மோடி அரசு செயல்படுத்திய சரக்கு மற்றும் சேவை வரி (ஜிஎஸ்டி) இன்று எட்டு ஆண்டுகளை கடந்துள்ளது. இந்த நிலையில், மக்களவை எதிர்கட்சித் தலைவர் ராகுல் காந்தி, ஜிஎஸ்டி ஒரு வரிச் சீர்திருத்தம் அல்ல, மாறாக இது பொருளாதார அநீதி எனவும், பெருநிறுவனங்களுக்கு மட்டுமே பயன்படும் ஒரு கருவியாகவே செயல்படுகிறது எனவும் கடுமையாக விமர்சித்துள்ளார்.

இது தொடர்பாக அவர் தனது எக்ஸ் (முன்னதாக Twitter) கணக்கில் வெளியிட்டுள்ள பதிவில், “ஜிஎஸ்டி ஏழைகள் மீது தண்டனையாகவும், சிறு, குறு மற்றும் நடுத்தர நிறுவனங்களை அழிக்கவும், மாநிலங்களின் உரிமைகளை பறிக்கவும் உருவாக்கப்பட்டதுடன், பிரதமரின் சில பில்லியனர் நண்பர்களுக்கே பயன்படுகின்றது” என குற்றம்சாட்டியுள்ளார்.

ஜிஎஸ்டி ஒரே இந்தியா என்ற ஒருங்கிணைந்த வரி அமைப்பாக வாக்குறுதி அளிக்கப்பட்டபோதிலும், தற்போது அது ஐந்து அடுக்கு வரி விதிப்பு முறையுடன் பல்வேறு குழப்பங்களை உருவாக்கியிருப்பதாகவும், இதுவரை 900 முறைக்குமேல் திருத்தங்கள் செய்யப்பட்டுள்ளன என்றும் அவர் சுட்டிக்காட்டியுள்ளார். இதனால் கேரமல் பாப்கார்ன் முதல் கிரீம் பன்கள் வரை கூட ஜிஎஸ்டி கட்டமைப்பில் குழப்பத்திற்கு உள்ளாகியுள்ளன என அவர் விமர்சித்துள்ளார்.

மேலும், ஜிஎஸ்டி போர்டல் தினசரி தளர்வுகளால் சிறு கடைக்காரர்கள் மற்றும் குறு தொழில்கள் கடும் சிரமங்களை எதிர்கொண்டு வருகின்றன என்றும், இதே நேரத்தில் பெருநிறுவனங்கள் கணக்காளர்களின் படைகளுடன் வரிச் சட்டங்களில் ஓட்டைகளை பயன்படுத்தி பலனடைகின்றன என்றும் கூறியுள்ளார்.

இந்நிலையில், கடந்த எட்டு ஆண்டுகளில் 18 லட்சத்திற்கும் அதிகமான சிறு நிறுவனங்கள் மூடப்பட்டுள்ளன என்பது கவலையளிக்கிறது. இதேவேளை, பெருநிறுவனங்கள் ஆண்டுதோறும் ₹1 லட்சம் கோடிக்கும் மேற்பட்ட வரிச் சலுகைகளை அனுபவிக்கின்றன. ஆனால் பொதுமக்கள், தேநீர் முதல் சுகாதாரக் காப்பீடு வரை அனைத்திற்கும் ஜிஎஸ்டி செலுத்த வேண்டிய நிலை உருவாகியுள்ளது.

ஜிஎஸ்டி கட்டமைப்பிலிருந்து பெட்ரோல் மற்றும் டீசலை திட்டமிட்டு விலக்கி வைத்துள்ளதாகவும், இதனால் விவசாயிகள், போக்குவரத்து துறையினர் மற்றும் பொதுமக்கள் மிகுந்த பாதிப்புக்கு உள்ளாகின்றனர் என்றும் ராகுல் காந்தி குற்றம்சாட்டினார்.

மேலும், ஜிஎஸ்டி நிலுவைத் தொகைகள் பாஜக அல்லாத மாநிலங்களுக்கு வழங்கப்படாமல், அது தண்டனை கருவியாக பயன்படுத்தப்படுகின்றது என்பதும் கூட்டாட்சிக்கு எதிரான மோடி அரசின் நிலைப்பாட்டை வெளிப்படுத்துகிறது என்றும் அவர் கூறினார்.

ஜிஎஸ்டி என்பது உப்பா (UPA) அரசின் தொலைநோக்கு திட்டமாகவே உருவாக்கப்பட்டது என்றும், இந்திய சந்தைகளை ஒன்றிணைக்கும் நோக்கத்துடன் திட்டமிடப்பட்டது என்றும் அவர் கூறினார். ஆனால் அதன் தவறான நடைமுறைப்படுத்தல் மற்றும் அதிகாரத்தின் மையப்படுத்தல் காரணமாக, அதன் உண்மையான நோக்கம் தவறுபட்டுவிட்டதாக குற்றம்சாட்டியுள்ளார்.

“நாட்டின் முன்னேற்றத்தில் ஒவ்வொரு இந்தியரும் பங்குபெற விரும்புகிறோம் எனில், சீர்திருத்தப்பட்ட, நீதிமிக்க மற்றும் அனைவருக்கும் சமமான ஜிஎஸ்டி கட்டமைப்பு தேவை” என்று ராகுல் காந்தி வலியுறுத்தியுள்ளார்.