2026–27 நிதியாண்டிற்கான மத்திய பட்ஜெட், வரும் பிப்ரவரி 1-ம் தேதி ஞாயிற்றுக்கிழமை அன்று நாடாளுமன்றத்தில் தாக்கல் செய்யப்பட உள்ளது. பாதுகாப்புத் துறை அமைச்சர் ராஜ்நாத் சிங் தலைமையிலான நாடாளுமன்ற விவகாரங்களுக்கான அமைச்சரவைக் குழு (CCPA), பட்ஜெட் கூட்டத்தொடருக்கான முக்கிய தேதிகளை அங்கீகரித்ததைத் தொடர்ந்து இந்த அறிவிப்பு வெளியானது. சமீபகால நாடாளுமன்ற வரலாற்றில், ஞாயிற்றுக்கிழமை அன்று மத்திய பட்ஜெட் தாக்கல் செய்யப்படுவது இதுவே முதல்முறை என்பதும் குறிப்பிடத்தக்கது.

பட்ஜெட் கூட்டத்தொடர் ஜனவரி 28-ம் தேதி தொடங்குகிறது. அன்றைய தினம் நாடாளுமன்றத்தின் இரு அவைகளின் கூட்டுக் கூட்டத்தில் குடியரசுத் தலைவர் உரையாற்றுவார். இதனைத் தொடர்ந்து ஜனவரி 29-ம் தேதி, நாட்டின் பொருளாதார நிலையை விளக்கும் பொருளாதார ஆய்வு அறிக்கை (Economic Survey) நாடாளுமன்றத்தில் தாக்கல் செய்யப்படும். அதன் பின்னர் பிப்ரவரி 1-ம் தேதி காலை 11 மணிக்கு, மத்திய நிதியமைச்சர் நிர்மலா சீதாராமன் 2026–27 நிதியாண்டிற்கான பட்ஜெட்டை தாக்கல் செய்ய உள்ளார்.

இந்த பட்ஜெட்டின் மூலம் நிர்மலா சீதாராமன் முக்கியமான பல மைல்கற்களை எட்ட உள்ளார். தொடர்ந்து 9-வது முறையாக மத்திய பட்ஜெட்டை தாக்கல் செய்யும் முதல் நிதியமைச்சர் என்ற சாதனையை அவர் படைக்கிறார். இதன்மூலம், 10 முறை பட்ஜெட் தாக்கல் செய்த முன்னாள் பிரதமர் மொரார்ஜி தேசாய் மற்றும் 9 முறை பட்ஜெட் தாக்கல் செய்த முன்னாள் நிதியமைச்சர் பி. சிதம்பரம் ஆகியோரின் வரிசையில் அவர் இடம்பிடிக்கிறார். மேலும், இது இந்தியாவின் சுதந்திரத்திற்குப் பிந்தைய 80-வது மத்திய பட்ஜெட் என்பதும் முக்கிய அம்சமாகும்.

வார இறுதியில் பட்ஜெட் தாக்கல் செய்யப்படுவது இதுவே முதல் முறை அல்ல. கடந்த 2025-ம் ஆண்டு பட்ஜெட் சனிக்கிழமையன்று தாக்கல் செய்யப்பட்டது. அதேபோல், முன்னாள் நிதியமைச்சர் அருண் ஜெட்லி 2015 மற்றும் 2016-ஆம் ஆண்டுகளில் பிப்ரவரி 28-ம் தேதி (சனிக்கிழமை) பட்ஜெட்டை தாக்கல் செய்துள்ளார். 2017-ம் ஆண்டு முதல், புதிய நிதியாண்டு ஏப்ரல் 1-ல் தொடங்குவதற்கு முன்பே திட்டங்களை விரைவாக நடைமுறைப்படுத்தும் நோக்கில், பட்ஜெட் தாக்கல் செய்யும் தேதி பிப்ரவரி 28-லிருந்து பிப்ரவரி 1-க்கு மாற்றப்பட்டது.

இதனிடையே, ஜனவரி 7-ம் தேதி வெளியான அரசின் முதல் முன்கூட்டிய மதிப்பீடுகளின்படி, உலகளாவிய பொருளாதார சவால்களுக்கு மத்தியிலும் இந்தியாவின் உண்மையான மொத்த உள்நாட்டு உற்பத்தி (GDP) வளர்ச்சி 7.4 சதவீதமாக இருக்கும் என கணிக்கப்பட்டுள்ளது. இது கடந்த ஆண்டின் 6.5 சதவீத வளர்ச்சியை விட அதிகமாகும். இந்த வளர்ச்சி கணிப்புகள், 2026–27 மத்திய பட்ஜெட்டின் திசை மற்றும் முக்கிய அறிவிப்புகளை தீர்மானிப்பதில் முக்கிய பங்கு வகிக்கும் என எதிர்பார்க்கப்படுகிறது.