கர்நாடக மாநிலம் பெங்களூரு–மைசூரு சாலையோரப் பகுதியில் வசித்து வந்த 23 வயது பிபிஏ பட்டதாரி இளம்பெண், தனது பெற்றோர் மற்றும் இளைய சகோதரியுடன் அமைதியாக குடும்ப வாழ்க்கை நடத்தி வந்தார். ஆனால் அந்த குடும்பத்தில் நடந்த எதிர்பாராத சம்பவம், தற்போது போலீசாரையும் சமூகத்தையும் அதிர்ச்சியில் ஆழ்த்தியுள்ளது.

வேலை தேடுவதற்காக என்று கூறி, சுமார் ஒரு வருடத்திற்கு முன்பு தனது தந்தையிடம் கேட்டுப் பெற்ற ஸ்மார்ட்போன், பின்னர் குடும்பத்துக்கே பெரும் சிக்கலாக மாறியது.

சில வாரங்களுக்கு முன்பு, மகள் ஒருவருடன் சந்தேகத்துக்கிடமான வீடியோ கால் உரையாடலில் ஈடுபட்டதை கவனித்த தாய், மொபைலைச் சோதித்தபோது அதிர்ச்சியூட்டும் தகவல்கள் வெளிச்சத்துக்கு வந்தன.

மொபைலில் இருந்த சாட்கள் மற்றும் மீடியா கோப்புகளைப் பார்த்தபோது, குடும்ப உறுப்பினர்களின் தனியுரிமையை மீறும் வகையில் எடுக்கப்பட்ட புகைப்படங்கள் மற்றும் வீடியோக்கள் ‘வருண்’ என்ற நபருக்கு அனுப்பப்பட்டிருந்தது தெரியவந்தது.

மேலும், அந்த நபரே இவ்வாறு செய்யும்படி தூண்டியிருப்பதும் விசாரணையில் வெளிப்பட்டது.குடும்பத்தினர் எச்சரித்தும் கேட்காத அந்தப் பெண், கடந்த வாரம் அந்த நபரைத் திருமணம் செய்யப் போவதாகக் கூறி வீட்டை விட்டு வெளியேறியதாக தெரிவிக்கப்படுகிறது.

மகளின் பாதுகாப்பும், தவறாகப் பயன்படுத்தப்பட்ட தகவல்களும் குறித்து அச்சமடைந்த தாய், உடனடியாக பெங்களூரு காவல்துறையில் புகார் அளித்தார்.

வழக்குப் பதிவு செய்த போலீசார், தலைமறைவாக உள்ள இளம்பெண்ணையும், வருண் என்ற நபரையும் தீவிரமாகத் தேடி வருகின்றனர். ‘டிஜிட்டல் உலகத்தின் தவறான நட்பு எவ்வளவு ஆபத்தாக மாறலாம்?’ என்ற கேள்வியை இந்தச் சம்பவம் மீண்டும் எழுப்பியுள்ளது.