்கு எந்தத் தொகை என்றாலும் MDR கிடையாது.

சிறு வணிகர்களுக்கும் இதில் விலக்கு அளிக்கப்பட்டுள்ளது. யுபிஐ QR மூலம் மாதத்திற்கு ரூ.1 லட்சம் வரை பெறும் சிறு வணிகர்களுக்கு இந்த MDR கட்டணம் விதிக்கப்படாது. இதன் காரணமாக மொத்த வணிக யுபிஐ பரிவர்த்தனைகளில் சுமார் 96 சதவீதம் தொடர்ந்து கட்டணமின்றியே இருக்கும் என மத்திய அரசு தெரிவித்துள்ளது.

ரயில்வே, தொலைத்தொடர்பு, எரிபொருள் போன்ற குறிப்பிட்ட துறைகளுக்கு தனி MDR விகிதம் நிர்ணயிக்கப்பட்டுள்ளது. இந்த வகை பரிவர்த்தனைகளுக்கு ரூ.5 என்ற சிறப்பு கட்டணம் பொருந்தும். பங்குச்சந்தை தொடர்பான சில யுபிஐ பரிவர்த்தனைகளுக்கு 0.02 சதவீதம் என்ற தனி விகிதமும் நிர்ணயிக்கப்பட்டுள்ளது.

இதனிடையே, புதிய MDR குறித்து எழுந்துள்ள குழப்பங்களுக்கு பதிலளித்துள்ள நிர்மலா சீதாராமன், இது வரியோ, செஸ்ஸோ அல்லது அரசுக்கு செல்லும் கூடுதல் கட்டணமோ கிடையாது என்று தெரிவித்துள்ளார். யுபிஐ கட்டண அமைப்பில் உள்ள வங்கிகள், பேமெண்ட் ஆப்கள் மற்றும் பிற சேவை வழங்குநர்களுக்கு இடையே இந்தத் தொகை பகிரப்படும் என்றும் அவர் விளக்கியுள்ளார். மேலும், இந்தக் கட்டணத்தை பொதுமக்கள் மீது சுமத்தக் கூடாது என்பதில் தெளிவான விதிமுறை இருப்பதாகவும் தெரிவித்துள்ளார்.

இதனால், “ரூ.2,000-க்கு மேல் யுபிஐ மூலம் பணம் செலுத்தினால் வாடிக்கையாளரிடம் கூடுதல் கட்டணம் வசூலிக்கப்படும்” என்பது புதிய விதியின் சரியான பொருள் அல்ல. குறிப்பிட்ட பெரிய அளவிலான வணிக யுபிஐ பரிவர்த்தனைகளில் MDR கட்டணத்தை வணிகர்கள் செலுத்த வேண்டும் என்பதே தற்போதைய விதிமுறையாகும். பொதுமக்களுக்கு செய்யப்படும் தனிநபர் பரிவர்த்தனைகள் தொடர்ந்து இலவசமாகவே இருக்கும்.