மத்திய பிரதேச மாநிலம் உஜ்ஜைனில், 2028-ஆம் ஆண்டு நடைபெறவுள்ள 'சிம்ஹஸ்த கும்பமேளா' விழாவை முன்னிட்டு மேற்கொள்ளப்பட்டு வரும் சாலை விரிவாக்கப் பணிகளுக்காக, மசூதி ஒன்றின் ஒரு பகுதியை இடிக்கும் நடவடிக்கையை உஜ்ஜைன் மாநகராட்சி நிர்வாகம் பலத்த பாதுகாப்புடன் தொடங்கியது. இதற்குக் கடும் எதிர்ப்பு தெரிவித்த உள்ளூர் மக்கள், பணிகளைத் தடுக்க முயன்று காவல்துறையினர் மீது கல்வீச்சுத் தாக்குதலில் ஈடுபட்டதால் அப்பகுதியில் பெரும் பதற்றமும் பரபரப்பும் நிலவியது.

காவல்துறை தடியடி & பாதுகாப்பு வளையம்:

கற்களை வீசிய போராட்டக்காரர்களைக் கலைக்கக் காவல்துறையினர் தீவிரத் தடியடி நடத்தியதுடன் கண்ணீர்ப்புகைக் குண்டுகளையும் வீசினர். அசம்பாவிதங்களைத் தவிர்க்கும் பொருட்டு அப்பகுதியில் சுமார் 2,000 பாதுகாப்புப் படையினர் தீவிரப் பணியில் ஈடுபடுத்தப்பட்டுள்ளனர். மசூதியைச் சுற்றி இரும்புத் தடுப்புகள் அமைக்கப்பட்டு, 500 மீட்டர் சுற்றளவிற்குப் போக்குவரத்து முழுமையாகத் தடை செய்யப்பட்டுள்ளது. முன்னதாக, நூற்றுக்கணக்கான உள்ளூர்வாசிகள் இரவு நேரத்தில் மசூதிக்குள் அமர்ந்து தொடர் போராட்டத்தில் ஈடுபட்டதால் இடிப்பு நடவடிக்கை தற்காலிகமாக நிறுத்தி வைக்கப்பட்டிருந்த நிலையில், தற்போது துப்பாக்கி ஏந்திய போலீஸ் பாதுகாப்புடன் இடிப்புப் பணிகள் மீண்டும் தொடங்கப்பட்டுள்ளன.

நீதிமன்றத் தீர்ப்பும் அரசியல் கண்டனமும்:

காந்தல் சௌராஹா முதல் கோபால் மந்திர் வரையிலான 900 மீட்டர் நீளமுள்ள சாலையை 15 மீட்டர் அகலப்படுத்தும் திட்டத்திற்காகவே இந்த நடவடிக்கை மேற்கொள்ளப்படுகிறது. இம்மசூதியை வக்ப் சொத்தாக அறிவிக்கக் கோரியும், சாலையை வேறு பாதை வழியே விரிவாக்கம் செய்யக் கோரியும் மசூதிக் குழுவினர் தாக்கல் செய்த மனுவை உயர் நீதிமன்றம் ஏற்கனவே தள்ளுபடி செய்துள்ளது. இந்நிலையில், அரசின் இந்த அதிரடி நடவடிக்கைக்குக் காங்கிரஸ் எம்.பி. இம்ரான் பிரதாப் கர்ஹி கடும் கண்டனம் தெரிவித்துள்ளார். வரலாற்றுச் சிறப்புமிக்க ஒரு பாரம்பரியத் தளத்தை இடிப்பதை எந்தச் சூழலிலும் ஏற்றுக்கொள்ள முடியாது என்று விமர்சித்துள்ள அவர், அரசின் இத்தகைய போக்கைக் கடுமையாகக் கேள்விக்குள்ளாக்கியுள்ளார்.