பாகிஸ்தானின் பாஸ்போர்ட், உலகின் மிகவும் பலவீனமான பாஸ்போர்ட்களில் ஒன்றாக மீண்டும் பெயர் பெற்றுள்ளது. 2024 ஆம் ஆண்டில் 100வது இடத்தில் இருந்த பாகிஸ்தான், 2025 ஆம் ஆண்டுக்கான ஹென்லி பாஸ்போர்ட் குறியீட்டில் 103வது இடத்துக்குச் சரிந்துள்ளது. இதனால், பாகிஸ்தானியர்கள் தற்போது வெறும் 33 நாடுகளுக்கே விசா இல்லாமல் பயணம் செய்ய முடிகிறது.

இந்த தரவரிசை உலகளாவிய 199 நாடுகளின் பாஸ்போர்ட்களைப் பொருத்தது. ஒவ்வொரு நாட்டின் குடிமக்கள் விசா இல்லாமல் அல்லது 'ஆன்அறைவல் விசா' மூலம் பயணிக்கக்கூடிய நாடுகளின் எண்ணிக்கையின் அடிப்படையில் மதிப்பிடப்படுகிறது.

பாகிஸ்தானின் பாஸ்போர்ட் தற்போது ஏமன் (Yemen) நாட்டுடன் இணைந்து 103வது இடத்தில் உள்ளது. அதைவிட மோசமான நிலையில் ஈராக் (104), சிரியா (105), ஆப்கானிஸ்தான் (106) ஆகிய நாடுகள் உள்ளன. பாகிஸ்தானின் பாஸ்போர்ட் மதிப்பில் ஏற்பட்ட இந்த சரிவு, அந்த நாட்டின் பொருளாதார நெருக்கடி, அரசியல் சீர்கேடு மற்றும் சர்வதேச உறவுகளில் ஏற்பட்ட பாதிப்பு ஆகியவற்றை வெளிப்படுத்துவதாக ஹென்லி அறிக்கை கூறுகிறது.

மறுபுறம், சிங்கப்பூர் பாஸ்போர்ட் உலகின் சக்திவாய்ந்த பாஸ்போர்டாக 2025 ஆண்டிலும் முதலிடத்தை தக்கவைத்துள்ளது. இதன் மூலம் அதன் குடிமக்கள் 193 நாடுகளுக்கு விசா இல்லாமல் பயணம் செய்ய முடிகிறது.

இரண்டாவது இடத்தில் தென் கொரியா (190 நாடுகள்) மற்றும் மூன்றாவது இடத்தில் ஜப்பான் (189 நாடுகள்) உள்ளன. ஜெர்மனி, இத்தாலி, லக்சம்பர்க், ஸ்பெயின், சுவிட்சர்லாந்து ஆகியவை நான்காவது இடத்தை (188 நாடுகள்) பகிர்ந்து கொண்டுள்ளன.

ஆஸ்திரியா, பெல்ஜியம், டென்மார்க், பின்லாந்து, பிரான்ஸ், அயர்லாந்து, நெதர்லாந்து ஆகியவை ஐந்தாவது இடத்தில் உள்ளன — இவை 187 நாடுகளுக்கு விசா இல்லாமல் செல்ல அனுமதிக்கின்றன.

ஆச்சரியமான மாற்றமாக, அமெரிக்கா முதல் முறையாக முதல் 10 இடங்களிலிருந்து வெளியேறியுள்ளது. தற்போது அமெரிக்கா 12வது இடத்தில் உள்ளது, இதன் குடிமக்கள் 180 நாடுகளுக்கு விசா இல்லாமல் பயணம் செய்யலாம்.

இந்திய பாஸ்போர்ட் தரவரிசையும் சரிந்துள்ளது. கடந்த ஆண்டில் 84வது இடத்தில் இருந்த இந்தியா, இப்போது மவுரித்தேனியாவுடன் இணைந்து 85வது இடத்தில் உள்ளது. இதன் மூலம் இந்திய குடிமக்கள் 57 நாடுகளுக்கு விசா இல்லாமல் பயணம் செய்ய முடிகிறது.

2006 முதல் 2025 வரை இந்திய பாஸ்போர்ட் தரவரிசையைப் பார்த்தால் — 71வது இடத்திலிருந்து தொடங்கி, பல ஆண்டுகளாக சிறு மாற்றங்களுடன் இறங்கி, தற்போது 85வது இடத்தில் நிலைத்துள்ளது.

இவ்வாறு, உலகளாவிய குடிமக்கள் பயண சுதந்திரத்தை அளக்கும் ஹென்லி பாஸ்போர்ட் குறியீட்டில், ஆசிய நாடுகள் இரு முனைகளிலும் இருக்கின்றன — ஒரு புறம் சிங்கப்பூர், தென் கொரியா போன்ற முன்னேற்ற நாடுகள் முன்னணியில் இருக்க, மறுபுறம் பாகிஸ்தான், ஆப்கானிஸ்தான் போன்ற நாடுகள் பின் தங்கியவையாக உள்ளன.