ஆந்திர மாநிலம் பல்நாடு மாவட்டத்தில் நிகழ்ந்துள்ள ஒரு கொடூரமான ஆணவக் கொலைச் சம்பவம் நாடு முழுவதும் பெரும் அதிர்ச்சியை ஏற்படுத்தியுள்ளது. காதலித்துத் திருமணம் செய்து கொண்ட 22 வயது இளம் பெண்ணை, அவரது தந்தையே கழுத்தை நெரித்துக் கொலை செய்திருப்பது அம்பலமாகியுள்ளது. இந்தத் துயரச் சம்பவத்தில் காவல்துறையினரின் தவறான முடிவே அந்தப் பெண்ணின் மரணத்திற்கு முக்கியக் காரணமாக அமைந்துள்ளதாகக் குற்றச்சாட்டுகள் எழுந்துள்ளன.

பல்நாடு மாவட்டம் மாசர்லா நகரைச் சேர்ந்த சௌதேஸ்வரி (22) என்ற இளம்பெண், அதே பகுதியைச் சேர்ந்த நாகராஜு என்பவரைக் காதலித்து கடந்த மார்ச் 4-ஆம் தேதி திருமணம் செய்து கொண்டார். இந்தத் திருமணத்திற்குச் சௌதேஸ்வரியின் தந்தை சந்திர ஸ்ரீனு மற்றும் குடும்பத்தினர் கடும் எதிர்ப்பு தெரிவித்து வந்தனர். தனது மகள் காணாமல் போய்விட்டதாகச் சந்திர ஸ்ரீனு காவல் நிலையத்தில் புகார் அளித்திருந்தார்.

இதனைத் தொடர்ந்து, கடந்த மார்ச் 18-ஆம் தேதி காவல்துறையினர் அந்தத் தம்பதியைக் காவல் நிலையத்திற்கு அழைத்து விசாரணை நடத்தினர். அப்போது, தான் மேஜர் என்றும், தனது விருப்பப்படியே நாகராஜுவை மணம் முடித்ததாகவும், அவருடனேயே செல்ல விரும்புவதாகவும் சௌதேஸ்வரி உறுதியாகத் தெரிவித்தார். இருப்பினும், அங்கிருந்த காவல்துறை அதிகாரிகள் சௌதேஸ்வரியின் கோரிக்கையை நிராகரித்து, அவரைப் பெற்றோருடன் செல்லுமாறு கட்டாயப்படுத்தியுள்ளனர். மேலும், அவரது கணவரைத் தனியாக அனுப்பி வைத்தனர்.

காவல்துறையினரின் இந்த முடிவே சௌதேஸ்வரியின் வாழ்க்கையை முடிவுக்குக் கொண்டு வந்தது. வீட்டிற்கு அழைத்துச் செல்லப்பட்ட அன்றே, சௌதேஸ்வரி உறங்கிக் கொண்டிருந்தபோது தந்தை சந்திர ஸ்ரீனு மற்றொரு நபருடன் இணைந்து அவரது கழுத்தை நெரித்துக் கொலை செய்துள்ளார். பின்னர் இது தற்கொலை என்று நாடகமாடினார். ஆனால், ஏப்ரல் 4-ஆம் தேதி வெளியான உடற்கூராய்வு அறிக்கையில், சௌதேஸ்வரி கொலை செய்யப்பட்டது உறுதி செய்யப்பட்டது. தற்போது சௌதேஸ்வரியின் தந்தை கைது செய்யப்பட்டுள்ளார்.